Gweithiwr y cyngor Keith yn cael ei ganmol am ei ddewrder yn dilyn gwaith achub wedi'r ffrwydrad yn Nhreforys
Mae un o weithwyr y cyngor sef y person cyntaf i fynd i mewn i adfeilion tŷ i achub teulu ar ôl ffrwydrad dinistriol yn Nhreforys ddydd Llun, wedi'i ganmol am ei ddewrder.
Aeth Keith Morris drwy lwch trwchus a malurion i gyrraedd mam a oedd yn sownd yn y llanast gan ei thywys allan cyn ei helpu i gyrraedd achubwyr eraill.
Dychwelodd i'r adeilad adfeiliedig i chwilio am ei mab, a oedd mewn ystafell i fyny'r grisiau ond yn ffodus, roedd y bachgen wedi'i achub eisoes ac yn ddiogel diolch i eraill a oedd wedi'i gyrraedd o'r ochr.
Trodd y goruchwyliwr priffyrdd ei sylw wedyn i achub ci'r teulu ac ar ôl dod o hyd i'r anifail, agorodd y gawell trwy rym wrth i ddyn arall dynnu'r anifail allan ohoni.
Dywedodd Keith, sydd wedi gweithio mewn swyddi amrywiol yng Nghyngor Abertawe dros y 27 mlynedd diwethaf, ei fod yn gweithredu "ar awtobeilot", ond dywedodd Arweinydd y Cyngor Rob Stewart fod Mr Morris a phawb arall a fu'n rhan o'r gwaith achub ddydd Llun wedi dangos dewrder eithriadol.