Mynediad am ddim i Gastell Ystumllwynarth ddydd Sadwrn
Bydd un o dirnodau hanesyddol mwyaf gwerthfawr Abertawe, Castell Ystumllwynarth, yn agor ei ddrysau am ddim i ymwelwyr ddydd Sadwrn, 13 Medi, fel rhan o fenter ledled y wlad i ddathlu treftadaeth bensaernïol a diwylliannol gyfoethog Cymru.
Mae'r digwyddiad yn rhan o raglen Drysau Agored Cadw, ymgyrch a arweinir gan Lywodraeth Cymru sy'n annog preswylwyr ac ymwelwyr fel ei gilydd i ddarganfod y straeon y tu ôl i adeiladau mwyaf eiconig y wlad.
Bydd Castell Ystumllwynarth, sydd yng nghanol y Mwmbwls, yn croesawu ymwelwyr rhwng 11am a 5pm, gan eu gwahodd i archwilio hanes y castell a adeiladwyd canrifoedd yn ôl, edmygu ei ddyluniad trawiadol a darganfod straeon hynod ddiddorol am y safle hynafol hwn.
Cyflwynir y diwrnod gan Gyfeillion Castell Ystumllwynarth arobryn, sy'n rheoli'r safle, mewn partneriaeth â Chyngor Abertawe. Eu nod yw dod ag etifeddiaeth y castell yn fyw mewn ffordd ddiddorol a chynnwys y gymuned.
Meddai'r Cynghorydd Elliot King, Aelod Cabinet Cyngor Abertawe dros Ddiwylliant, Hawliau Dynol a Chydraddoldeb, "Mae digwyddiad dydd Sadwrn yn gyfle gwych i bobl o Abertawe a thu hwnt brofi popeth y mae gan yr atyniad arbennig hwn i'w gynnig, yn rhad ac am ddim.
Mae'n gyfle i gysylltu â'n treftadaeth ar y cyd a mwynhau un o dirnodau mwyaf eiconig y rhanbarth mewn lleoliad bythgofiadwy. Gall ymwelwyr ddisgwyl croeso cynnes a chyfle i ymgolli yng ngorffennol hynod ddiddorol y castell, o waith cerrig canoloesol a golygfeydd panoramig o'r Mwmbwls, i chwedlau lleol."
Am ragor o wybodaeth, ewch i www.croesobaeabertawe.com/listing/castell-ystumllwynarth/49188102/
Rhannu'r dudalen hon
Argraffu
