£156m o fuddsoddiad arfaethedig i hybu swyddi, ysgolion a chymunedau
Mae degau ar filiynau o bunnoedd yn cael eu buddsoddi mewn ysgolion, cartrefi, cymunedau'r ddinas a phrosiectau pwysig yn y flwyddyn sy'n dod gan gynnwys Gerddi Sgwâr y Castell, 71/72 Ffordd y Brenin ac amddiffynfeydd ar gyfer y Mwmbwls.
Bydd prosiect ardaloedd chwarae hynod boblogaidd y cyngor yn cael hwb o £2m fel y gall mwy fyth o gymdogaethau elwa o gynllun sydd eisoes wedi arwain at wella dros 40 o fannau hamdden i blant.
A gall preswylwyr hefyd ddisgwyl gweld £5m yn cael ei fuddsoddi mewn ffyrdd yn uniongyrchol a fydd hefyd yn cael cyfran o gronfa gwerth £7.8m sydd wedi'i rhoi o'r neilltu ar gyfer priffyrdd a gwelliannau cynnal a chadw ar gyfer ysgolion ac adeiladau eraill a weithredir gan y cyngor.
Amlinellwyd y gwariant mewn dau adroddiad a gymeradwywyd gan y Cabinet ar 16 Chwefror, a oedd yn amlinellu cynlluniau ar gyfer gwariant cyfalaf gan y cyngor ar brosiectau mawr a gwelliannau i dai cyngor dros y pedair blynedd nesaf.
Bydd y cynigion yn mynd gerbron y cyngor llawn yn awr ar 2 Mawrth am benderfyniad.
Mae gwaith newydd ddechrau ar amddiffynfeydd môr y Mwmbwls, disgwylir i waith ar 71/72 Ffordd y Brenin gael ei gwblhau eleni, ac mae caniatâd cynllunio newydd gael ei roi i drawsnewid Gerddi Sgwâr y Castell fel y gall gwaith gychwyn yn nes ymlaen eleni.
Meddai Rob Stewart, Arweinydd y Cyngor, "Drwy gydol holl heriau'r pandemig a'r argyfwng costau byw, mae'r cyngor wedi bod yma i bobl Abertawe.
"Yn y misoedd sy'n dod, mae'r cyngor yn bwriadu buddsoddi £156m mewn prosiectau mawr a mentrau cymunedol fel y'i gilydd. Bwriedir i'r rhaglenni gwariant cyfalaf rydym wedi'u nodi sicrhau bod pob cymuned yn parhau i gael ei chefnogi, bod swyddi'n cael eu diogelu a'u creu a bod Abertawe yn y cyflwr gorau y gall fod ar gyfer y blynyddoedd i ddod."
Roedd prif adroddiad y Gyllideb Gyfalaf a welwyd gan y Cabinet ar 16 Chwefror wedi nodi tua £133m o wariant cyfalaf ar brosiectau mawr yn y flwyddyn sy'n dod.
Yn ogystal â hyn, mae'r cyngor yn ddiweddar wedi sicrhau £18.8m o gyllid codi'r gwastad ar gyfer gwelliannau pellach i Gwm Tawe Isaf, gan gynnwys gwaith Copr yr Hafod-Morfa.
Bydd cronfa gwella ardaloedd chwarae gwerth £5m y cyngor yn derbyn hwb o £7m a disgwylir i £2m ychwanegol gael ei ychwanegu at y gyllideb gyfalaf yn y misoedd sy'n dod.
Mae adroddiad ar wahân am y gyllideb gyfalaf ynghylch rhestrau tai cyngor yn rhestru bron £51m o wariant, gan gynnwys mwy nag £11m ar adeiladu cartrefi newydd, £2.6m ar geginau ac ystafelloedd ymolchi newydd i denantiaid a £6.7m ar welliannau amgylcheddol - y telir am y cyfan ohonynt drwy gyfraniadau a grantiau'r refeniw tai ac nid o dreth y cyngor.