Y diweddaraf am Fusnes Twristiaeth - 17 Hydref 2025
Yn cefnogi adferiad ein diwydiant twristiaeth lleol
Hanner Tymor mis Hydref - lanlwythwch eich Argaeledd Hwyr
Os oes gennych unrhyw argaeledd hwyr yn ystod hanner tymor mis Hydref, cofiwch ei ychwanegu at yr adran Argaeledd Hwyr ar wefan croesobaeabertawe.com
Byddwn yn annog ymwelwyr posib sy'n awyddus i drefnu seibiant funud olaf i fynd i'r wefan neu ein cyfrifon cyfryngau cymdeithasol ar Facebook (86 mil o ddilynwyr) ac Instagram (8 mil o ddilynwyr), felly lanlwythwch unrhyw leoedd gwag funud olaf cyn gynted â phosib.
I fewngofnodi i ddangosfwrdd Croeso Bae Abertawe, cliciwch yma
Heb gofrestru i fod yn bartner Croeso Bae Abertawe eto? Ymunwch am ddim
Os oes gennych unrhyw ymholiadau, e-bostiwch tim.twristiaeth@abertawe.gov.uk
Bwletin Cyflogwyr CThEF: Hydref 2025
Mae Cyllid a Thollau Ei Fawrhydi (CThEF) yn cyhoeddi'r Bwletin Cyflogwyr chwe gwaith y flwyddyn, gan roi'r wybodaeth ddiweddaraf i gyflogwyr ac asiantiaid am bynciau a materion a all effeithio arnynt.
Mae rhifyn mis Hydref y Bwletin Cyflogwyr yn cynnwys erthyglau ar y canlynol:
- Gwneud eich taliad Cytundeb Setliad PAYE
- Arweiniad i gadwyni cyflenwi llafur sy'n cynnwys cwmnïau ymbarél
- Cyfradd Trydan Gynghorol newydd ar gyfer ceir cwmni trydan 100%
- Spotlight 71 —Rhybudd i weithwyr asiantaeth a chontractwyr sy'n cael eu symud rhwng cwmnïau ymbarél
- Ymgyrch 'Tax Help for Hustles' — adnoddau newydd i weithwyr
- Diweddariad ar adennill Taliadau Tanwydd y Gaeaf drwy'r system dreth.
Lawrlwytho'r Bwletin Cyflogwyr CThEM diweddaraf
Gorymdaith y Nadolig Abertawe
Yn galw ar grwpiau cymunedol, dawns ac ieuenctid, mae Gorymdaith y Nadolig Abertawe'n dychwelyd nos Sul 23 Tachwedd ac os oes gennych ddiddordeb mewn cymryd rhan, cysylltwch â ni i fynegi eich diddordeb heddiw!
In Conversation with Michael Sheen and Matthew Rhys(25 Tachwedd) - Tocynnau bellach ar gael
Yn dilyn y perfformiad o Playing Burtony gwerthwyd pob tocyn ar ei gyfer a Phenwythnos Celfyddydau Abertawe, mae gan gynulleidfaoedd un cyfle arall i brofi rhywbeth arbennig iawn. Mae In Conversation with Michael Sheen and Matthew Rhys yn dod â dau o actorion enwocaf Cymru at ei gilydd ar gyfer noson arbennig i gefnogi tymor agoriadol Welsh National Theatre nos Fawrth 25 Tachwedd ym Mar Pen To a Stiwdio'r Depot yn Theatr y Grand Abertawe.
Mae Matthew Rhys sydd wedi ennill gwobr Emmy yn ymuno â Michael Sheen - Cyfarwyddwr Artistig Welsh National Theatre sydd wedi cael ei enwebu am sawl gwobr Olivier - am noson bersonol ar y llwyfan lle byddant yn myfyrio ar yrfa anhygoel Richard Burton, a sut mae ei etifeddiaeth wedi eu helpu nhw i agor drysau a dod o hyd i gyfleoedd yn eu gyrfaoedd eu hunain.
Mae'r digwyddiad hwn, a fydd yn codi arian ar gyfer Welsh National Theatre, yn gyfle prin i weld dau o actorion gorau Cymru gyda'i gilydd, yn fyw ar y llwyfan. Bydd gwesteion yn mwynhau cerddoriaeth fyw yn y bar a diod am ddim, a bydd aelodau o Welsh National Theatre wrth law i drafod gwaith y cwmni yn y dyfodol.
Nifer cyfyngedig iawn o docynnau sydd ar gael.
