Pawb yn ennill fel rhan o'r loteri genedlaethol newydd

Mae Cyngor Gwasanaeth Gwirfoddol Abertawe yn cynnal Lotto Abertawe er mwyn codi arian mawr ei angen ar gyfer mwy na 60 o grwpiau a sefydliadau cymunedol ar draws y ddinas.

Gall y rhai sy'n cymryd rhan yn y loteri ddewis pa elusen leol y mae eu cyfraniad yn ei chefnogi.

Meddai Alyson Anthony, Aelod Cabinet Cyngor Abertawe dros Gefnogi Cymunedau, "Mae prosiect y loteri wedi bod ar waith ers ychydig dros fis erbyn hyn ac mae llawer o bobl eisoes wedi cofrestru i gymryd rhan.

"Mae'r rhai sy'n cymryd rhan yn gwybod hyd yn oed ar yr achlysuron hynny pan nad ydynt yn ennill, bydd rhan o bris eu tocynnau yn mynd tuag at ariannu elusennau a grwpiau lleol pwysig sy'n gwneud pethau gwych yn ein cymunedau.

"Da iawn i CGGA am greu ffordd ddifyr, arloesol o gefnogi achosion da."

Dywedodd y Cynghorydd Anthony fod y loteri yn adlewyrchu uchelgais y Cyngor i weithio gyda grwpiau a sefydliadau ledled Abertawe i ddatblygu rhwydweithiau sy'n cefnogi lles ac iechyd pobl a'u cefnogi drwy'r argyfwng costau byw.

Mae tocyn ar gyfer Lotto Abertawe yn costio £1 yr wythnos, gyda 60c yn mynd yn syth i achosion da, ac mae gwobrau ariannol o hyd at £25,000 i'w hennill bob wythnos.

Meddai Amanda Carr, Cyfarwyddwr CGGA, "Mae Lotto Abertawe yn ffordd wych o annog pobl i gefnogi eu cymunedau lleol.

"Mae busnesau lleol wedi bod yn awyddus i gynnig eu cefnogaeth hefyd a hoffem ddiolch iddynt am roi cyfanswm o 30 o wobrau lleol ar gyfer y Loteri Arbennig sydd ar ddod ar ddiwedd mis Awst."

Lotto Abertawe - Cefnogwch Achosion Da Lleol - Enillwch wobrau!

Ewch i: www.lottoabertawe.co.uk i chwarae, i gofrestru eich achos da neu i gael rhagor o wybodaeth.