Rhagor o weithwyr swyddfa'n dod i weithio yng nghanol y ddinas

Byddai'r gweithwyr yn gweithio mewn hwb sector cyhoeddus arfaethedig sy'n cael ei ystyried ar gyfer ardal hen ganolfan siopa Dewi Sant.

​Bwriedir i'r hwb sector cyhoeddus ddarparu man gwaith i gannoedd o staff y Cyngor, ynghyd â gweithwyr o sefydliadau eraill yn y sector cyhoeddus a thenantiaid preifat a masnachol.

​Bydd adroddiad am yr hwb sector cyhoeddus, a gaiff ei gyflwyno gan Gyngor Abertawe mewn partneriaeth ag Urban Splash, yn cael ei ystyried gan Gabinet y Cyngor yn ddiweddarach y mis hwn.

​Disgwylir i'r gwaith i adeiladu'r hwb sector cyhoeddus ddechrau yng nghanol 2025, yn amodol ar gymeradwyaeth, ymgynghoriad a chaniatâd cynllunio.

​Os bydd cynllun yr hwb sector cyhoeddus yn mynd yn ei flaen, byddai hefyd yn galluogi ailddatblygu safle'r Ganolfan Ddinesig ar lan y môr.

​Bydd cynigion ar gyfer ailddatblygu safle'r Ganolfan Ddinesig yn cael eu cyhoeddi cyn gynted ag y cânt eu cwblhau.

​Meddai'r Cyng. Rob Stewart, Arweinydd Cyngor Abertawe, "Mae'r cyfuniad o ddatblygiadau wedi'u cwblhau, sy'n mynd rhagddynt ac arfaethedig i gyd yn rhan o'n hymrwymiad i gefnogi busnesau lleol, creu swyddi i bobl leol a chreu canol dinas fwy bywiog.

​"Bydd y gwaith i adeiladu'r hwb sector cyhoeddus, yn amodol ar gymeradwyaeth, yn dilyn cwblhau'r holl brosiectau eraill sy'n mynd rhagddynt."

​Ni fydd unrhyw staff y Cyngor yn cael eu lleoli yng nghynllun 71/72 Ffordd y Brenin. Bydd y datblygiad hwnnw'n darparu ar gyfer busnesau'r sector preifat, ac mae trafodaethau â nifer o denantiaid posib yn mynd rhagddynt yn dda.