Dyfodol beicio a theithio ar fws yng Nghymru - 19 Hydref
Yn Trafnidiaeth Cymru (TrC), rydym wedi ymrwymo i wneud teithiau ar fws a beic yn fwy cynhwysol, ymarferol a chroesawgar i bawb.
Rydym yn lansio astudiaeth i ddeall sut y gallai beiciau a bysiau weithio'n well gyda'i gilydd ledled Cymru. Mae'r astudiaeth hon yn y cyfnod cynnar - nid oes unrhyw benderfyniadau wedi'u gwneud eto. Bydd eich adborth yn helpu i arwain ein ffordd o feddwl yn y dyfodol a llunio gwelliannau posibl.
Byddwn yn gofyn:
- Sut ydych chi'n cyfuno beicio a theithio ar fws ar hyn o bryd?
- Beth fyddai'n ei gwneud hi'n haws neu'n fwy deniadol?
- A allai integreiddio gwell annog mwy o bobl i feicio neu ddefnyddio bysiau?
Mae'r arolwg ar agor o 29 Medi i 19 Hydref ac mae pob ymateb yn cyfrif - felly rhannwch yr arolwg gyda'ch cysylltiadau.
Towards Carbon Zero: Cwrs Hyfforddiant Lleihau Carbon ac Arbed Ynni ar gyfer busnesau bach a chanolig - 21 Hydref (9am-4pm), Brynmelyn Community Centre, Abertawe SA1 2BY
Wrth i'r byd ganolbwyntio ar leihau allyriadau carbon, mae gan fusnesau rôl bwysig i'w chwarae wrth gyrraedd nodau hinsawdd byd-eang. Mae ein cwrs hyfforddi'n ceisio rhoi'r wybodaeth a'r sgiliau angenrheidiol i fusnesau bach a chanolig er mwyn iddynt gyflawni niwtralrwydd carbon, meithrin y gallu i wrthsefyll newid yn yr hinsawdd a phrisiau ynni cynyddol, a chyfrannu at ddyfodol cynaliadwy.
Yn ystod y cwrs hyfforddi, bydd cyfranogwyr yn dysgu am hanfodion lleihau carbon a'r llwybr i allyriadau sero net. Byddwn yn cynnwys pynciau fel effeithlonrwydd ynni, ynni adnewyddadwy, cludiant cynaliadwy, lleihau gwastraff a mwy. Yn ogystal, byddwn hefyd yn darparu gweithgareddau ymarferol ac astudiaethau achos i helpu cyfranogwyr i ddeall sut i ddefnyddio'r cysyniadau hyn yn eu busnesau eu hunain.
Mae ein hyfforddwr, Tanya Nash o Future Clarity, yn arbenigwr ym maes cynaladwyedd a lleihau carbon. Bydd yn rhoi cyngor ac arweiniad ymarferol ar sut i fesur a lleihau allyriadau carbon, a sut i ddatblygu strategaeth lleihau carbon sydd wedi'i theilwra ar gyfer pob busnes.
Mae'r cwrs hyfforddiant hwn yn addas ar gyfer busnesau bach a chanolig o unrhyw sector sydd â diddordeb mewn lleihau eu hôl troed carbon a chyfrannu at ddyfodol mwy cynaliadwy.
Ymgynghoriad ar ddiwygiadau arfaethedig i 'Casglu Deunyddiau Gwastraff ar Wahân ar gyfer Ailgylchu: Cod Ymarfer Cymru' - 22 Hydref
Rydym wedi lansio ymgynghoriad sy'n ymwneud â'r Rheoliadau Ailgylchu yn y Gweithle a ddaeth i rym ym mis Ebrill 2024 i wella ansawdd ailgylchu a faint o wastraff a gaiff ei ailgylchu o weithleoedd.
Rydym yn ceisio barn ar ddiwygiadau arfaethedig i 'Casglu Deunyddiau Gwastraff ar Wahân ar gyfer Ailgylchu - Cod Ymarfer Cymru' sy'n darparu canllawiau ar sut i gydymffurfio â'r gofynion gwahanu ailgylchu yn y gweithle.
Mae'r diwygiadau i'r cod yn adlewyrchu diwygiadau arfaethedig i Reoliadau Gofynion Gwahanu Gwastraff (Cymru) 2023 i weithredu ymrwymiad i weithleoedd gyflwyno cyfarpar trydanol ac electronig gwastraff bach (sWEEE) ar wahân i'w gasglu a'i ailgylchu ymhellach o 6 Ebrill 2026 ymlaen. Ar hyn o bryd mae'n ofynnol i weithleoedd wahanu sWEEE heb ei werthu yn unig.
