Rhowch eich barbeciws tafladwy yn y bin pan fyddwch ar y traeth

Dros fisoedd prysur yr haf, mae'r cyngor wedi bod yn cynyddu ei gasgliadau sbwriel ar y traeth ac wedi cynyddu nifer y biniau sydd ar gael i bobl gael gwared ar eu sbwriel yn gyfrifol.

Mae pymtheg o finiau coch newydd ar gyfer barbeciws tafladwy yn cael eu gosod ar draethau poblogaidd sy'n eiddo i'r cyngor mewn pryd ar gyfer hanner tymor y Sulgwyn, y mae'r rhan fwyaf ohonynt eisoes yn eu lle ac yn cael eu defnyddio.

Mae hyn yn golygu nad oes unrhyw esgus i bobl adael eu sbwriel ar y traeth yr haf hwn.

Dywedodd Cyril Anderson, Aelod y Cabinet dros Wasanaethau Cymunedol mai cyfrifoldeb y rheini sy'n mynd i'r traeth yw cael gwared ar eu gwastraff yn gyfrifol a mynd ag ef adref gyda nhw os yw'r biniau'n llawn.

Meddai, "Mae'n anobeithiol bod pobl yn meddwl ei fod yn dderbyniol iddynt gladdu poteli, barbeciws neu unrhyw wastraff arall yn y tywod ar ddiwrnod mas. Nid yw hyn yn gyfrifol a gall ymddygiad gwrthgymdeithasol o'r fath fod yn beryglus iawn i ddefnyddwyr eraill y traeth.

"Rydym wedi buddsoddi miloedd o bunnoedd yn gosod biniau gwastraff parhaol ar gyfer barbeciws ac arwyddion cysylltiedig mewn lleoedd fel Porth Einon, Horton, Caswell a Langland gyda rhagor i ddod yn Rotherslade ac ar hyd Prom Abertawe lle mae pump wedi'u hychwanegu'n barod.

"Felly does dim esgus mwyach i bobl adael eu barbeciws tafladwy ar y traeth wrth iddynt fynd adref. Mae barbeciws a siarcol yn cadw eu gwres am oriau ar ôl iddynt gael eu defnyddio a gall hyn achosi llosgiadau difrifol i bobl sy'n sefyll arnynt yn ddamweiniol."

Yn ogystal â'r biniau, mae tîm glanhau'r cyngor yn gosod arwyddion ar draethau y mae'r cyngor yn gofalu amdanynt yn annog pobl i wneud y peth iawn a chael gwared ar eu barbeciws tafladwy yn gyfrifol.

Mae timau glanhau traethau'r cyngor hefyd yn glanhau'r traethau bob bore yn ystod yr haf a thrwy gydol y dydd. Maent yn aml yn cael eu cefnogi gan wirfoddolwyr sydd hefyd am weld traethau glân. Mae timau ychwanegol hefyd yn targedu mannau lle ceir llawer o sbwriel ar yr adegau prysuraf.

Ond dywedodd y Cyng. Anderson, er bod y cyngor yn chwarae ei ran, mae angen i ymwelwyr wneud yr un peth. Meddai, "Oes, mae gennym biniau yn eu lle, ac oes, mae arwyddion wedi'u gosod ar y traethau sy'n rhybuddio pobl am daflu sbwriel, ac ydy, mae'r cyngor yn gweithio'n galed i lanhau traethau'n barhaus.

"Ond y rheini sy'n dod â'r nwyddau i'r traeth yn y lle cyntaf sy'n gyfrifol yn y pen draw am fynd â'r sbwriel a'r gwastraff adref gyda nhw neu  ddefnyddio'r biniau a ddarperir gan y cyngor. Dylai pobl wneud y peth iawn bob tro."

Rhestr o draethau lle mae'r biniau barbeciws tafladwy wedi'u lleoli:

Bae Langland - 2 fin

Porth Einon

Horton

Rotherslade

Lleoliadau rhwng Bae Abertawe, rhwng Pier y Gorllewin a'r Mwmbwls, gan gynnwys

Mynedfa maes parcio'r lle chwarae'r Pwynt i'r traeth

Ar ben grisiau'r Ganolfan Ddinesig ger y traeth

Y Slip ger Bay View

Y grisiau ger maes parcio The Secret, gyferbyn â Pharc Victoria

Ger The Secret

Y Slip ger Brynmill Lane

Uwchben nant Clun ger yr atyniad golff-troed

Blackpill, un ar bob pen yr ardal bicnic