Cymunedau gwledig Abertawe i elwa o hwb ariannol gwerth £250,000

Mae Cyngor Abertawe bellach wedi dyfarnu cyllid gwerth £205,000 i 17 cynllun fel rhan o'r prosiect angori gwledig sy'n cael ei ariannu gan Lywodraeth y DU drwy  Gronfa Ffyniant Gyffredin y DU.

Mae'r cynlluniau a fydd yn elwa'n cynnwys:

• Llwybr ymwelwyr ac arddangosfa'r Arglwyddes Goch a arweinir gan Dwristiaeth Bae Abertawe. Yr Arglwyddes Goch yw'r enw a roddwyd i'r darganfyddiad ym 1823 i weddillion hynafol yn Ogof Pen-y-fai (Pafiland) yn Ne Gŵyr. Bydd y prosiect yn helpu preswylwyr Gŵyr ac ymwelwyr â'r ardal i gael gwell dealltwriaeth o'r Arglwyddes Goch, ei harwyddocâd hanesyddol a'i hunigrywiaeth i fro Gŵyr.
• Prosiect ynni adnewyddadwy, a arweinir gan Down to Earth, i ddarparu cyfleusterau storio batris yn adeilad cymunedol Murton a Little Bryn Gwyn yng Ngŵyr. Byddai hyn yn ategu'r grŵp o baneli solar sydd eisoes wedi'u gosod yno i helpu gyda phweru'r adeiladu a darparu cyfleusterau gwefru ar gyfer ceir trydan.
• Gwasanaeth gwybodaeth, cyngor a chyfeirio achrededig yn benodol ar gyfer pobl hŷn a'u gofalwyr yng nghymunedau gwledig Abertawe. Byddai'r gwasanaethau hyn a arweinir gan Age Cymru Gorllewin Morgannwg, wedi'u lleoli mewn cymunedau.
• Prosiect ar gyfer Ymddiriedolaeth Penllergare sy'n canolbwyntio ar gynyddu nifer y gwirfoddolwyr sy'n i helpu i gynnal a gwarchod Coed Cwm Penllergaer drwy ariannu cydlynydd gwirfoddoli.
• Prosiect bioamrywiaeth 'The Bug's Life'  Mawr ar draws dau safle i ddiogelu swydd cydlynydd y prosiect bioamrywiaeth a galluogi i waith recriwtio, ymgysylltu a datblygu sgiliau gwirfoddolwyr barhau. Bydd y prosiect hefyd yn arwain at gyflwyno dysgu yn yr awyr agored a chwarae natur.

Meddai'r Cyng. Robert Francis-Davies, Aelod Cabinet Cyngor Abertawe dros Adfywio, Buddsoddi a Thwristiaeth, "Mae ein cymunedau gwledig yn gwneud cyfraniad sylweddol at economi a diwylliant Abertawe felly rydym yn falch iawn ein bod wedi cymeradwyo cyllid ar gyfer 17 o brosiectau hyd yn hyn fel rhan o'n prosiect angori gwledig.

"O dwristiaeth ag ynni adnewyddadwy i brosiectau glasu gwledig a chynlluniau i gynorthwyo'r henoed, bydd y prosiectau  hyn o fudd i bobl o bob oed mewn cymunedau gwledig drwy'r holl sir."

Aseswyd yr holl brosiectau hyn gan grŵp cynghori gwledig.

Meddai'r Cyng. Andrew Stevens, aelod o'r grŵp a Chynghorydd Hyrwyddo'r  Economi Wledig yng Nghyngor Abertawe, "Fel cyngor rydym yn buddsoddi'n drwm yn ein cymunedau gwledig i gynnal gwasanaethau i bobl leol a chynyddu eu proffil fel cyrchfannau i ymwelwyr, ond bydd y prosiectau cymeradwy hyn yn ychwanegu gwerth at bopeth rydym yn ei wneud.

"Bydd llawer mwy o gynlluniau'n elwa o'r cyllid fel rhan o'r prosiect angori gwledig cyffredinol yn y dyfodol hefyd. Bydd hyn yn helpu i hybu ein cymunedau gwledig ymhellach drwy gefnogi eu pobl a'u busnesau wrth helpu i dorri eu hôl traed carbon."

Mae cynlluniau eraill sydd bellach wedi'u cymeradwyo am gyllid yn cynnwys  gosod batris a bwerir gan yr haul yn Neuadd Bentref Reynoldston er mwyn cyflwyno system defnyddio ynni fwy cynaliadwy a chost-effeithiol i weithio gyda'r paneli solar presennol.  

Caiff deuddeng o baneli solar a storfa fatris gysylltiedig eu gosod yn yr ystafell newid ym Mharc Coed Gwilym yng Nghlydach. Bydd hyn yn darparu pŵer i'r pafiliwn cymunedol yno ac yn cynhyrchu ynni i gynnal bws mini trydan cymunedol arfaethedig.