Mae mân ddiweddariadau eraill i'r cod o fewn cwmpas y polisi gwreiddiol wedi'u gwneud i adlewyrchu bod esemptiad ar gyfer ysbytai wedi dod i ben ac i wella eglurder a chysondeb yn dilyn adborth ers i'r rheoliadau ddod i rym ym mis Ebrill 2024.
Mae'r ymgynghoriad ar agor am gyfnod o 12 wythnos, gan gau Dydd Mercher 22 Hydref 2025. Unwaith y bydd yr holl ymatebion wedi'u hystyried, bydd crynodeb o'r ymatebion yn cael ei gyhoeddi ar ein gwefan.
Bydd yr ymatebion i'r ymgynghoriad hwn yn llywio gwaith drafftio terfynol y diwygiadau i'r cod a'r diwygiadau arfaethedig i Reoliadau Gofynion Gwahanu Gwastraff (Cymru) 2023.
Dylid anfon unrhyw ymholiadau at flwch postYmgyngoriadau Diwygiadau Ailgylchu / Recycling Reforms Consultations:
YmgyngoriadauDiwygiadauAilgylchu@llyw.cymru
BlasCymru / TasteWales 2025: Cwrdd â'r cyflenwr - 22-23 Hydref, ICC Cymru
Bydd digwyddiad masnach bwyd a diod rhyngwladol Cymru, BlasCymru/TasteWales, yn cael ei gynnal ar 22 a 23 Hydref 2025.
Mae'r digwyddiad deuddydd a drefnir gan is-adran Bwyd a Diod Cymru Llywodraeth Cymru yn dod â chynhyrchwyr bwyd a diod a phrynwyr cenedlaethol a rhyngwladol a gweithwyr proffesiynol y diwydiant bwyd at ei gilydd.
Mae'r digwyddiad, a gynhelir yn ICC Cymru yng Nghasnewydd, wedi bod yn allweddol mewn blynyddoedd blaenorol o ran creu cyfleoedd busnes newydd i fusnesau Cymreig ac mae wedi gweld cynnyrch o Gymru yn cael ei anfon o amgylch y byd i bobl ei fwynhau.
Mae bod yn y digwyddiad yn galluogi busnesau i ddod i gysylltiad, rhwydweithio a chynyddu eu proffil brand gyda chynhyrchwyr allweddol, prynwyr yn y DU ac yn rhyngwladol, yn ogystal â gweithwyr proffesiynol ehangach y diwydiant.
Am ragor o wybodaeth neu i gofrestru i fynychu, anfonwch e-bost at: bwydadiodcymru@mentera.cymru
Sgiliau I Abertawe - 23 Hydref
Mae Sgiliau ar gyfer Abertawe yn cynnig sesiynau hyfforddi hanner diwrnod am ddim sydd wedi'u cynllunio i ddatblygu sgiliau digidol unigolion sy'n byw neu'n gweithio yn Abertawe.
Oes gennych chi ddiddordeb mewn ymuno ag un o'n gweithdai am ddim? Porwch ein sesiynau sydd i ddod a gwnewch gais i ymuno isod.
Ariennir y prosiect hwn gan Gronfa Ffyniant a Rennir y DU.
Rhaid i chi fod yn 19 oed neu hŷn, yn byw neu'n gweithio yn Abertawe heb fod mewn addysg llawn amser. Preswylwyr neu weithwyr Abertawe 19+ oed sy'n ceisio gwella eu sgiliau llythrennedd digidol a thechnoleg.
Dyddiadau A Thestunau:
- Iau 23 Hydref - Trin Data
- Iau 20 Tachwedd - Gweithio Gwell gydag Offer Digidol
- Iau 4 Rhagfyr - Sylfeini Rhaglennu
Cronfa Lliniaru Effeithiau'r Tywydd ar gyfer Busnesau Twristiaeth a Lletygarwch Bach 2025-2026 - 27 Hydref
Mae Croeso Cymru yn lansio rownd arall o gyllid o dan y Gronfa Addasu i'r Tywydd sy'n cynnig grantiau i fusnesau Twristiaeth a Lletygarwch Bach i wella amodau masnachu a darparu croeso cynnes i ymwelwyr, beth bynnag fo'r tywydd.
Mae adborth diweddar gan fusnesau twristiaeth a lletygarwch yn dweud wrthym mai tywydd gwael ac anrhagweladwy yw un o'r prif resymau dros gael llai o ymwelwyr. Mae llawer mwy o westeion bellach yn archebu munud olaf neu'n canslo teithiau yn dibynnu ar ragolygon y tywydd. Bydd busnesau a chyrchfannau sy'n gallu cynnig profiadau gwych ym mhob tywydd yn fwy gwydn a deniadol i ymwelwyr.
