Gwersi mewn bwyta'n iach ar gael yn dilyn buddsoddiad mewn ysgol
Mae prydau iach a choginio ar gyllideb yn wersi difyr a fydd ar gael i ddisgyblion a'u teuluoedd yn Ysgol Gynradd Penclawdd.
Diolch i grant, mae ardal gegin ystafell staff bresennol yr ysgol wedi cael ei hailbwrpasu a chaiff ei defnyddio cyn bo hir ar gyfer clwb bwyta'n iach a choginio ar ôl ysgol.
Drwy weithio gyda chefnogaeth The Sharing Table - elusen sy'n gwella bywydau plant dan anfantais yng Ngwŷr ac Abertawe - yn ogystal â Hwb Bwyd Gogledd Gŵyr a Banc Bwyd Gorseinon, nod y prosiect fydd addysgu plant a theuluoedd i goginio, bwyta'n iach, defnyddio llysiau, dilyn ryseitiau a datblygu sgiliau gydol oes.
Daeth y grant i newid y gegin o gyllid cyfalaf menter Ysgolion sy'n Canolbwyntio ar y Gymuned Llywodraeth Cymru.
Meddai Robert Smith, Aelod Cabinet Cyngor Abertawe dros Addysg a Dysgu, "Bydd y buddsoddiad hwn yn galluogi'r ysgol a'i bartneriaid i gyflwyno gwersi gwerthfawr ar fwyta a choginio'n iach a fydd o fantais iddynt am weddill eu bywydau."
Rhannu'r dudalen hon
Argraffu
