Disgwylir i Ddyfnant gael dwy ardal gymunedol wedi'u huwchraddio

Mae Parc Dyfnant yn destun gwaith trawsnewid a fydd yn cynnwys unedau aml-chwarae, siglenni sy'n cydymffurfio â safonau anabledd a rowndabowts, trampolîn ac arwyneb diogelwch rwber newydd ac mae Dôl Dyfnant yn cael dwy set o siglenni dwbl ac arwyneb newydd hefyd.

Cronfa Adfywio Economaidd arloesol Cyngor Abertawe sy'n talu am y prosiectau, sydd eisoes wedi ariannu gwaith uwchraddio ar gyfer bron i 50 o ardaloedd chwarae ar draws y ddinas yn ystod y flwyddyn ddiwethaf, gyda rhagor i ddod. Mae aelodau wardiau lleol hefyd wedi cefnogi trwy gyfrannu o gyllidebau cymunedol.

Mae'r gwaith uwchraddio yn dilyn cwblhau dwy ardal chwarae yn West Cross a Phontarddulais, ochr yn ochr â chynlluniau i ddechrau gwaith mewn saith safle arall ac mae cynigion ar gyfer 18 yn rhagor ar y gweill.

Dywedodd Robert Francis-Davies, Aelod y Cabinet dros Fuddsoddi, Adfywio a Thwristiaeth, y dylai'r gwaith yn Nyfnant ddechrau yn yr wythnosau nesaf ac addawodd y byddai lleoliadau eraill o gwmpas y ddinas y mae angen gwaith uwchraddio arnynt yn cael sylw hefyd.

Meddai, "Abertawe yw'r unig gyngor yng Nghymru sydd wedi addo uwchraddio pob ardal chwarae sy'n eiddo i'r cyngor. Dechreuwyd ar y gwaith ar ddechrau'r pandemig a bellach, tua blwyddyn yn ddiweddarach, mae 45 wedi'u cwblhau gyda rhagor ar y gweill yn y misoedd sydd i ddod."

Mae ardaloedd chwarae newydd neu sydd wedi'u gwella yn cynnwys cyfarpar a ddewiswyd mewn cydweithrediad â chymunedau lleol. Mae'r cyfleusterau'n amrywio o siglenni, llithrennau a rowndabowts traddodiadol i drampolinau, gwifrau gwib a fframiau dringo. Mae cyfarpar hefyd wedi'u cyflwyno ar gyfer plant ag anableddau.

Meddai Andrew Stevens, Aelod y Cabinet dros yr Amgylchedd ac Isadeiledd, "Dangosodd y pandemig pa mor bwysig oedd ardaloedd chwarae awyr agored am ddim i les ein plant a'n pobl ifanc.

"Yn ystod yr argyfwng, daethant yn un o'r ychydig fannau lle gallai plant gadw'n heini'n ddiogel a lle gallai ffrindiau a theuluoedd weld ei gilydd am sgwrs gan gadw pellter cymdeithasol.

"Hyd yn hyn rydym wedi ymrwymo £5 miliwn o bunnoedd i'n cronfa ardaloedd chwarae ac mae cymunedau o Graig-cefn-parc i Gasllwchwr a Melin Mynach wedi gweld y manteision."

Mae'r cymunedau hynny sydd eisoes wedi derbyn ardaloedd chwarae newydd neu well yn cynnwys Mayhill, Uplands, Llansamlet, Gorseinon, Gelli Aur, Heol Frank, Parc Ravenhill, Weig Fawr a Pharc Cwmbwrla.

I gael rhagor o wybodaeth, ewch i: https://www.abertawe.gov.uk/lleoeddchwaraenewydd