Cefnogaeth Cyngor Abertawe ar gyfer y diwydiant twristiaeth yn parhau

Mae busnesau llety ymwelwyr bach yn ffynnu yn Abertawe, o ganlyniad i don newydd o gyllid o Gronfa Ffyniant Gyffredin Llywodraeth y DU, gan gadarnhau enw Abertawe ymhellach fel cyrchfan i dwristiaid sydd ymysg y goreuon.

Mae cyfanswm o 12 o fusnesau wedi llwyddo i sicrhau cyllid i wella'u cyfleusterau gyda grantiau o hyd at £10,000. Mae rhai o'r prosiectau a gyflwynwyd yn y rownd hon yn cynnwys adnewyddu ystafelloedd gwely ac ystafelloedd ymolchi, gwell hygyrchedd, mannau storio cyfarpar beicio a chwaraeon dŵr, pwyntiau gwefru cerbydau trydan a phaneli solar.

Mewn ymateb i adborth gan y diwydiant, aeth Cyngor Abertawe ati'n rhagweithiol i sefydlu'r gronfa hon i ddarparu grantiau a chefnogaeth farchnata, gan rymuso gweithredwyr lleol i wella'u cynigion.

Roedd Samantha Birdsell, sy'n rhedeg Fferm Pitton Cross yn Rhosili, wedi defnyddio'r arian grant ar gyfer prosiect mawr i addasu sawl tŷ allan yn ysguboriau gwyliau o safon sy'n croesawu cŵn.

Meddai, "Bydd gallu cynnig unedau llai yn denu marchnadoedd newydd i'r fferm gan wneud y busnes yn fwy dichonadwy drwy'r flwyddyn gron."

Meddai Geraint Higgins, perchennog Cwrt-y-Wennol yng Nghlydach, sydd hefyd wedi sicrhau arian grant, "Mae ein lleoliad yn ddelfrydol ar gyfer cymryd rhan mewn gweithgareddau awyr agored fel cerdded, beicio a phadlfyrddio. Roedd y grant hwn wedi caniatáu i ni greu lle diogel lle gall gwesteion sychu a storio eu cyfarpar beicio neu chwaraeon dŵr. Bydd y cyfleuster newydd yn gwneud gwahaniaeth mawr i brofiadau cyffredinol ymwelwyr."

Yn ogystal â'r cymorth grant, mae'r Cyngor yn parhau i gynnig marchnata am ddim i fusnesau twristiaeth a lletygarwch lleol. Mae dros 250 o bartneriaid eisoes wedi manteisio ar yr ymgyrchoedd marchnata a gynhelir drwy gydol y flwyddyn i ddenu ymwelwyr i'r ardal.

Ym mis Chwefror, bydd tîm twristiaeth y Cyngor yn cynnal digwyddiad busnes i arddangos sut y gall gwefan croesobaeabertawe.com ar ei newydd wedd helpu busnesau i wella'u cynigion ymhellach a denu cynulleidfa ehangach.

Hefyd yr wythnos hon lansiwyd Cystadleuaeth Fawr Abertawe, gyda gwobr wych yn cael ei chyhoeddi bob dydd yn y cyfnod sy'n arwain at y Nadolig.

Mae busnesau a lleoliadau lleol wedi dangos cryn gefnogaeth ac wedi cynnig gwobrau gwych, gan gynnwys tocynnau teulu i noson agoriadol y pantomeim yn Theatr y Grand Abertawe, Profiad Cwrdd â'r Anifeiliaid Plantasia a basged Blas ar Abertawe o Farchnad Abertawe, arosiadau dros nos mewn gwestai lleol a mwy.

Cadwch lygad ar sianeli cyfryngau cymdeithasol Joio Bae Abertawe drwy gydol mis Rhagfyr i gael rhagor o wybodaeth.

Meddai'r Cyng. Robert Francis-Davies, Aelod Cabinet Cyngor Abertawe dros Fuddsoddi, Adfywio, Digwyddiadau a Thwristiaeth, "Mae'r Nadolig yn amser ar gyfer y gymuned, haelioni a llawenydd ac mae'r gystadleuaeth anhygoel hon yn arddangos calon ac enaid Abertawe. Mae ein busnesau lleol wedi dod ynghyd yng ngwir ysbryd y tymor i roi gwên ar wynebau teuluoedd ar draws ein dinas."

"Hoffem ddiolch i bawb sydd wedi cynnig gwobrau ar gyfer ein Cystadleuaeth Nadolig ac edrychwn ymlaen at barhau i weithio gyda chi yn 2025."