Iechyd da! Distyllfa Penderyn yn derbyn yr allweddi ar gyfer ei lleoliad newydd yn Abertawe

Mae Cyngor Abertawe wedi bod yn trawsnewid ardal sylweddol o hen safle Gwaith Copr yr Hafod-Morfa dros y tair blynedd diwethaf.

Gweithiodd y cyngor gyda phartneriaid - gan gynnwys wisgi Penderyn a Phrifysgol Abertawe - i greu'r cais am gyllid gan Gronfa Dreftadaeth y Loteri Genedlaethol.

Mae Cronfa Dreftadaeth y Loteri Genedlaethol wedi darparu £4m o arian grant ar gyfer y prosiect. Mae'r prosiect hefyd wedi derbyn £500 mil o gyllid Economi a Thrafnidiaeth Llywodraeth Cymru, ac mae gwaith ychwanegol i adeiladau hanesyddol eraill fel rhan o'r prosiect hwn wedi cael cymorth gan gyllid Targedu Buddsoddiad mewn Adfywio Llywodraeth Cymru.

Mae adeiladau Distyllfa Penderyn - sydd wedi eu hachub, eu gwella a'u hadeiladu o'r newydd ar ran y cyngor gan John Weaver Contractors o Abertawe - ar safle hen ddiwydiant a oedd wedi rhoi Abertawe ar y map ar gyfer cynhyrchu copr yn y 18^fed a'r 19^eg ganrif.

Mae Distyllfa Penderyn bellach yn gosod cyfarpar a fydd yn helpu i wneud y safle'n ddistyllfa weithredol ac atyniad i ymwelwyr.

Byddant yn parhau i weithredu o safleoedd Penderyn presennol ar draws Cymru. Bydd y cyngor yn parhau i adfywio'r gwaith copr a'r ardal Cwm Tawe Isaf o'i gwmpas gyda chymorth £20m o gyllid gan raglen Codi'r Gwastad Llywodraeth Cymru. Mae'r cyngor hefyd yn parhau i adfywio canol y ddinas.

Meddai'r Cyng. Rob Stewart, Arweinydd Cyngor Abertawe, "Rydym wrth ein boddau i drosglwyddo'r safle rhagorol hwn i Ddistyllfa Penderyn.

"Drwy ddefnyddio'u gwybodaeth a'u harbenigedd fel un o lwyddiannau modern gorau Cymru, rwy'n hyderus y byddant yn defnyddio'r safle hwn o bwys treftadaeth mawr i ddod â chyfleoedd newydd i genedlaethau'r dyfodol."

Meddai'r Cyng. Robert Francis-Davies, Aelod Cabinet Cyngor Abertawe dros Adfywio, Buddsoddi a Thwristiaeth, "Diolchwn i'n harianwyr a'n contractwyr am eu holl help, cefnogaeth a sgil. Dyma gam allweddol arall yn ein rhaglen adfywio barhaus gwerth £1bn i wneud Abertawe'n lle gwych i fyw, gweithio, astudio a threulio amser hamdden."

Meddai Prif Swyddog Gweithredu Distyllfa Penderyn, Neil Quigley, "Mae cymaint o hanes ar safle Gwaith Copr yr Hafod-Morfa, felly rydym yn falch iawn o fod yn rhan o'r rhan honno o hanes wrth symud ymlaen, ac wrth i bob wythnos fynd heibio mae'n gyffrous gweld y safle'n dod yn fyw unwaith eto.

"Rydym yn falch o fod yn agor ein trydedd distyllfa yng Nghymru, ar un o safleoedd treftadaeth gorau Abertawe ac rydym yn edrych ymlaen at groesawu ymwelwyr, unwaith y bydd ein drysau ar agor."

Distyllfa Penderyn yw cartref wisgi Cymreig ac mae wedi cyflwyno distyllu yng Nghymru unwaith eto ar ôl mwy na chanrif. Maent yn cynhyrchu wisgi a gwirodydd Cymreig arobryn ac yn allforio i dros 50 o wledydd ar draws y byd. Y gyfrinach i lwyddiant Penderyn yw eu proses ddistyllu unigryw, y gallwch ei gweld yn eu distyllfeydd ym mhentref Penderyn yn Ne Cymru; yng nghanol Llandudno, Gogledd Cymru ac yn eu distyllfa newydd yn Abertawe sy'n bwriadu agor ei drysau'r haf hwn. Mae Distyllfa Penderyn ar agor 7 niwrnod yr wythnos ac yn cynnig teithiau o'r ddistyllfa a dosbarthiadau meistr wisgi.