Casgliad o luniau yn nodi degawdau allweddol yn hanes cyfoethog Abertawe

Mae'r delweddau atgofus yn dangos yr ardal yn y 1960au a'r 1970au, o gwmpas yr adeg y daeth Abertawe'n ddinas.

Tynnwyd y lluniau gan yr artist enwog, George Little, a fu farw yn 2017 yn 89 oed.

Rhoddodd ei wraig weddw, Carolyn, o Caswell, y lluniau i'r amgueddfa a gynhelir gan Gyngor Abertawe er lles pobl ar draws y ddinas.

Meddai Aelod Cabinet y cyngor, Elliott King, "Mae archif o luniau George Little yn gasgliad hardd o ddelweddau pwysig."

Meddai Carolyn Little, "Mae'n bleser gweld y bydd ffotograffau George yn aros yn y ddinas yr oedd yn ei charu ac yn ei dogfennu."

Fel arlunydd, roedd George Little, a anwyd yn Abertawe, yn cofnodi diwydiant trwm de Cymru.

Yn dilyn ei farwolaeth, gwahoddodd Mrs Little swyddog arddangosfeydd yr amgueddfa, Karl Morgan, i weld yr archif o luniau.

Meddai Karl, "Mae'r cannoedd o negatifau yn dangos bod George yn ffotograffydd gwych, yn ogystal â bod yn arlunydd o safon.

"Y llynedd fe wnaethom gynnal arddangosfa boblogaidd a oedd yn cynnwys rhai o'r delweddau hynny. Byddwn yn parhau i sicrhau eu bod ar gael i'n hymwelwyr."

Cynhaliodd yr amgueddfa ddigwyddiad ar 26 Hydref a oedd yn lansio bywgraffiad newydd - George Little: The Ugly Lovely Landscape gan yr hanesydd celf Peter Wakelin.

Cyhoeddwyd rhodd Mrs Little i'r amgueddfa ar yr un pryd.

Mae'r rhodd yn cynnwys paentiad olew mawr, Merched Cocos Pen-clawdd, a gwblhawyd yn 1953. Mae'n ategu casgliad uchel ei barch yr amgueddfa sy'n ymwneud â diwydiant cocos Pen-clawdd.

Meddai Peter Wakelin, "Daeth George â gwybodaeth weledol ddofn i oes o waith a fu'n archwilio ffurfiau dramatig dirywiad diwydiannol a threfol."

• George Little: The Ugly Lovely Landscape, gan Peter Wakelin, Parthian. www.bit.ly/ParthianULL

Llun: Dociau Abertawe - llun gan George Little.