Dyddiad cyflwyno cais wedi'i estyn ar gyfer cynigion i'r Gronfa Ffyniant Gyffredin

Mae'r dyddiad cau ar gyfer cyflwyno cais am yr arian, sy'n cael ei gynnig yn lleol gan Gyngor Abertawe fel rhan o Gronfa Ffyniant Gyffredin Llywodraeth y DU, bellach wedi'i estyn i ganol nos, nos Fercher 29 Mawrth.

I fod yn gymwys ar gyfer y cyllid galwad agored ehangach cyffredinol gwerth £8m, mae'n rhaid i ymgeiswyr sicrhau bod eu cynlluniau arfaethedig yn cyd-fynd â themâu allweddol y Cynllun Buddsoddi Rhanbarthol ar gyfer De-orllewin Cymru. Mae'r rhain yn cynnwys  gwella cymunedau trefol a gwledig, a chefnogi busnesau bach.

Yn ogystal â'r alwad agored gyffredinol, mae ceisiadau ar agor yn awr ar gyfer prosiectau sy'n ffurfio rhan o elfennau Sgiliau a Lluosi'r pecyn ariannu cyffredinol.

Mae'r cyllid gwerth £3m sy'n ymwneud â sgiliau yn arian ar gyfer prosiectau sy'n bwriadu cyflwyno hyfforddiant hanfodol, technegol a galwedigaethol wedi'i dargedu ynghyd â chefnogaeth ar gyfer ailhyfforddi a gwella sgiliau i oedolion 19+ oed yn unol â'r angen sgiliau lleol a blaenoriaethau economaidd rhanbarthol.

Y gofyniad craidd ar gyfer prosiectau sy'n gysylltiedig â'r thema Lluosi, gwerth £5.2m, yw cyflwyno cefnogaeth sgiliau rhifedd hyblyg i oedolion 19+ oed nad oes ganddynt gymhwyster Lefel 2 neu uwch mewn mathemateg.

Ni all ceisiadau am gyllid ddyblygu'r prosiectau angori canlynol y mae'r cyngor eisoes wedi'u cyhoeddi fel rhan o becyn ariannu cyffredinol, sy'n werth £38.4m i'r ddinas.

• Pecyn o gynlluniau i gefnogi busnesau Abertawe gan gynnwys grantiau dechrau busnes, grantiau twf, grantiau lleihau carbon, hyfforddiant i fusnesau symud tuag at ddod yn garbon sero net, a chronfa datblygu eiddo masnachol.
• Prosiect cyflogadwyedd llwybrau at waith a fydd yn cynnwys cymorth i bobl 16 oed ac yn hŷn sy'n anweithgar yn economaidd ac sydd wedi bod yn ddi-waith am amser hir, lleoliadau gwaith â thâl a galwad agored am gyllid grant gwerth £2m er mwyn darparu cymorth cyflogadwyedd arbenigol.
• Trawsnewid lleoedd ar draws y sir, gyda phrosiectau wedi'u clustnodi i gynnwys cyllid grant ar gyfer adeileddau hanesyddol, gwelliannau i bentrefi a chanol trefi bach, a gweithgareddau a llwybrau adfywio a arweinir gan dreftadaeth.
• Prosiect angori diwylliant a thwristiaeth a fydd yn cynnwys datblygu rhwydwaith creadigol, sgiliau digidol a chymorth i fusnesau yn y sector hwnnw.
• Prosiect cefnogi cymunedau a fydd yn darparu cyllid grant ar gyfer prosiectau cymunedol a phrosiectau'r trydydd sector.
• Rhoi hwb i ardaloedd gwledig drwy ddarparu cyllid ar gyfer datblygu cymunedol gwledig, gweithgareddau ar thema newid yn yr hinsawdd a chymorth i fusnesau gwledig.

Meddai'r Cyng. Robert Francis-Davies, Aelod Cabinet Cyngor Abertawe dros Adfywio, Buddsoddi a Thwristiaeth, "Rydym yn cael lefel galonogol iawn o ymatebion a diddordeb gan ymgeiswyr posib, ond mae adborth y sefydliadau hyn yn dangos bod angen mwy o amser arnynt i fireinio eu cynigion.

"I ddiwallu eu hanghenion, mae'r dyddiad cau ar gyfer cyflwyno cais bellach wedi'i estyn i ganol nos, nos Fercher 29 Mawrth a allai hefyd helpu i ddenu ymgeiswyr eraill."

Ewch i https://www.abertawe.gov.uk/gffg i gael rhagor o arweiniad, gwybodaeth gefndir, meini prawf ymgeisio a ffurflenni. Gall sefydliadau sy'n chwilio am ragor o wybodaeth a chymorth e-bostio  SPF@abertawe.gov.uk hefyd.