Cartrefi cyngor newydd yn barod i groesawu eu tenantiaid cyntaf

Mae'r pedair fflat un ystafell wedi eu creu yn hen ganolfan addysg Tŷ Bryn ar Walter Road, Uplands.

Dywedodd Andrea Lewis, Dirprwy Arweinydd ar y cyd y Cyngor ac Aelod y Cabinet dros Newid yn yr Hinsawdd a Thrawsnewid Gwasanaethau, y bydd tenantiaid wrth eu bodd gyda'u cartrefi newydd.

Meddai, "Mae'r fflatiau newydd yn Nhŷ Bryn o safon uchel iawn ac maent mewn lleoliad gwych gyda lleoedd parcio a thiroedd a golygfeydd hyfryd.

"Mae gan y ddwy fflat ar y llawr gwaelod ystafelloedd ymolchi hygyrch, sy'n eu gwneud yn berffaith i'r rheini â heriau symudedd.

"Mae galw mawr am dai fforddiadwy o safon i'w rhentu yn Abertawe, ar gyfer pobl sengl a theuluoedd. Eleni rydym yn buddsoddi tua £7m yn rhagor mewn cartrefi newydd er mwyn helpu i gynnal y momentwm.

"Mae tîm y cyngor sy'n gyfrifol am y fflatiau yn Nhŷ Bryn wedi gwneud gwaith arbennig o dda i newid ac ailbwrpasu adeilad a safle ag ôl traul arnynt."

Maent ymysg y cartrefi newydd cyntaf i gael eu hadeiladu gan y cyngor mewn cenhedlaeth, fel rhan o raglen adeiladu sy'n cynnwys bron 100 eiddo newydd a fydd yn cael eu hadeiladu ar gyfer rhent fforddiadwy, gan amrywio o fflatiau i gartrefi teuluoedd â thair ystafell wely.

Mae'r pecyn o gartrefi newydd yn rhan o fuddsoddiad gwerth miliynau o bunnoedd yn nyfodol tai cymdeithasol Abertawe, a bwriad y cyngor yw adeiladu 1,000 o gartrefi newydd dros y degawd nesaf.

Daw'r arian ar gyfer y cartrefi newydd a'r gwelliannau ar gyfer y cartrefi sydd eisoes yn bodoli o'r rhent a delir gan y tenantiaid, grantiau gan Lywodraeth Cymru a benthyca CRT. Ni ddaw unrhyw ran o'r gwariant o dreth y cyngor.

Llun: Tŷ Bryn