Trawsnewid hen adeilad y cyngor yn gartrefi trawiadol newydd

Mae'r ddau dŷ pâr, tair ystafell wely wedi'u cwblhau mewn eiddo ar Alexandra Road yng Ngorseinon.

Mae'r datblygiad diweddaraf wedi cynnwys addasu adeilad sy'n eiddo i'r cyngor ar hyn o bryd ac a oedd yn arfer bod yn gartref i ganolfan seibiant nad oedd ei hangen mwyach.

Mae'r ddau gartref newydd wedi elwa o geginau newydd, ystafelloedd ymolchi newydd, ffenestri uPVC ynni effeithlon, offer gwresogi a gerddi wedi'u tirlunio'n hyfryd, yn ogystal â sied yn yr ardd.

Mae'r cyngor yn parhau â'i ymdrechion i gynyddu ei stoc tai ei hun a helpu i ddarparu cartrefi saff a diogel i breswylwyr ar y rhestr aros bresennol am dai.

Disgwylir i denantiaid lwcus y ddau eiddo dderbyn yr allweddi yn ystod y misoedd nesaf.

Aeth Andrea Lewis, Aelod y Cabinet dros Drawsnewid Gwasanaethau, ar daith yn ddiweddar o amgylch y tai newydd a gwblhawyd a dywedodd ei bod wrth ei bodd gyda chanlyniad y gwaith trawsnewid.

 Meddai'r Cyng. Lewis, "Unwaith eto mae ein Gwasanaethau Tai ac Adeiladau Corfforaethol wedi gwneud pob ymdrech i greu dau gartref gwych newydd y maent yn barod i deuluoedd symud i mewn iddynt.

"Rydym yn parhau i ddatblygu cartrefi newydd o'r ansawdd uchaf yn y ddinas. Mae hyn yn cynnwys cwblhau cartrefi newydd ar safleoedd amrywiol yn Abertawe, yn ogystal ag ailddatblygu eiddo presennol y cyngor nad oes eu hangen mwyach.

"Mae'r cynllun diweddaraf hwn wedi trawsnewid adeilad rydym yn berchen arno ac wedi ein helpu i gynyddu nifer y tai cyngor sydd gennym yn ein stoc bresennol."

Cyn hyn, bu'r cyngor yn gweithio ar Dŷ Bryn, hen adeilad addysgol yn Uplands, a gafodd ei drawsnewid yn bedair fflat un ystafell wely ac a agorwyd ar ddechrau 2022.

Mae addasiadau pellach yn mynd rhagddynt yn y ddinas, gan gynnwys trawsnewid dwy hen Swyddfa Dai Ranbarthol yn dai.

Mae chwe byngalo dwy ystafell wely newydd sbon hefyd wedi'u cwblhau yn West Cross.

Ychwanegodd y Cyng. Lewis, "Rydym yn bwrw ymlaen â'r ymrwymiad a wnaethom i gynyddu a gwella ein stoc tai fel y gallwn leihau rhestrau aros a sicrhau ein bod yn mynd i'r afael â digartrefedd yn effeithiol.

"Mae ein menter Rhagor o Gartrefi yn ceisio adeiladu 1,000 o dai cyngor ynni effeithlon newydd, o fewn deng mlynedd - y prosiect adeiladu tai cyngor mwyaf ers cenhedlaeth."