Cyflogaeth plant

Os yw eich plentyn am gael gwaith rhan-amser cyflogedig tra'i fod yn dal yn yr ysgol mae sawl rheol yn berthnasol.

Mae rheolau a rheoliadau llym yn berthnasol i gyflogi plant, sy'n amddiffyn plant rhag unrhyw niwed neu rhag cael eu hecsbloetio. Mae'r gofynion cyfreithiol hyn yn sicrhau bod y bobl ifanc yn cael eu cofrestru'n gywir, ac nid ydynt yn ymgymryd â gwaith a allai niweidio'u hiechyd, eu rhoi nhw mewn perygl corfforol neu gael effaith niweidiol ar eu haddysg.

Yr awdurdod lleol yw'r awdurdod sy'n gyfrifol am oruchwylio plant a chanddynt swydd ran-amser ac erlyn unrhyw gyflogwr sy'n torri'r gyfraith.

Mae'n rhaid bod plentyn wedi dathlu ei ben-blwydd yn 13 oed cyn y gall wneud cais am drwydded waith. Mae'r ddeddfwriaeth yn berthnasol i bob plentyn (gan gynnwys plant y cyflogwr) dan oedran ysgol gorfodol.

Y dyddiad swyddogol ar gyfer gadael yr ysgol yw dydd Gwener olaf mis Mehefin yn y flwyddyn ysgol y mae'r disgybl yn 16 oed. Cyn y dyddiad hwn, gall pobl ifanc rhwng 13 ac 16 oed wneud cais am drwydded waith ar gyfer gwaith rhanamser. Rhaid cwblhau ffurflen gais wedi'i llofnodi gan y rheini a'r cyflogwr.

Cyfrifoldebau'r cyflogwr

Mae'n rhaid i bob plentyn o oedran ysgol a chanddo swydd ran-amser sy'n gweithio ar gyfer cyflogwr, p'un a yw'n cael ei dalu neu'n gwneud gwaith gwirfoddol, gofrestru gyda'r awdurdod lleol a chael trwydded waith. Y cyflogwr sy'n gyfrifol am wneud cais am drwydded waith er mwyn cyflogi'r plentyn.

Os ydych chi, fel cyflogwr, eisiau cyflogi plant i weithio ar eich cyfer mae'n rhaid i chi ystyried y rheolau a'r rheoliadau sy'n rheoli faint o oriau y gall y plentyn weithio, pa fath o waith y gall y plentyn ei wneud a'r math o fangre y bydd y plentyn yn gweithio ynddi.

Mae'n rhaid i'r cyflogwr lenwi ffurflen cais ar gyfer cyflogi plant, y mae'n rhaid i'r cyflogwr a rhiant / gwarcheidwad y plentyn ei llofnodi. Mae'r cais hwn yn rhoi manylion y plentyn, yr oriau gwaith, y gweithle a'r math o waith y bydd y plentyn yn ei wneud.

Mae'n rhaid i'r cyflogwr gynnal Asesiad Risg Person Ifanc penodol o unrhyw beryglon mewn perthynas â chyflogi'r plentyn, ynghyd â meddu ar yr yswiriant priodol, a rhiad iddo ddweud wrth y rhiant / gwarcheidwad am ganlyniad yr asesiad.

Am wybodaeth bellach a ffurflen gais gallwch glicio ar y dogfennau ar ochr-dde y dudalen hon neu fel arall gallwch gysylltu a'r child.employment@abertawe.gov.uk.