Mae diwrnod coroni'r Brenin Siarl III a'r Frenhines Gydweddog yn agosáu a gall preswylwyr Abertawe fod yn rhan o hyn drwy gynnal eu partïon stryd eu hunain.

Meddai Andrew Stevens, Aelod y Cabinet dros yr Amgylchedd ac Isadeiledd, "Nawr yw'r amser i ddechrau trefnu os ydych am ddathlu penwythnos y coroni mewn steil. I'r rhan fwyaf ohonom, hwn fydd y coroni cyntaf i'w gynnal yn ystod ein hoes felly bydd yn ddigwyddiad hanesyddol.

"Fel arfer byddai'n rhaid i breswylwyr dalu ffi i gau eu stryd neu ddefnyddio mannau agored y cyngor i gynnal dathliadau. Nid felly y bydd hi'r tro hwn. Rydym hefyd wedi hepgor y rheol chwe wythnos sydd fel arfer yn meddwl bod yn rhaid i chi gyflwyno'ch cais i ni chwe wythnos cyn eich digwyddiad.

"Ond mae tua dwsin o strydoedd o gwmpas y ddinas eisoes wedi gwneud cais i gau ffyrdd ar gyfer y digwyddiad ac rydym yn rhagweld y bydd mwy o geisiadau'n cyrraedd yn yr wythnosau sy'n dod."

Cynhelir seremoni coroni'r Brenin Siarl III a'r Frenhines Gydweddog ar 6 Mai. Hwn fydd y coroni cyntaf i'w gynnal ers coroni'r diweddar EM y Frenhines ym 1953.

Mae Llywodraeth y DU wedi cyhoeddi y bydd 8 Mai yn ŵyl banc ychwanegol.

Cewch ragor o wybodaeth yma am sut i gau ffordd ar gyfer eich parti stryd. Cynghorir unrhyw rai sy'n trefnu parti stryd i yswirio'u digwyddiad. https://www.abertawe.gov.uk/article/7957/Trefnu-parti-stryd