Barnwr yn gwrthod cais am drwydded tacsi
Mae ymgeisydd y gwrthodwyd trwydded tacsi iddo gan Gyngor Abertawe wedi cael gorchymyn i dalu £4,000 mewn costau ar ôl i'w apêl yn erbyn y penderfyniad gael ei daflu allan gan farnwr.
Aeth Mohammed Rashid, 47, i'r llys i geisio gwrthdroi penderfyniad a wnaed gan bwyllgor trwyddedu Cyngor Abertawe a oedd yn dweud nad oedd yn berson addas a phriodol i gael trwydded sy'n ofynnol yn gyfreithiol ar gyfer unrhyw un sydd eisiau gyrru tacsi neu gerbyd hurio preifat.
Ond cytunodd y barnwr yn Llys Ynadon Casnewydd â Chyngor Abertawe, gan dynnu sylw at lu o bryderon, gan gynnwys methiant i ddatgelu trosedd goryrru a methiant i ddatgelu ei fod wedi cael ei wrthod am drwydded gan awdurdod lleol arall yn 2016.
Croesawodd David Hopkins, Aelod y Cabinet dros Wasanaethau a Pherfformiad Corfforaethol, gefnogaeth y barnwr ac ychwanegodd, "Mae'r achos hwn yn dangos pa mor benderfynol yw Cyngor Abertawe i sicrhau bod pobl yn ddiogel wrth ddefnyddio tacsis."
Clywodd y gwrandawiad llys ar 19 Gorffennaf fod trwydded tacsi Rashid wedi'i dirymu gan Gyngor Abertawe yn 2015. Y flwyddyn ganlynol, gwnaeth gais am drwydded i awdurdod lleol arall a chafodd ei wrthod.
Yn ei gais diweddaraf i Gyngor Abertawe am drwydded ym mis Tachwedd y llynedd, ni ddatgelodd y ffaith ei fod wedi'i wrthod am drwydded yn 2016 na'r drosedd goryrru, yr oedd yn ofynnol iddo wneud y ddau beth hyn.
Daeth swyddogion y cyngor a fu'n edrych i mewn i'w gais o hyd i'r wybodaeth, gan gyflwyno'r materion a thystiolaeth arall i'r pwyllgor trwyddedu, a wrthodwyd ei gais o ganlyniad.
Cefnogodd y barnwr benderfyniad y pwyllgor. Gwrthododd achos Rashid yn ogystal â'i esboniad am beidio â darparu gwybodaeth berthnasol, gan ei orchymyn i dalu £4,000 mewn costau i'r cyngor.
Nid oedd y llys yn fodlon yn ôl pwysau tebygolrwydd fod Mr Rashid, o Abderdyberthi Street, Abertawe, yn berson addas a phriodol i ddal trwydded ac roedd penderfyniad Cyngor Abertawe i wrthod rhoi trwydded yn gywir ym mhob ffordd.