Cwmni arobryn i arwain gwaith adfywio gwerth £750m yn Abertawe

Mae Urban Splash wedi llofnodi cytundeb partneriaeth 20 mlynedd gyda'r cyngor sy'n paratoi'r ffordd ar gyfer ailddatblygu safleoedd sy'n cynnwys Gogledd Abertawe Ganolog a hen Ganolfan Siopa Dewi Sant.

Mae cynigion cynnar ar gyfer safle 5.5 erw Gogledd Abertawe Ganolog yn cynnwys swyddfeydd, gweithleoedd a rennir, fflatiau ac ardal newydd lle gall busnesau bach creadigol wneud a gwerthu eu cynnyrch.

Cynnig arall yw'r posibilrwydd o ailddatblygu safle 2.3 erw'r Ganolfan Ddinesig i greu ardal glan-môr ddinesig newydd. Gallai cartrefi a mannau hamdden a lletygarwch hefyd gael eu datblygu yno, ynghyd â digonedd o wyrddni, mannau cyhoeddus a rhodfa newydd i'r traeth.

Meddai'r Cyng. Rob Stewart, Arweinydd Cyngor Abertawe, "Rydym wedi cyflwyno Ffordd y Brenin newydd, Wind Street ar ei newydd wedd, Bae Copr ac Arena Abertawe dros y pum mlynedd diwethaf. Mae Gerddi'r Castell, Theatr y Palace, Neuadd Albert a nifer o gynlluniau adfywio allweddol eraill yn mynd rhagddynt, ond nawr mae angen i ni symud ymlaen i gam nesaf ail-lunio'n dinas hardd. Dyna pam y byddwn yn ailddatblygu'r safleoedd allweddol hyn ar draws Abertawe i greu rhagor o gyfleoedd busnes, hamdden a byw newydd.

"Rwy'n falch bod gennym bartner rhagorol sef Urban Splash a fydd yn ein helpu i wireddu'r cyfleoedd hyn.Mae eu brwdfrydedd, eu hymroddiad a'u gweledigaeth i helpu'r cyngor i ddarparu'r math o ganol dinas a glannau modern, ffyniannus y mae pobl Abertawe yn eu haeddu eisoes wedi gwneud argraff arnom.

"Mae'r gwaith arfaethedig i adfywio safleoedd, gan gynnwys yr ardal o gwmpas Eglwys y Santes Fair y cyfeirir ati fel Gogledd Abertawe Ganolog a safle penigamp y Ganolfan Ddinesig, yn mynd i fod yn bethau go arbennig ac unigryw, gan adeiladu ar y gwaith rydym eisoes wedi'i wneud o ran Bae Copr a'r Arena.

"Yn ogystal â chreu lleoedd hamdden, byw, manwerthu a swyddfeydd newydd o safon, bydd y gwaith arfaethedig i drawsnewidiad y safleoedd allweddol hyn yn cynhyrchu miloedd o swyddi â thâl da i bobl leol.

"Mae Urban Splash yn gwmni sydd wedi cyflawni rhai o'r cynlluniau mwyaf creadigol ac eiconig yn y DU, felly rydym yn falch iawn ein bod wedi llofnodi'r cytundeb partneriaeth £750m hwn a fydd yn mynd â'n dinas i'r lefel nesaf."

Sefydlwyd Urban Splash ym 1993 ac ers hynny mae wedi datblygu dros 60 o brosiectau adfywio ledled y DU. Mae'r rhain yn cynnwys prosiect Royal William Yard yn Plymouth, lle trawsnewidiodd y cwmni gasgliad o adeiladau rhestredig Gradd I a II ger y glannau'n fflatiau, yn weithleoedd, yn orielau, yn fariau ac yn fwytai. Mae Urban Splash wedi ennill mwy na 450 o wobrau am ei waith.

Meddai Jonathan Falkingham MBE, Cyd-sefydlydd yn Urban Splash a chyn-breswylydd yn Abertawe a aeth i'r ysgol yn y ddinas, "Rydym yn edrych ymlaen yn fawr at ddatblygu'n partneriaeth gyda Chyngor Abertawe, gan gymhwyso gwerth bron tri degawd o brofiad yn y maes adfywio i greu amgylchedd o'r radd flaenaf sy'n uno adeileddau hanesyddol y ddinas â phensaernïaeth newydd, gynaliadwy, gyda'r amcan o sefydlu Abertawe yn un o ddinasoedd mwyaf iach ac anheddol y DU.

"Nid adeiladau'n unig sy'n bwysig wrth greu'r mannau gorau - mae'n ymwneud â phobl leol hefyd. Mae Urban Splash yn gydweithwyr awyddus, a gallwn roi bywyd newydd i leoedd newydd drwy weithio'n agos gyda'r cymunedau, y busnesau lleol, yr entrepreuneuriaid hynny a'r gymuned greadigol. Mae Cyngor Abertawe eisoes wedi dangos ei uchelgais ar gyfer y ddinas ac rydym yn falch iawn o fod yn ymuno â nhw a'r gymuned ehangach ar gam nesaf taith Abertawe."

Mae safleoedd eraill yn Abertawe i'w hadfywio'n cynnwys safle 7.5 erw yn St Thomas, y mae'r cynigion cynnar yn cynnwys cartrefi i deuluoedd, fflatiau, mannau cyhoeddus newydd a llwybr terasog ar lan yr afon sy'n darparu mynediad uniongyrchol i'r afon am y tro cyntaf mewn dros 150 o flynyddoedd.

Trefnir y bydd llawer o gyfleoedd ar gael i bobl eraill roi adborth ar yr holl gynigion cyn gynted ag y cânt eu datblygu'n fanylach. Bydd cynigion pellach yn y dyfodol yn cynnwys cyfleoedd i ddatblygu safleoedd allweddol eraill ar draws Abertawe.