Preswylwyr yn manteisio i'r eithaf ar wasanaeth ailgylchu newydd sy'n cael ei dreialu yn Abertawe

Mae Cyngor Abertawe wedi bod yn treialu cynllun ailgylchu ymyl y ffordd mewn oddeutu 20,000 o gartrefi yn ddiweddar, gan alluogi aelwydydd i ailgylchu plastigion meddal fel pecynnau creision a bagiau bwyd.

Ar hyn o bryd, os yw preswylwyr am ailgylchu eitemau plastig meddal, yr unig ddewis sydd ganddynt yw mynd â nhw i'w harchfarchnad leol, lle darperir cyfleusterau ailgylchu fel arfer.

Dechreuodd y treial yn Abertawe ym mis Ebrill, mewn 15 o gymunedau y mae eu gwastraff cartref yn cael ei gasglu ar ddydd Mawrth a dydd Mercher. Cynhelir y treial tan fis Rhagfyr 2025.

Hyd yn hyn, amcangyfrifir bod mwy na pum tunnell o blastigion meddal wedi'u casglu o gartrefi yn yr ardaloedd treialu.

Meddai Cyril Anderson, Aelod y Cabinet dros Gymunedau, "Ar hyn o bryd, mae Abertawe'n perfformio'n dda iawn o ran ailgylchu, ac mae'r rhan fwyaf o breswylwyr yn defnyddio'r holl wasanaethau ailgylchu ymyl y ffordd, yn ogystal â rhoi niferoedd cyfyngedig o sachau du allan i'w casglu.

"Rydym yn gwybod bod awydd i breswylwyr ailgylchu mwy o'u gwastraff cartref, yn enwedig eitemau plastig meddal fel bagiau siopa - sydd ar hyn o bryd yn cael eu rhoi mewn gwastraff sachau du.

"Bydd y treial yn caniatáu i'r cyngor ddeall sut y gellir cynnwys bagiau a deunydd lapio plastig yng nghasgliadau ailgylchu ymyl y ffordd yr holl aelwydydd yn y dyfodol.

"Mae arwyddion cynnar wedi dangos bod llawer o breswylwyr yn yr ardaloedd treialu yn manteisio i'r eithaf ar y gwasanaeth ac yn ailgylchu plastigion meddal gan ddefnyddio'r sachau glas newydd."

Mae rhagor o wybodaeth am y treial ar gael yma: https://www.abertawe.gov.uk/plastigionmeddal