Mabwysiadu fel 'antur gyffrous' i fam newydd
Mae menyw o Abertawe yn dweud bod ei bywyd wedi troi'n "gorwynt llawn anturiaethau cyffrous" ers iddi fabwysiadu merch ifanc.
Wythnos Genedlaethol Mabwysiadu yw hi'r wythnos hon ac mae cyn-weithiwr Cyngor Abertawe, Karyn, wedi bod yn myfyrio ar sut mae ei bywyd wedi newid.
Bu'n breuddwydio am ddod yn fam, ond wynebodd problemau ffrwythlondeb ac yna gwahanu oddi wrth ei phartner, fodd bynnag gyda chefnogaeth teulu a ffrindiau penderfynodd fabwysiadu ac nid yw wedi edrych yn ôl ers hynny.
Meddai Karyn, "Mae fy mywyd wedi newid yn llwyr ers i mi ddod yn fam i ferch fach, mae'n antur gyffrous, llawn difyrrwch. Cael gweld y byd drwy lygaid fy merch yw'r peth mwyaf rhyfeddol yn y byd.
"Mae mynd am dro i'r traeth, drwy'r goedwig ac i'r parc yn cymryd amser hir, gan ein bod ni'n stopio i edrych ar bethau ac archwilio. Fyddwn i byth am newid hynny, mae'n fraint fawr cael bod yn fam fabwysiadol iddi."
Mabwysiadodd Karyn gyda Gwasanaeth Mabwysiadu Bae'r Gorllewin, sy'n gweithio i ddod o hyd i gartrefi cariadus, parhaol i blant a phobl ifanc y mae angen cartrefi arnynt.
Mae angen mwy o ddarpar rieni fel Karyn i ddod ymlaen ar Wasanaeth Mabwysiadu Bae'r Gorllewin ac mae ganddo staff cyfeillgar a medrus sydd ar gael i sgwrsio â phobl i'w helpu i ddeall a yw mabwysiadu yn addas ar eu cyfer ac yna eu harwain drwy'r broses.
Cysylltwch â Gwasanaeth Mabwysiadu Bae'r Gorllewin drwy ffonio 0300 356 22 22 neu e-bostiwch enquiries@westernbaydoption.org