Abertawe'n dod ynghyd i gefnogi'r rheini mewn angen y Nadolig hwn

Ddydd Mawrth, bydd JR Events and Catering, gyda chefnogaeth Cyngor Abertawe, yn agor drysau Neuadd Brangwyn i weini cinio Nadolig dau gwrs am ddim i bobl sy'n agored i niwed, sy'n teimlo'n unig neu sy'n ddigartref yn Abertawe.

Cynhelir y digwyddiad Gyda'n Gilydd dros y Nadolig rhwng canol dydd a 3pm, a bydd cynrychiolwyr o amrywiaeth o wasanaethau ac elusennau'n darparu gwybodaeth am gymorth sydd ar gael ar y diwrnod.

Trefnir banc bwyd dros dro hefyd a gofynnir i bobl ddanfon rhoddion fel eitemau nad ydynt yn ddarfodus i Neuadd Brangwyn o 9am ddydd Mawrth.

Bydd Bwrdd Iechyd Prifysgol Bae Abertawe yn cynnig brechiadau'r ffliw a COVID a bydd staff o siop trin gwallt It's Science yn Abertawe yno yn torri gwallt am ddim.

Ymysg y gweithgareddau niferus ar y diwrnod, bydd swyddogion y cyngor yn bresennol i gynnig cyngor ar dai, cyflogadwyedd a hawliau lles a bydd y tîm Safonau Masnach yn dosbarthu eitemau ffug o ddillad a waharddwyd gyda'r labeli a'r brandiau wedi'u tynnu.

Cynhelir Gyda'n gilydd dros y Nadolig wrth i fwy o gefnogaeth nag erioed o'r blaen fod ar gael yn Abertawe i helpu pobl ddigartref neu unrhyw un sydd mewn perygl o fod yn ddigartref yn ystod misoedd y gaeaf.

Mae Cyngor Abertawe'n parhau i weithio'n agos iawn gyda'i bartneriaid i sicrhau nad oes unrhyw un sydd angen neu sydd eisiau gwely neu lety yn Abertawe yn mynd hebddynt y gaeaf hwn.

Meddai Arweinydd Cyngor Abertawe, Rob Stewart, "Yn anffodus, yn ystod yr argyfwng costau byw bydd mwy o bobl nag erioed yn ei chael hi'n anodd y gaeaf hwn ac rwy'n falch iawn bod gennym gynifer o bobl yn Abertawe sy'n gweithio'n ddiflino i gefnogi'r rheini mewn angen."

I wirfoddoli, i gael rhagor o wybodaeth,  neu i ddarparu gwasanaeth, adloniant neu gyfraniad, cysylltwch â Shannon Williams drwy e-bostio  events@jr-eventsandctering.co.uk, neu ffoniwch 01792 446017.