Ardal chwarae'n cael ei agor yn swyddogol - mewn pryd ar gyfer yr haf

Mae'r ardal chwarae newydd ar Myrtle Road yn rhan o raglen arloesol Cyngor Abertawe gwerth £8m i agor ardaloedd chwarae awyr agored newydd neu well ar gyfer pob cymdogaeth.

Hyd yn hyn mae mwy na 60 o ardaloedd chwarae wedi'u huwchraddio ac agorwyd yr un ym Mhentre'r Ardd gan Arweinydd y Cyngor, Rob Stewart.

Mae'r safle newydd yn cynnwys offer cyffrous fel siglenni, trampolîn, rowndabowt siglo, si-so, ardaloedd glanio meddal, polyn totem synhwyraidd a hyd yn oed panel chwarae chwilotwr pwll.

Meddai'r Cyng. Andrew Stevens, Aelod y Cabinet dros yr Amgylchedd ac Isadeiledd,
"Rydym wedi gorffen y gwaith uwchraddio ar fwy na 60 o ardaloedd chwarae cymunedol ers i ni ddechrau'r prosiect hwn, ac nid ydym yn rhoi stop ar hyn eto.

"Mae teuluoedd a phlant wrth eu boddau â'r mannau newydd hyn, a byddwn yn rhoi'r diweddaraf i bawb wrth i ragor o barciau gael eu gwella."

Meddai'r Cyng. Robert Francis-Davies, Aelod y Cabinet dros Fuddsoddi, Adfywio a Thwristiaeth, "Mae arbenigwyr yn cytuno bod chwarae awyr agored yn bwysig iawn i blant. Mae'n eu helpu i gadw'n iach, gwneud ffrindiau, a chael hwyl.

"Mae'r ardaloedd chwarae am ddim hyn hefyd yn help mawr i deuluoedd yn ystod yr argyfwng costau byw. Rydym yn falch o gefnogi lles ym mhob rhan o Abertawe."

Ychwanegodd y Cyng. Francis-Davies, "Mae maint ein huchelgais i wella ardaloedd chwarae'n unigryw yn y DU ac rydym hefyd yn buddsoddi tua £3m mewn cenhedlaeth newydd o barciau sglefrio, traciau beicio, a chaeau chwaraeon ar draws y ddinas.

"Dyma'r buddsoddiad mwyaf rydym wedi'i wneud erioed mewn chwarae awyr agored, ac mae'n rhywbeth y dywedodd pobl leol wrthym eu bod wir arnynt ei eisiau."

Gellir defnyddio ardal chwarae newydd Pentre'r Ardd am ddim ac mae'n agored i bawb. Mae'n lle gwych i blant chwarae, archwilio a mwynhau'r awyr agored gyda'u ffrindiau a'u teuluoedd.