Dirprwy Arglwydd Faer

Ganwyd a magwyd Cheryl yng Nghaerlŷr nes ei bod yn 12 oed, pan benderfynodd ei rhieni symud i Gymru i fod yn agosach at ei mam-gu a'i thad-cu. Bu'n byw yng Nghapel Hendre am gyfnod, cyn symud yn barhaol i Benyrheol yng Ngorseinon flwyddyn yn ddiweddarach. Mae hi'n dweud bod ei hymagwedd hyblyg ac addasadwy o ganlyniad i'w phrofiadau o symud a mynychu 3 ysgol uwchradd mewn 3 blynedd. Y drydedd ysgol a fynychodd oedd Ysgol Ramadeg i Ferched Tre-gŵyr; bu hi'n astudio yno tan flwyddyn gyntaf y Chweched Dosbarth.

Gadawodd Cheryl yr ysgol wedi iddi gael cynnig swydd mewn cwmni cyfrifeg lleol, ac ychydig fisoedd yn ddiweddarach cafodd gynnig swydd yn gweithio i gwnni General Accident Insurance; un o'r cwmnïau yswiriant mwyaf ar y pryd. Treuliodd y rhan fwyaf o'i bywyd gwaith yn hapus iawn yno, gan dreulio cyfnodau'n gweithio yno'n rhan-amser ac yna'n amser llawn wrth i'w phlant dyfu i fyny.

Priododd â Steve a chawsant 3 o blant, cyn symud i Sgeti ym 1981. Mynychodd y plant Ysgol Gynradd Sgeti, ac yna ysgolion uwchradd lleol yr Esgob Gore a'r Olchfa. Er bod Steve wedi gweithio ym mhob rhan o'r DU a thramor, roedd Cheryl yn chwarae rhan weithredol yng nghymuned Sgeti, ac mae hi wedi bod yn Gadeirydd y Llywodraethwyr yn Ysgol Gynradd Sgeti ac yn Ysgol Gynradd Parkland, yn llywodraethwr yn Ysgol Gyfun yr Olchfa ac ar hyn o bryd mae hi'n llywodraethwr yn Ysgol Gyfun yr Esgob Gore.

Yn dilyn arwain ymgyrch lwyddiannus, gyda chefnogaeth grŵp bach o rieni, i achub y tir y mae Ysgol Gynradd Sgeti yn sefyll arno heddiw rhag cael ei werthu, ac oherwydd ei bod yn cymryd rhan weithredol mewn materion cymunedol, cysylltodd y diweddar Gynghorydd June Stanton â hi, gyda gwahoddiad i sefyll mewn isetholiad lleol yn Sgeti. Roedd Cheryl o fewn trwch blewyn i gael ei hethol, ond cafodd ei hethol yn llwyddiannus ar gyfer ward Sgeti yn etholiadau lleol 2004, ac mae hi wedi bod yn falch o wasanaethu preswylwyr Sgeti ers hynny. Mae Cheryl a Steve yn dwlu ar deithio, yn enwedig i safleoedd hanesyddol yn y DU a thramor, ac mae'r ddau wrth eu bodd yn darllen nofelau trosedd yn eu hamser sbâr.