Prosiect amddiffynfeydd môr yn cyrraedd carreg filltir allweddol - ar gyfer diogelwch a natur
Mae prosiect proffil uchel Cyngor Abertawe i gryfhau a gwella amddiffynfeydd môr y Mwmbwls wedi cyrraedd carreg filltir newydd.
Mae contractwyr wedi rhoi'r paneli concrit mawr cyntaf yn eu lle sy'n ffurfio arwyneb newydd yr adran fertigol 500m o hyd.
Erbyn diwedd y prosiect y flwyddyn nesaf, bydd bron 100 o baneli yn ochrau'ch gilydd, a phob un yn mesur 5m o hyd wrth 4.5 m o uchder.
Byddant yn ymestyn o lefel y prom i lawr i'r traeth ac o ogledd maes parcio Sgwâr Ystumllwynarth i o gwmpas Clwb Bowlio'r Mwmbwls.
Mae wynebau gweadog y paneli - a ddyluniwyd fel rhan o brosiect Prifysgol Abertawe i annog bywyd môr iach - yn cael eu creu drwy ddefnyddio mowld mawr.
Meddai Aelod Cabinet y cyngor, Andrew Stevens, "Mae castio'r paneli cyntaf yn garreg filltir arwyddocaol ar gyfer y prosiect hwn.
"Byddant yn amddiffyn y gymuned am ddegawdau lawer i ddod a - diolch i'r gorffeniad gweadog deniadol - byddant yn annog bioamrywiaeth.
"Fel rhan o'r prosiect hwn rydym hefyd yn uwchraddio ardal ogwyddog y wal. Bydd amddiffynfeydd eilaidd hefyd ar ffurf waliau isel ac argloddiau glaswelltog.
"Bydd llawer o wyrddni a chedwir y coed. Bydd y gwaith yn darparu cyfle i wella rhannau eraill o ardal y prom. Bydd cannoedd o leoedd parcio'n aros yn agos i lan môr.
"Rydym yn diolch i bawb yn y gymuned leol, gan gynnwys busnesau ac ymwelwyr â'r Mwmbwls am eu dealltwriaeth ar yr adeg hon o newid."
"Mae ein contractwyr yn parhau i wneud popeth y gallant i leihau tarfu."
Dywedodd Cyfarwyddwr Adrannol Knights Brown,Andrew Eilbeck: "Mae ein tîm yn y Mwmbwls yn parhau i weithio'n galed i ddarparu'r gwelliant gwych hwn a bydd yn parhau i wneud hynny drwy'r tywydd gaeafol ac wedi hynny.
"Diolchwn i'r gymuned gyfan am eu hymateb cadarnhaol a'r anogaeth maent yn parhau i roi i ni."
Mae cartrefi a busnesau o gwmpas y Mwmbwls yn cael eu bygwth yn gynyddol gan lefelau môr cynyddol a achosir gan newid yn yr hinsawdd.
Cyflwynir y prosiect amddiffynfeydd môr gan Knights Brown ar ran y cyngor. Caiff ei ariannu'n bennaf gan Lywodraeth Cymru.
Mae barn a syniadau'r cyhoedd, busnesau ac eraill wedi helpu i lunio'r prosiect - ac maent yn parhau i wneud hynny.
Rhagor:
Llun: Aelod Cabinet y cyngor, Andrew Stephens wrth y rhan newydd o forglawdd gweadog y Mwmbwls gyda Tim Waller, rheolwr adrannol y prif gontractwr, Knights Brown.
Rhannu'r dudalen hon
Argraffu
