Mynegwch eich barn yr wythnos nesaf am hwb sector cyhoeddus arfaethedig

Byddai'r hwb sector cyhoeddus pum llawr a glustnodir ar gyfer tir yn hen Ganolfan Siopa Dewi Sant yn cynnwys mannau masnachol ar gyfer siopau a bwytai, ynghyd â swyddfeydd uwchben y rhain i'r cyngor ac amrywiaeth o bartneriaid eraill o'r sector cyhoeddus a'r sector preifat.

Cynhelir digwyddiad gwybodaeth ac ymgynghori galw heibio ynghylch yr hwb sector cyhoeddus newydd o ddydd Mawrth 13 Awst tan ddydd Iau 15 Awst yn hen uned siop gerddoriaeth Cranes yn ardal hen safle Canolfan Siopa Dewi Sant.

Dyma amserau'r ymgynghoriad:

• Dydd Mawrth 13 Awst: 1.00pm i 7.00pm
• Dydd Mercher 14 Awst: 1.00pm i 7.00pm
• Dydd Iau 15 Awst: 9.00am i 1.00pm

Cyhoeddir hefyd wefan lle gall pobl weld y cynlluniau a rhoi adborth pan fydd yr ymgynghoriad yn dechrau ddydd Mawrth.

Ar y cam hwn, gofynnir am adborth am ddyluniad a golwg yr adeilad, a fyddai'n bodloni'r safonau uchaf o ran cynaliadwyedd.

Bydd hefyd ragor o gyfleoedd i fynegi barn fel rhan o'r broses gynllunio yn y dyfodol. 

Gallai bron 1,000 o bobl weithio yno.

Byddai'r hwb sector cyhoeddus yn galluogi safle'r Ganolfan Ddinesig ar lan y môr i gael ei ailddatblygu, gan hefyd gefnogi masnachwyr yng nghanol y ddinas oherwydd nifer yr ymwelwyr a fyddai'n cael eu denu.

Byddai'r cyngor ac Urban Splash yn datblygu'r hwb sector cyhoeddus arfaethedig. Byddai'r berchnogaeth yn aros yn nwylo'r cyngor. Hwn fyddai cam cyntaf y broses o ddatblygu'r safle'n gyffredinol dan arweiniad Urban Splash, sy'n parhau i weithio ar gynlluniau ar gyfer gweddill y safle.

Meddai'r Cyng. Rob Stewart, Arweinydd Cyngor Abertawe, "Mae angen i ragor o bobl weithio a byw yng nghanol dinas Abertawe i gefnogi masnachwyr a chyflogaeth sydd eisoes yn bodoli, creu swyddi newydd ac annog rhagor o siopau a busnesau eraill i agor yn y dyfodol.

"Bydd yr hwb sector cyhoeddus arfaethedig yn helpu i ddiwallu'r angen hwnnw oherwydd nifer y gweithwyr ychwanegol a fydd yn gwario eu harian mewn bwytai, siopau, caffis a busnesau eraill yng nghanol y ddinas.

"Yn amodol ar adborth ymgynghoriad a chaniatâd cynllunio, adeiladu'r hwb fyddai cam nesaf y gwaith trawsnewid gwerth £1bn yng nghanol y ddinas, gan ddilyn cynlluniau fel Arena Abertawe, adfer Theatr y Palace a datblygu swyddfeydd newydd ar gyfer tenantiaid y sector preifat yn 71/72 Ffordd y Brenin.

"Mae'r cynllun yn rhan o'n hymrwymiad i adfywio canol dinas Abertawe a chreu cyrchfan blaenllaw i ymweld ag ef, ei fwynhau, a gweithio, byw ac astudio ynddo."

Meddai David Warburton, cyfarwyddwr datblygu Urban Splash, "Edrychwn ymlaen at weithio gyda'r gymuned leol. Rydym yn gobeithio cynnwys eu hadborth i sicrhau bod y cynigion hyn i greu hwb masnachol bywiog gydag amwynderau gwych, cyfleoedd swyddi ac ecosystem newydd sy'n ffynnu, yn diwallu anghenion tymor hir y ddinas."

Mae Urban Splash hefyd yn parhau i weithio ar gynigion ar gyfer safle'r Ganolfan Ddinesig. Bydd y cyhoedd yn cael cyfle i roi adborth am y rhain ar ôl iddynt gael eu cadarnhau.

Disgwylir i'r gwaith i adeiladu'r hwb sector cyhoeddus ddechrau yng nghanol 2025, yn amodol ar ymgynghoriad a chaniatâd cynllunio.