Bron i hanner miliwn o deithiau ar fysus am ddim yn ystod yr haf

Bydd cynnig bysus am ddim y ddinas yn dychwelyd ar gyfer gwyliau'r haf fis nesaf, ond mae ffigurau swyddogol newydd yn dangos sut mae'r fenter wedi annog cannoedd ar filoedd o deithiau ar fysus yn lleol.

Mae ffigurau'r cyngor yn dangos bod bron i 214,000 o bobl wedi manteisio ar y cynnig rhwng Gorffennaf ac Awst yn ystod ei lansiad yn ystod haf 2021. Cynyddodd y ffigur hwnnw i fwy na 222,000 ar gyfer yr un cyfnod yr haf canlynol.

A nawr bod y fenter wedi'i chadarnhau ar gyfer penwythnosau yn ystod gwyliau haf yr ysgol eleni hefyd, gallai nifer y defnyddwyr fod yn uwch fyth.

Dywedodd Rob Stewart, Arweinydd Cyngor Abertawe, fod y ffigurau diweddaraf yn dangos bod y cynnig bysus am ddim wedi bod yn llwyddiant ysgubol, a'i fod yn rhywbeth sydd wedi'i groesawu gan filoedd o deuluoedd sy'n ei chael hi'n anodd cael deupen llinyn ynghyd yn ystod yr argyfwng costau byw.

"Gwnaethom gyflwyno'r fenter hon i gefnogi teuluoedd a busnesau wrth i ni ddod allan o'r pandemig. Ond mae wedi dod yn arbennig o boblogaidd yn ystod yr argyfwng costau byw wrth helpu cynifer o bobl i gael deupen llinyn ynghyd.

"Mae ymateb y cyhoedd i'r cynnig bysus am ddim wedi bod yn wych." Rydym wedi clywed gan lawer o deuluoedd sydd wedi elwa ac mae'r adborth yn dangos ei fod wedi gwneud gwahaniaeth gwirioneddol.

"Mae'r ffaith fod pobl wedi manteisio ar bron i hanner miliwn o deithiau mewn dau gyfnod o wyliau'r haf yn unig yn dangos pa mor boblogaidd a defnyddiol y mae wedi bod i gynifer o bobl.

"Mae hefyd wedi helpu i roi hwb i fusnesau yng nghanol y ddinas ac yn ein cyrchfannau arfordirol."

Bydd cynnig bysus am ddim yr haf hwn yn rhedeg tan 7pm ar benwythnosau hir o ddydd Gwener 28 Gorffennaf tan ddydd Llun Gŵyl y Banc ar 28 Awst. Bydd y telerau arferol yn berthnasol sy'n golygu bod yn rhaid i deithiau ddechrau a gorffen o fewn ardal Cyngor Abertawe.