Grwpiau cymunedol a chwaraeon i gael defnyddio meysydd chwarae a mannau awyr agored y cyngor am ddim

Dan gynigion a fydd yn mynd gerbron Cabinet Cyngor Abertawe, bydd ffïoedd ar gyfer defnyddio cyfleusterau fel meysydd chwarae, parciau a thraethau ar gyfer pêl-droed, rygbi, criced cymunedol, dosbarthiadau ymarfer corff awyr agored yn cael eu hatal tan 31 Mawrth, 2022.

Cyflwynwyd y cam hwn wrth i Abertawe a gweddill Cymru ddod allan o'r cyfnod clo yn yr wythnosau a'r misoedd i ddod.

Dywedodd Robert Francis-Davies, Aelod y Cabinet dros Fuddsoddi, Adfywio a Thwristiaeth, y bydd atal ffïoedd am ddefnyddio mannau awyr agored yn cefnogi clybiau ac elusennau ac ar yr un pryd yn annog pobl i ddefnyddio mannau awyr agored yn ddiogel.

Meddai'r Cyng. Francis-Davies, "Mae pob un ohonom yn gwybod bod y niferoedd sy'n mynd allan i fwynhau ymarfer corff ac awyr iach wedi cynyddu'n aruthrol yn ystod y pandemig. Ar yr un pryd, mae rhwydwaith ein dinas o glybiau chwaraeon a grwpiau cymunedol wedi bod ar goll braidd gan fod y rheolau wedi atal sesiynau hyfforddi a chyfarfodydd cymdeithasol rhag cael eu cynnal. 

"Nawr, wrth i ni ddod allan o'r pandemig rydym am annog pobl i barhau i wneud mwy o ymarfer corff a chefnogi clybiau i ailgychwyn mewn ffordd sy'n ddiogel, yn unol â'r rheolau, ac yn hawdd ei wneud.

"Mae'n golygu y byddwn yn chwarae ein rhan wrth gefnogi cymunedau i fwynhau eu haf a'r tymor nesaf pan, gobeithio, na fydd cyfyngiadau mor rhwystredig ag y buont hyd yn hyn."

Dan y cynlluniau, byddai angen i grwpiau cymunedol, elusennau ac unigolion gadw lle ym mharciau'r cyngor, fel y maent bob amser wedi'i wneud. Mae hyn er mwyn sicrhau nad oes gwrthdaro mewn archebion gyda'r rheini sydd eisoes wedi cadw lle, ac, yn bwysicach, i sicrhau bod pob man yn cael ei ddefnyddio mewn ffordd sy'n ddiogel o ran COVID-19 i'r holl ddefnyddwyr.

Mae'r ymagwedd hon hefyd yn golygu na chaniateir i bobl gyrraedd y mannau hyn i'w defnyddio heb gadw lle ymlaen llaw. Codir tâl o hyd ar y rheini sydd am ddefnyddio cyfleusterau dan do, caeau chwarae 3G a chyfleusterau gwell tebyg eraill.

Meddai Rob Stewart, Arweinydd y Cyngor, "Addawom gefnogi cymunedau wrth i ni ddod allan o'r pandemig ac mae'r gronfa adfer 20 miliwn yn caniatáu i ni gefnogi clybiau chwaraeon a grwpiau cymunedol yn uniongyrchol ar draws Abertawe. Bydd y gronfa hon yn helpu i leihau costau llogi meysydd chwarae a pharciau a mannau chwarae eraill i sero ar gyfer nifer o bobl.

"Rydym yn cydnabod bod y flwyddyn ddiwethaf wedi bod yn anodd iawn ac y bydd pobl eisiau dychwelyd i fwynhau dosbarthiadau chwaraeon ac ymarfer corff cymunedol trefnedig yn ein parciau hardd a'n mannau agored. Gofynnwn i bawb barhau i ymddwyn yn gyfrifol wrth ymgymryd â gweithgareddau y tu mewn a'r tu fas ac yn unol â Chanllawiau Llywodraeth Cymru.

"Yn ogystal â'r gefnogaeth ychwanegol bosib hon ar gyfer grwpiau chwaraeon a chymuned byddwn hefyd yn gohirio ffïoedd ar gyfer digwyddiadau a gweithgareddau cymunedol anfasnachol fel ffeiriau a diwrnodau gweithgareddau pan fydd canllawiau'r Llywodraeth yn caniatáu i bethau o'r fath gael eu cynnal.

"Mae'n ffordd arall y gall y cyngor gyfrannu at adfer bywyd cymunedol yn dilyn y pandemig. Nid yw'r firws wedi diflannu ac mae'n rhaid i ni barhau i ddilyn y rheolau i'n cadw ni a'n teuluoedd yn ddiogel.

"Ond mae mwy o resymau dros wenu o dan y mygydau ar ein hwynebau ac mae'r cyngor yn falch o chwarae ei ran yn hynny nawr a thros yr wythnosau a'r misoedd i ddod."

Ni fydd unrhyw newidiadau i'r trefniadau presennol nes y bydd y cynigion wedi eu hystyried gan y Cabinet. 

Mwy o wybodaeth:

• Trefnu digwyddiad a defnyddio mannau agored
• Ymholiadau ynghylch trefnu i ddefnyddio cae pêl-droed neu gae criced: gosod.parciau@abertawe.gov.uk