Y cyhoedd yn cael cyfle i fynegi barn am lwybr blaengar newydd i gerddwyr ar hyd yr afon Tawe

Mae Cyngor Abertawe wedi datblygu cynigion ar gyfer llwybr cerdded a beicio Teithio Llesol newydd, a fyddai'n cysylltu canol y ddinas â Gwaith Copr yr Hafod-Morfa.

Byddai'r dyluniad diweddaraf ar gyfer y llwybr yn cynnwys llwybr a rennir 3-4 metr o led ar gyfer cerddwyr a beicwyr, ynghyd â llwybr estyllod uchel uwchben yr afon Tawe.

Mae ymgynghoriad ar y cynigion dylunio drafft bellach yn mynd rhagddo ac mae gan y cyhoedd y cyfle i fod yn rhan o'r cyfnod dylunio drwy ddarparu sylwadau am y cynlluniau.

Y llynedd, derbyniodd y Cyngor dros £1 miliwn drwy Gronfa Teithio Llesol Llywodraeth Cymru er mwyn gallu dylunio amrywiaeth eang o lwybrau cerdded a beicio. Mae peth o'r arian wedi cael ei ddefnyddio i ddylunio llwybr yr afon Tawe.

Meddai Andrew Stevens, Aelod y Cabinet dros yr Amgylchedd ac Isadeiledd, "Mae coridor yr afon Tawe'n rhan hanfodol o gynlluniau adfywio ehangach Abertawe. Rydym eisoes wedi gweld y gwaith arbennig o ailddatblygu safle Gwaith Copr yr Hafod-Morfa yn Ddistyllfa Penderyn, ac mae cynlluniau ar waith ar gyfer ailddatblygiad pellach yn y blynyddoedd sydd i ddod.

"Bydd y cynlluniau ar gyfer llwybr cerdded a beicio newydd yn golygu y bydd mynediad gwych i lan yr afon yn ogystal â chyswllt i gerddwyr rhwng canol y ddinas, safle'r Gwaith Copr a'r stadiwm.

"Rydym ar gam cynnar o ran y dyluniad ac rydym am i'r cyhoedd gymryd rhan yn y broses hon."

Dros y blynyddoedd diwethaf, mae cyllid Teithio Llesol wedi cael ei ddefnyddio i ddatblygu mwy o adrannau o lwybrau cerdded a beicio ar hyd yr afon Tawe, rhwng stadiwm Swansea.com a chyffordd 45 yr M4.

Ychwanegodd y Cyng. Stevens, "Ein nod yw creu rhwydwaith eang o lwybrau cerdded a beicio sy'n cysylltu cymunedau ac yn darparu opsiynau eraill i breswylwyr deithio o amgylch Abertawe. Ar yr un pryd, rydym yn datblygu llwybrau sy'n manteisio ar ein hasedau naturiol fel yr afon Tawe."

Mae'r ymgynghoriad cyhoeddus ar gyfer cynigion cerdded a beicio Coridor Glannau'r Tawe ar agor tan 6 Mai. I gymryd rhan, ewch i https://www.abertawe.gov.uk/TeithioLlesolAfonTawe