Disgyblion yn gweithio i agor siop mewn cynhwysydd cludo
Mae disgyblion yn Ysgol Gymunedol Dylan Thomas yn Abertawe'n gyfrifol am siop gymunedol newydd sydd wedi agor mewn cynhwysydd cludo ar dir yr ysgol.
Mae'r ysgol wedi ymuno â'r fenter Big Bocs Bwyd - rhwydwaith o siopau "talwch fel y mynnwch" sy'n dechrau agor mewn ysgolion ar draws Cymru.
Y syniad yw sicrhau bod bwyd iachus ar gael i deuluoedd ar gyllideb er mwyn helpu i fynd i'r afael â thlodi bwyd.
Mae hefyd yn darparu cyfleoedd dysgu i ddisgyblion ac yn cynyddu cyfranogaeth rhieni a gofalwyr yn yr ysgol mewn ffordd sy'n addas iddyn nhw.
Mae gan y siop hefyd ardal gaffi awyr agored ac mae'r cyfleuster cyfnewid gwisg unffurf hefyd wedi symud yno fel y gall rhieni brynu gwisg ysgol sydd wedi'i hailgylchu.