Mae Ysbrydion yn y Ddinas yn dychwelyd ar gyfer 2025

Yn ogystal â'n hardal ddigwyddiadau sy'n addas i deuluoedd yn St David's Place, bydd ardal newydd sydd wedi'i chynllunio i ddychryn a chyffroi yn cael ei chyflwyno eleni ym Mharc Amy Dillwyn ym Mae Copr.

Paratowch am ddigwyddiad Ysbrydion yn y Ddinas: Angenfilod Afreolus, gyda chefnogaeth Cynnig Gofal Plant Cymru, a dewch i gwrdd â phob math o greaduriaid yn y ddwy ardal rhwng 3pm ac 8pm.

Mae St David's Place yn berffaith ar gyfer teuluoedd - mae'r ardal fywiog hon yn cynnwys prif lwyfan sy'n llawn adloniant i blant gyda chefnogaeth Dechrau'n Deg, gemau, cerddoriaeth, cystadleuaeth gwisg ffansi a pherfformiadau gan ddiddanwyr proffesiynol. Ond cofiwch - bydd creaduriaid yn crwydro'r sgwâr, yn barod i ddychryn a diddanu gwesteion iau.

Ar draws y bont fygythiol mae parc Amy Dillwyn - ydych chi'n ddigon dewr i fentro i'r ardal newydd hon? Mae'r ardal hon yn llawn creaduriaid brawychus a phethau dychrynllyd a all eich atal rhag cysgu.

Dilynwch lwybr lluniau'r Angenfilod Afreolus sy'n cysylltu'r ddwy ardal i ddarganfod yr wyth bwystfil i gymryd rhan yn y gystadleuaeth. Cadwch lygad am greaduriaid enfawr ar yr adeiladau, tafluniadau brawychus ac arswydion ym mhobman. Gall y rhai sy'n dwlu ar wisg ffansi gymryd rhan yn ein cystadleuaeth gwisg ffansi - mae gwobrau i'w hennill ac mae gennym gategorïau i blant ac oedolion!

Meddai'r Cyng. Rob Stewart, Arweinydd Cyngor Abertawe, "Ysbrydion yn y Ddinas yw uchafbwynt ein calendr blynyddol, ac eleni rydym yn falch o gynnig profiad newydd i'n gwesteion hŷn. Mae un ardal i deuluoedd ac un arall i'r rhai sy'n chwilio am wefr, felly bydd digon o chwerthin a sgrechian yn atseinio drwy strydoedd Abertawe.

"Rydyn ni bob amser yn chwilio am ffyrdd newydd o wella'r hyn sydd gan y ddinas i'w gynnig, ac mae digwyddiad eleni yn enghraifft berffaith o hynny."

Mae Ysbrydion yn y Ddinas: Angenfilod Afreolus AM DDIM ac fe'i cynhelir ddydd Sadwrn 25 Hydref rhwng 3pm ac 8pm yn St David's Place a Pharc Amy Dillwyn, Abertawe.

I gael rhagor o wybodaeth, ewch i www.croesobaeabertawe.com/ysbrydion/