Cwestiynau cyffredinol am therapi galwedigaethol

Beth yw'r Gwasanaeth Therapi Galwedigaethol?

Sut mae'r gwasanaeth yn gweithio?

Beth mae'r gwasanaeth yn ceisio ei gyflawni?

Sut ydw i'n gofyn am wasanaeth?

Beth sy'n digwydd yn yr asesiad?

A fydd gen i gynllun gweithredu?

Beth yw'r Gwasanaeth Therapi Galwedigaethol?

Mae'r Gwasanaeth Therapi Galwedigaethol yn un o'r gwasanaethau a ddarperir gan y Gwasanaethau Cymdeithasol ar gyfer pobl hŷn a phobl ag anableddau corfforol neu synhwyraidd. Mae tîm o Therapyddion Galwedigaethol (ThG) profiadol yn gweithio yn y gymuned gyda phobl anabl a chyda'r rheiny sy'n eu cynorthwyo neu'n byw gyda hwy.

Sut mae'r gwasanaeth yn gweithio?

Mae Therapyddion Galwedigaethol yn helpu pobl i ddod o hyd i ffyrdd o ymdopi ag effeithiau anabledd.

Mae'r ThG yn gweithio gyda phobl o bob oedran er mwyn eu helpu i fod mor annibynnol â phosib, gwella ansawdd eu bywydau a bywydau'r bobl sy'n gofalu amdanynt..

Mae'r ThG yn cydweithio'n agos â sefydliadau eraill y gallai fod modd iddynt eich helpu hefyd i sicrhau y gellir diwallu eich anghenion yn y ffordd orau bosib. Gallai'r rhain gynnwys staff gofal iechyd neu swyddogion adfer o RNIB.

Bydd y ThG yn gweithio gyda chi i nodi tasgau rydych yn eu cael yn anodd i'w cyflawni ynghyd â ffyrdd o addasu technegau, defnyddio cyfarpar neu addasu eich cartref i wneud tasgau bob dydd yn haws.

Beth mae'r gwasanaeth yn ceisio ei gyflawni?

Nod y gwasanaeth ThG yw:

• rhoi mwy o annibyniaeth a rheolaeth dros eu bywydau i bobl;
• gwneud gweithgareddau bob dydd yn haws heb iddynt gymryd llawer o amser pobl anabl ac unrhyw un sy'n eu cynorthwyo neu'n byw gyda hwy;
• annog arferion diogel a hysbysu pobl amdanynt;
• helpu pobl i addasu i'w hanableddau a gwella eu hyder a'u hunan-barch.

Sut ydw i'n gofyn am wasanaeth?

Dylech chi neu rywun ar eich rhan gysylltu â'r Pwynt Mynediad Cyffredin ar gyfer Iechyd a Gofal Cymdeithasol (PMC).

Os ydych yn glaf yn yr ysbyty, siaradwch â thîm gwaith cymdeithasol yr ysbyty.

Bydd eich cais yn cael ei gyfeirio at y gwasanaeth ThG a byddwn yn gwneud apwyntiad i ThG ymweld â chi yn eich cartref a chyflawni asesiad o'ch anghenion.

Beth sy'n digwydd yn yr asesiad?

Bydd angen i'r ThG gasglu gwybodaeth am eich anabledd neu eich cyflwr meddygol, a bydd angen iddo eich arsylwi chi'n cyflawni tasgau bob dydd penodol er mwyn cael gwell dealltwriaeth o'ch anawsterau.

Yn benodol byddwn yn:

• trafod yr hyn y gallwch ei gyflawni ar hyn o bryd a sut mae unrhyw anawsterau'n effeithio ar eich ffordd o fyw a ffordd o fyw unrhyw un sy'n eich cynorthwyo neu sy'n byw gyda chi;
• nodi beth yw eich cryfderau a'ch galluoedd a sut y gellir defnyddio'r rhain i oresgyn yr anawsterau;
• trafod unrhyw syniadau sydd gennych o ran ffyrdd o wella'r sefyllfa;
• gofalu eich bod yn gwybod am yr amrywiaeth o wasanaethau ac adnoddau lleol sydd ar gael i'ch helpu;
• os yw'n briodol, trefnu i chi roi cynnig ar gyfarpar arbenigol yn eich cartref.

A fydd gen i gynllun gweithredu?

Ar ôl asesu eich anghenion ac archwilio unrhyw ddewisiadau neu opsiynau gyda chi, bydd y ThG yn defnyddio'i arbenigedd a'i brofiad i weithio gyda chi ac unrhyw un sy'n eich cynorthwyo neu'n gweithio gyda chi ar gynllun gweithredu i gytuno arno.

Gall y ThG:

• roi cyngor ar ffyrdd gwahanol o ymdrin â'ch sefyllfa a thrafod ffyrdd ar gyfer newid a gwelliant;
• cynghori chi ac unrhyw un sy'n eich cynorthwyo neu sy'n byw gyda chi am sgiliau newydd i'ch helpu i wneud pethau o gwmpas y tŷ yn fwy rhwydd a diogel;
• awgrymu cyfarpar a allai eich helpu gyda thasgau bob dydd fel ymolchi, gwisgo a choginio;
• rhoi gwybodaeth i chi ar addasiadau posib i'ch cartref ac ynghylch pa grantiau sydd ar gael.