Yn dod yn fuan: Gwelliannau i ardal boblogaidd ym Mharc Singleton

Mae'r Cyngor yn bwriadu gwella'r llyn cychod a chyflwyno ystod o welliannau eraill. 
Disgwylir i waith ddechrau'r mis hwn a fydd yn cymryd sawl wythnos, ond bydd yr ardal yn aros ar agor i bawb yn ystod y cyfnod hwn.
Meddai Aelod Cabinet y Cyngor, Robert Francis-Davies, "Mae preswylwyr ac ymwelwyr yn dwlu ar ein parciau - ac mae'r llyn cychod yn ffefryn mawr.
"Rydym wedi gwella'r cwrs golff gwallgof yno'n ddiweddar ac rydym yn bwriadu cyflwyno pedwar dinosor model enfawr ynghyd â phedalos newydd. Diweddarom yr ardal chwarae yn 2021.
"Canlyniad ein gwaith dros yr wythnosau sy'n dod fydd llyn glanach ar gyfer bywyd gwyllt a hamdden, dŵr dyfnach ar gyfer cychod a mwy o gyfleoedd ar gyfer addysg." 
Bydd gwelliannau i'r llyn cychod dros yr wythnosau sy'n dod yn cynnwys cael gwared ar silt, llaid a deunyddiau eraill sydd wedi cronni yn y llyn dros amser, creu ardal addysg awyr agored a gosod tri bwrdd gwybodaeth bywyd gwyllt.
Sefydlir yr ardal ddysgu ger ardal lanio'r llyn. Bydd grwpiau'n gallu eistedd a dysgu yno.
Caiff y byrddau gwybodaeth eu gosod o gwmpas y llyn i arddangos manylion bywyd gwyllt lleol, hybu addysg ac ennyn diddordeb ymwelwyr sy'n ymddiddori mewn natur.
Daw cyllid am y gwaith newydd o Gronfa Ffyniant Gyffredin Llywodraeth y DU a grant Lleoedd Lleol ar gyfer Natur Llywodraeth Cymru.
 
Llun: Llyn Cychod Parc Singleton.