Cyllid yn hanfodol yn ystod 'cyfnodau heriol', meddai elusen cymorth bwyd

Mae elusen Matthew's House ar y Stryd Fawr wedi derbyn help er mwyn darparu cyfarpar ar gyfer ei chegin ac wrth gynnal ei rhaglenni bwyd.

Mae rownd newydd o gyllid bellach ar gael fel rhan o becyn cymorth mwyaf erioed y Cyngor i helpu pobl ifanc, teuluoedd a phreswylwyr hŷn fel rhan o'r ymgyrch 'Yma i Chi y Gaeaf hwn'.

Mae bron £650,000 ar gael i gefnogi'r rhai sy'n ei chael hi'n anodd gyda chostau'r Nadolig, gwyliau'r ysgol neu'r rhai sy'n teimlo'n unig neu'n ynysig.

Mae ceisiadau bellach ar agor i elusennau, grwpiau cymunedol a chlybiau wneud cais am grantiau os ydynt yn rhedeg unrhyw un o'r cynlluniau canlynol:

• Bwyd am ddim i ddisgyblion yn ystod gwyliau'r Nadolig a gwyliau hanner tymor mis Chwefror.
• Lleoedd Llesol Abertawe sy'n darparu mannau cynnes a chroesawgar i bobl ddod i gymdeithasu a chymryd rhan mewn gweithgareddau.
• Cymorth Bwyd Uniongyrchol drwy fanciau bwyd a mentrau cymunedol ac elusennol eraill sy'n mynd i'r afael â thlodi bwyd ac ansicrwydd bwyd.
• Gweithgareddau i bobl ifanc a theuluoedd ar benwythnosau ac yn ystod gwyliau'r ysgol.
• Gweithgareddau i bobl hŷn yn ystod y gaeaf.

Meddai Thom Lynch, Rheolwr Prosiect Matthew's House, "Mae'r cyllid hwn yn wych, mae'n grant sy'n cael ei roi ar waith yn gyflym, sy'n ddefnyddiol iawn yn ystod y cyfnodau heriol hyn.

"Mae grwpiau gwych eraill y mae angen y math hwn o gymorth arnynt i gefnogi'r bobl y mae gwir angen help arnynt."

Gall sefydliadau gyflwyno cais drwy fynd i: https://www.abertawe.gov.uk/GrantGaeafLlawnLles2024

Y dyddiad cau ar gyfer cyflwyno cais yw dydd Mercher 20 Tachwedd.