Y cyfle olaf i fwynhau mynd ar fysus am ddim yn yr haf.

Mae'r fenter arloesol wedi bod yn hynod boblogaidd dros yr haf, gan alluogi pobl i fynd ar daith i'r traeth, mynd i siopa yng nghanol y ddinas neu fynd am ddiwrnod allan gyda ffrindiau.

A chyda llu o bethau i'w gwneud dros benwythnos gŵyl y banc, mae un cyfle olaf i chi ddewis beth hoffech chi ei wneud, a gwneud yn fawr ohono drwy deithio yno ar fws am ddim.

Mae'r penwythnos bysus am ddim yn dechrau ddydd Gwener ac yn gorffen ddydd Llun gŵyl y banc a dywedodd Arweinydd y Cyngor, Rob Stewart, "Er bod y tywydd wedi ein siomi o bryd i'w gilydd, mae hi wedi bod yn haf gwych i deuluoedd sy'n chwilio am ffyrdd rhad neu am ddim o fwynhau eu hunain.

"Mae'r adborth rydym wedi'i gael yr haf hwn yn awgrymu bod y cynnig teithio am ddim wedi bod yn fwy llwyddiannus nag erioed ac mae'n wych gweld hynny.

"Fe gyflwynom y fenter arloesol hon i gefnogi teuluoedd a busnesau wrth i ni ddod allan o'r pandemig. Ond mae wedi dod i fri yn ystod yr argyfwng costau byw i helpu cynifer o bobl i gael deupen llinyn ynghyd.

"Mae hefyd wedi helpu i roi hwb i fusnesau yng nghanol y ddinas ac yn ein cyrchfannau arfordirol."

Mae ffigurau'r cyngor yn dangos bod bron 214,000 o bobl wedi manteisio ar y cynnig rhwng Gorffennaf ac Awst wedi iddo gael ei lansio yn ystod haf 2021. Cynyddodd y ffigur hwnnw i fwy na 222,000 ar gyfer yr un cyfnod yr haf canlynol.

Mae rhagor o wybodaeth am fysus am ddim yn Abertawe i'w chael yma: https://www.abertawe.gov.uk/bysusamddim