Y Cabinet yn cefnogi cynigion buddsoddi uchelgeisiol gwerth £400 miliwn mewn ysgolion

Byddai'r rhaglen yn cael ei hariannu'n helaeth gan Lywodraeth Cymru gyda chyfraniad ariannol lleol, gan gynnwys cyfraniadau gan ddatblygwyr a derbyniadau cyfalaf.

Mae Llywodraeth Cymru wedi gofyn i bob cyngor yng Nghymru gyflwyno'i syniadau ariannu a'i flaenoriaethau buddsoddi ar gyfer cyfleusterau ysgol dros y naw mlynedd nesaf.

Mae'r rownd newydd o fuddsoddiad yn nyfodol plant sy'n cael ei chynnig gan y Cyngor yn amodol ar gymorth ariannol a chymeradwyaeth gan Lywodraeth Cymru.

Bydd y rhaglen newydd yn adeiladu ar stori lwyddiant y degawd diwethaf, sydd wedi cynnwys saith ysgol newydd yn cael eu hadeiladu, gwaith uwchraddio mawr ar saith ysgol arall a thri phrosiect arall sy'n mynd rhagddo o hyd.

Mae cynigion Abertawe'n cynnig opsiynau i gynyddu nifer y plant sy'n cael eu haddysgu drwy gyfrwng y Gymraeg, ac yn cynnwys y Cyngor yn edrych ar greu ysgolion cynradd cyfrwng Cymraeg newydd neu well mewn pedair ardal, er mwyn sicrhau nad oes angen i ddisgyblion deithio'n rhy bell i fynd i'r ysgol.

Mae cynigion eisoes ar waith ar gyfer gwaith uwchraddio yn Ysgol Gyfun Gymraeg Bryn Tawe, a fydd yn gwella cyfleusterau ac yn cynyddu nifer y lleoedd yn yr ysgol gyfun cyfrwng Cymraeg.

Caiff y buddsoddiad ei flaenoriaethu ar gyfer yr ysgolion hynny a chanddynt yr anghenion cyflwr ac addasrwydd mwyaf, a gallai'r rhain gynnwys ysgolion cynradd Clydach, Dyfnant, Blaen-y-maes, Portmead, Brynhyfryd ac Ysgol Gynradd Gadeiriol San Joseff, yn ogystal ag YGG Bryn y Môr.

Bydd rhaglen cynnal a chadw ysgolion cyfalaf flynyddol y Cyngor yn parhau i leihau'r ôl-groniad o atgyweiriadau mewn ysgolion eraill.

Meddai Robert Smith, Aelod Cabinet Cyngor Abertawe dros Addysg a Dysgu, "Rydym am i'n pobl ifanc ddysgu mewn amgylchoedd modern a chroesawgar drwy barhau i uwchraddio'n hadeiladau ysgol fel rhan o'r rhaglen buddsoddi mewn ysgolion fwyaf a welwyd erioed yn Abertawe.

"Er ein bod eisoes wedi gwella cyfleusterau ysgol ar gyfer miloedd o ddisgyblion yn y blynyddoedd diwethaf, rydym eisiau sicrhau cymaint o fuddsoddiad pellach â phosib ar gyfer ysgolion yn Abertawe.

"Mae ein cynigion wedi blaenoriaethu cyflwr presennol cyfleusterau, addasrwydd a materion cynaladwyedd, yn ogystal â'n hymrwymiad i gynyddu nifer y disgyblion yn Abertawe sy'n dysgu drwy gyfrwng y Gymraeg."