Gŵyl Jazz Ryngwladol Abertawe'n dathlu 75 mlynedd o gerddoriaeth jazz fyw yn y ddinas

Mae Cyngor Abertawe'n cydweithio eto â Chlwb Jazz Abertawe, sydd bellach yn dathlu 75 mlynedd ers ei sefydlu, er mwyn cyflwyno gŵyl jazz eleni, a gynhelir mewn lleoliadau ar draws Ardal Forol Abertawe rhwng dydd Iau 13 Mehefin a dydd Llun 17 Mehefin 2024.

Bydd yr ŵyl yn dechrau gyda chinio mawreddog arbennig yng Ngwesty Morgans ar y nos Iau honno, a fydd yn dechrau'r dathliadau ar gyfer pen-blwydd Clwb Jazz Abertawe'n 75 oed a phen-blwydd noddwr yr ŵyl, Syr Karl Jenkins, sef y gwestai anrhydeddus, yn 80 oed.

Bydd y dathliadau'n parhau ddydd Gwener, pan fydd band mawr llawn sêr Laurence Cottle yn chwarae trefniant arbennig o gerddoriaeth jazz Syr Karl Jenkins mewn dwy gyngerdd. Cynhelir y rhain ym Mhafiliwn yr Ŵyl, y tu allan i Amgueddfa Genedlaethol y Glannau am 6pm a 8.30pm, a bydd y cyfansoddwr ei hun yn rhoi cyflwyniad ar ddechrau pob perfformiad.

Pafiliwn yr Ŵyl yw'r lleoliad ar gyfer pum cyngerdd â thocynnau arall yr ŵyl, gan gynnwys Denny Illet's Electric Lady Big Band yn chwarae trefniadau jazz bywiog o gerddoriaeth Jimmy Hendrix.

Meddai Aelod Cabinet Cyngor Abertawe dros Fuddsoddi, Adfywio a Thwristiaeth, y Cynghorydd Robert Francis-Davies, "Rydym yn falch iawn o gyflwyno Gŵyl Jazz Ryngwladol Abertawe unwaith eto, yn enwedig wrth iddi ddathlu 75 mlynedd o gerddoriaeth jazz fyw yn y ddinas a medrusrwydd anghredadwy Syr Karl Jenkins ym mlwyddyn ei ben-blwydd yn 80 oed.

"Mae'r ŵyl yn parhau i ddenu rhai o gerddorion gorau byd jazz y DU, sy'n chwarae amrywiaeth o arddulliau ar draws y genre cerddoriaeth jazz, ac rydym yn siŵr y bydd yn denu cynulleidfa leol yn ogystal â chefnogwyr jazz y tu hwnt i'r ardal.

"Diolch yn fawr i Dave Cottle a Chlwb Jazz Abertawe am eu mewnbwn a'u cefnogaeth wrth raglennu'r ŵyl, sydd bellach wedi dod yn boblogaidd ac yn ddigwyddiad rheolaidd yng nghalendr digwyddiadau'r ddinas."

Bydd y rhestr o berfformiadau â thocynnau hefyd yn cynnwys Band Mawr yr Ŵyl 'Power of Gower', Pedwarawd Adrian Cox, Moscow Drug Club a phrosiect The Stacey Brothers' Big Band Steely Dan: a bydd The Royal Scammers yn talu teyrnged i'r band roc eiconig ac arobryn o America, Steely Dan.

Bydd yr ŵyl eleni hefyd yn gweld dychweliad gweithdy cerddorol ar gyfer cerddorion ifanc, a gefnogir gan Gerdd Abertawe a Gwasanaeth Cerddoriaeth Cenedlaethol Cymru, dan arweiniad Pete Long a Thriawd Eddie Gripper. Cynhelir hefyd weithdy cerddorol 'Camau Cyntaf' diddorol i blant rhwng 4 a 7 oed.

Os nad yw hynny'n cynnwys digon o jazz i'ch diddanu, bydd Gŵyl Jazz Ryngwladol Abertawe hefyd yn cynnwys rhaglen grwydro. Does dim angen prynu tocynnau gan y bydd y tafarndai a'r bariau yn yr Ardal Forol a'r ardaloedd cyfagos yn llawn perfformiadau llai a mwy personol, gyda rhai wynebau cyfarwydd.

Meddai David Cottle, ymgynghorwr artistig Gŵyl Jazz Ryngwladol Abertawe, Mae'r ŵyl yn cyflwyno rhaglen jazz ardderchog ac amrywiol unwaith eto eleni. Mae cyngherddau gwych i edrych ymlaen atynt a bydd rhai o'n ffefrynnau yn dychwelyd fel rhan o'r rhaglen i gerddwyr - bydd Abertawe'n llawn cyffro unwaith eto wrth wrando ar gerddoriaeth jazz fyw!"

Dylai pobl sydd am gael rhagor o wybodaeth neu archebu tocynnau fynd ar-lein i www.croesobaeabertawe.com/joio/