Taflwyr sbwriel yn cael eu beio am lenwi ymylon ffyrdd â sbwriel
Mae'n bosib y bydd gyrwyr sy'n defnyddio nifer o ffyrdd prysur a ffyrdd deuol yn wynebu trefniadau cau ffyrdd yn ystod yr wythnosau nesaf, diolch i'r bobl ddifater hynny sy'n meddwl ei bod yn dderbyniol taflu sbwriel ar ymylon ffyrdd.
Mae'r timau priffyrdd yn cymryd camau i glirio sbwriel y penwythnos hwn ar yr A484 rhwng Garngoch a Chadle, gyda mwy i ddod yn yr wythnosau nesaf.
Meddai Cyril Anderson, Aelod y Cabinet dros Wasanaethau Cymunedol, "Pe na bai pobl yn taflu sbwriel allan o ffenestri ceir ar ein ffyrdd a'n ffyrdd deuol neu dipio'n anghyfreithlon ar ymylon ffyrdd, ni fyddai angen clirio'r gwastraff.
"Ond mae angen i ni gymryd camau gweithredu gan ei fod yn edrych yn flêr a hefyd oherwydd y peryglon posib i fywyd gwyllt a all fod yn byw ar ymylon y ffyrdd."
Mae gwaith eisoes wedi'i wneud i lanhau sbwriel o'r A484 rhwng Casllwchwr a Garngoch. Dros y ddau benwythnos nesaf bydd y gwastraff sydd ar hyd y rhan sy'n weddill o Garngoch i Gadle a'r A483 o Gadle i Benllergaer hefyd yn cael ei glirio.
Yn dilyn ymlaen o hynny, bydd gwaith yn cael ei wneud ar yr A4067 o Ynysforgan i Gwm Lefel gyda gweithgarwch pellach yn yr wythnosau sy'n dilyn.
Dewis iaith
Rhannu'r dudalen hon
Argraffu
