Netomnia yn dod â ffibr llawn i 50,000 o adeiladau yn Abertawe

Gall miloedd o gartrefi a busnesau yn yr ardal bellach gael mynediad atseilwaith ffibr llawn Netomnia, sy'n galluogi trigolion a busnesau i dderbyn gwasanaethau band eang cyflym a dibynadwy drwy ddarparwyr gwasanaeth rhyngrwyd partner Netomnia).

Gan ddechrau yn Nhreforys yn 2022, mae Netomnia wedi ehangu ei rwydwaith yn gyflym i gwmpasu hyd yn oed fwy o ardaloedd yn ninas Abertawe.

Dywedodd Zoltan Kovacs, Rheolwr Gyfarwyddwr Netomnia: "Mae cyrraedd 50,000 o adeiladau yn Abertawe a Threforys yn garreg filltir wych i ni. Mae ein seilwaith, gyda'i gyflymderau cymesur a chyflym iawn, a'i ddibynadwyedd, yn grymuso trigolion a busnesau i arloesi, cydweithredu ac aros ar y blaen mewn byd digidol sy'n datblygu'n gyflym. Mae'r buddsoddiad hwn yn cadarnhau ein hymrwymiad i adeiladu cysylltedd cadarn y genhedlaeth nesaf a fydd yn cefnogi datblygiad digidol y gymuned am ddegawdau i ddod."

Mae Rhaglen Seilwaith Digidol Bargen Ddinesig Bae Abertawe yn gwbl gefnogol i'r twf hwn ac mae'n gweithio gyda chyflenwyr i sicrhau y gall mentrau fel menter Netomnia ffynnu a helpu i sbarduno twf economaidd, darparu sylfaen ar gyfer trawsnewid digidol a gwella cynhwysiant cymdeithasol.

Dywedodd y Cynghorydd Rob Stewart, Arweinydd Cyngor Abertawe a Chadeirydd Cyd-bwyllgor Bargen Ddinesig Bae Abertawe:"Dyma nifer sylweddol o adeiladau ar draws y sir sydd bellach â'r rhwydwaith seilwaith i wella eu cysylltedd.  Mae Abertawe yn prysur ddod yn hwb digidol yn y rhanbarth a bydd cefnogaeth barhaus Bargen Ddinesig Bae Abertawe i hyn ond yn cryfhau sefyllfa'r sir yn y dyfodol."

Mae gwaith Netomnia yn Abertawe a Threforys yn parhau ar frys, ac mae cynlluniau i ddarparu miloedd yn rhagor o adeiladau yn ystod y misoedd nesaf. Edrychwch ar wefan Netomnia i weld a yw'ch cartref neu'ch busnes wedi'i gynnwys yn ei broses gyflwyno.

Mae Netomnia yn cydweithio'n agos â darparwyr gwasanaeth rhyngrwyd i ddarparu ei rwydwaith cyflym i gwsmeriaid ac mae wedi ymrwymo i ddarparu seilwaith cysylltedd dibynadwy a fydd yn gwasanaethu cymunedau yn y ffordd orau am flynyddoedd i ddod.

Os hoffech gael rhagor o wybodaeth am wasanaethau band eang yn eich ardal, cysylltwch â'ch Hyrwyddwr Digidol lleol.