Gwaith ailwampio'n helpu i roi bywyd newydd i'r Bwthyn Swistirol

Mae rhai darnau pren newydd wedi'u gosod yn lle'r hen rai, mae gwaith sandio wedi'i wneud ac mae'r adeilad wedi cael ei ailbaentio i helpu i'w adfer i fel yr oedd yn ei ddyddiau gorau.

Lesddeiliad y Bwthyn Swistirol, Michael Border, drefnodd i'r gwaith gael ei wneud, diolch i gyllid gan Gyngor Abertawe drwy Gronfa Ffyniant Gyffredin Llywodraeth y DU.

Mae'r cyllid hwn hefyd yn galluogi astudiaeth ddichonoldeb sydd, gyda chymorth pensaer a thîm ymgynghoriaeth, yn archwilio sut y bydd modd defnyddio'r adeilad eto yn y dyfodol wrth gynnal ei dreftadaeth.

Yn amodol ar ganiatâd cynllunio, bydd syniadau ar gyfer y Bwthyn Swistirol y cynnwys creu lle am gaffi a fydd yn gwerthu diodydd a bwyd yn ogystal ag ardal i fyny'r grisiau ar gyfer gweithdai gwell iechyd.

Os bydd y cynlluniau'n mynd yn eu blaenau, byddai pobl ifanc nad ydynt mewn addysg neu gyflogaeth yn cael y cyfle i weithio yn y Bwthyn Swistirol fel rhan o gynllun i roi hwb i'w hyder a'u sgiliau.

Mae Mr Border hefyd yn archwilio ffynonellau ariannu eraill i helpu i dalu am gostau adnewyddu'r tu mewn i'r adeilad, gan greu man eistedd awyr agored ac ailsefydlu estyniad cefn yr adeilad.

Meddai Mr Border, "Mae gen i deulu yn Abertawe, felly rwyf wedi bod yn teithio yn ôl ac ymlaen i'r ddinas ers blynyddoedd.

"Mae gen i atgofion melys o'r Bwthyn Swistirol o'm hymweliadau a Pharc Singleton fel plentyn, felly mae'r cyfle i helpu i'w adfer er mwyn ei ailddefnyddio eto yn un rhy dda i'w golli. 

"Ar ôl siarad â llawer o ymwelwyr â'r parc am ein syniadau, gwyddwn fod llawer o gefnogaeth gan fod pobl eisiau rhywle lle gallant eistedd i lawr yn gyfforddus a chael coffi a thafell o deisen.

"Does dim byd yn gydnaws ag ef ym Mharc Singleton, a bydd yr holl waith rydym yn ei wneud yn cyd-fynd â hanes a threftadaeth yr adeilad."

Meddai'r Cyng. Robert Francis-Davies, Aelod Cabinet Cyngor Abertawe dros Fuddsoddi, Adfywio a Thwristiaeth, "Mae'r Bwthyn Swistirol yn dirnod ac yn fan cyfarfod i bobl sy'n ymweld â Pharc Singleton, ond roedd angen ei dacluso yn y blynyddoedd diweddar i wella'i olwg.

"Diolch i'n grant drwy Gronfa Ffyniant Gyffredin Llywodraeth y DU, rydym wrth ein bodd bod y gwaith hwn bellach wedi digwydd wrth i astudiaeth ddichonoldeb sy'n edrych ar syniadau i ddefnyddio'r Bwthyn Swistirol eto barhau.

"Mae'r Bwthyn Swistirol a adeiladwyd yn y 19eg ganrif yn un o nifer o adeiladau hanesyddol ar draws Abertawe sy'n elwa o fuddsoddiad tebyg.

"Mae hyn yn rhan o'n hymrwymiad i ddathlu a chadw treftadaeth Abertawe wrth roi hwb i gymunedau ledled y ddinas."

Mae adeiladau hanesyddol eraill a fydd yn elwa'n cynnwys Castell Ystumllwynarth, yr Eglwys Undodaidd ar y Stryd Fawr yng nghanol y ddinas ac Eglwys y Bedyddwyr York Place.