Prif ffordd yn Abertawe yn barod am waith gwella

Mae Cyngor Abertawe'n bwriadu ailwynebu bron i gilomedr (900m) o'r ffordd, y nodwyd ei bod mewn cyflwr gwael.

Caiff y gwelliannau ar hyd Cecil Road yn Nhre-gŵyr eu cwblhau fel rhan o waith cynnal a chadw arfaethedig parhaus y cyngor ar gyfer priffyrdd yn y ddinas.

Ar hyn o bryd mae'r timau cynnal a chadw priffyrdd yn gweithio i wella Townhill Road gan osod arwyneb newydd ar 600m o'r ffordd.

Mae'r ddau gynllun yn ffurfio rhan o fuddsoddiad y cyngor gwerth miliynau o bunnoedd i wella ffyrdd ac mae hefyd yn cynnwys y rhaglen atgyweirio PATCH ar draws y ddinas, yn ogystal â'r cynllun atgyweirio tyllau yn y ffordd 48 awr llwyddiannus.

Meddai Andrew Stevens, Aelod y Cabinet dros yr Amgylchedd ac Isadeiledd, "Nodwyd bod angen gwelliannau ar Cecil Road trwy ein harchwiliadau priffyrdd rheolaidd.

"Bydd ein timau cynnal a chadw'n symud i'r ffordd yn ystod y dyddiau nesaf i gwblhau'r gwaith."

Bydd rhan o'r rhaglen yn cynnwys cael gwared ar fesurau tawelu traffig presennol er mwyn cwblhau'r gwaith ailwynebu.

Mae'r ffordd wedi elwa o arian Llwybrau Diogel mewn Cymunedau yn flaenorol er mwyn helpu i greu amgylchedd mwy diogel yn agos at ysgolion lleol.

Ychwanegodd y Cynghorydd Stevens, "Unwaith y bydd y gwaith ailwynebu wedi'i gwblhau ar hyd Cecil Road, bydd ein tîm rheoli traffig yn cynnal arolygon cyflymder rheolaidd. Bydd canlyniadau'r arolygon yn darparu gwybodaeth i wneud penderfyniad pellach ynghylch a fydd rhai o'r mesurau tawelu traffig neu bob un ohonynt yn cael eu hailosod."

Mae timau priffyrdd hefyd ar daith yn llenwi tyllau yn y ffordd sy'n effeithio ar nifer o rannau o'r wlad o ganlyniad i dywydd oer a gwlyb dros gyfnod y gaeaf.

Yn ystod pythefnos cyntaf mis Ionawr roedd y timau cynnal a chadw wedi llenwi dros 750 o dyllau yn y ffordd yr adroddwyd amdanynt i'r cyngor gan y cyhoedd.

Meddai'r Cynghorydd Stevens, "Mae ein hymateb i dyllau yn y ffordd yr adroddir amdanynt yn rhywbeth rydw i'n falch iawn ohono. Fel nifer o ddinasoedd a threfi ar draws y wlad, mae ein ffyrdd wedi dioddef ond rydym wedi cadw at ein haddewid o atgyweirio tyllau yn y ffordd o fewn 48 awr. Mae'r timau wedi bod yn brysur iawn yn sicrhau bod ein ffyrdd yn ddiogel."