Mae grantiau rhwng £5,000 a £20,000 ar gael i gefnogi'r gwaith o osod mesurau sy'n gwarchod rhag y tywydd, megis gorchuddio ardaloedd awyr agored, podiau bwyta, ailwynebu a draenio ynghyd ag offer a chyfleusterau sy'n cynnig profiadau gwell ymhob tywydd.
Gall y grant gefnogi hyd at 75% o gostau'r mesurau addasu i'r tywydd (neu hyd at £20,000 os yw hyn yn llai na 75% o'r costau).
Rhaid i brosiectau gael eu cwblhau, eu talu a'u hawlio erbyn 13 Mawrth 2026.
Y dyddiad cau ar gyfer y rownd hon yw 1pm 27 Hydref.
Darllenwch y Canllawiau i gael rhagor o wybodaeth ac i lawrlwytho'r ffurflen gais
Swyddi gwag cyfredol: Swyddog Prosiect Tirwedd Cenedlaethol Gŵyr - 28 Hydref
Mae Cyngor Abertawe yn chwilio am unigolyn angerddol ac ymroddedig i ymuno â'n Tîm Cefn Gwlad fel swyddog prosiect rhan-amser, sy'n gweithio ym Mhenrhyn Gŵyr. Mae hon yn swydd dros dro a ariennir gan grant tan o leiaf 31 Mawrth 2027, gan weithio 3 diwrnod yr wythnos.
Byddwch yn chwarae rôl allweddol wrth gyflawni prosiectau sy'n cefnogi cadwraeth a gwella Tirwedd Genedlaethol Gŵyr, gan gyfrannu at weithredu yn yr hinsawdd, adferiad natur, ac ymgysylltu â'r gymuned. Bydd yr ymgeisydd llwyddiannus yn gweithio'n strategol gyda rhanddeiliaid gan gynnwys Llywodraeth Cymru, Cyfoeth Naturiol Cymru, a'n partneriaid cyflenwi lleol.
Dyddiad cau: 28 Hydref
Enillwch £5,000 i dyfu eich busnes ar y stryd fawr - 30 Hydref
Mae Realising the Remarkable yn ôl! Mae Enterprise Nation a VistaPrint yn dod ynghyd eto i hyrwyddo busnesau annibynnol ar y stryd fawr yn y Deyrnas Unedig.
Os ydych chi'n rhedeg siop, caffi neu unrhyw safle masnachol arall, dyma'ch cyfle i gymryd y cam beiddgar nesaf.
Bydd y gronfa'n dosbarthu £30,000 i fusnesau manwerthu annibynnol bach yn y DU i'w helpu i wireddu eu huchelgeisiau busnes. Bydd chwe busnes manwerthu bach yn cael £5,000 yr un.
I fod yn gymwys i wneud cais, rhaid i'ch busnes:
- fod wedi'i leoli yn y DU a bod â chyfrif banc busnes yn y DU
- bod yn fusnes masnachol cofrestredig, heb fwy na thri safle masnachol ffisegol
- bod â llai na 50 o weithwyr
- bod wedi bod yn masnachu am o leiaf chwe mis
- os gofynnir am hyn, bod yn barod i rannu'r stori lwyddiant ynghylch sut y defnyddiodd ei grant (gall VistaPrint ddefnyddio a/neu gyhoeddi'r manylion hyn ymhellach at wahanol ddibenion megis marchnata, hysbysebu a chysylltiadau cyhoeddus)
Darganfyddwch fwy a gwnewch gais erbyn 30 Hydref: Realising the Remarkable | Win a grant for your high-street business | Enterprise Nation
Rhaglen Gweminarau Rhad ac Am Ddim Dydd Sadwrn y Busnesau Bach yn dychwelyd: 3 Tach - 3 Rhag
Mae'r Daith 2025 yn dechrau fis nesaf!
Ochr yn ochr â'r Daith Sadwrn y Busnesau Bach flynyddol i ddathlu'r holl fusnesau bach epig, bydd Dydd Sadwrn y Busnesau Bach hefyd yn darparu rhaglen helaeth o weithdai dyddiol rhithwir am 11am rhwng 3 Tachwedd a 3 Rhagfyr.
Gan ymdrin â phynciau hanfodol fel marchnata ar gyllideb, rheoli amser, cyllid, ac offer digidol newydd fel deallusrwydd artiffisial, byddwch yn cael awgrymiadau a mewnwelediadau ymarferol gan arbenigwyr yn y diwydiant.
I gael mwy o wybodaeth ac i gofrestru ar gyfer y gweminarau, cliciwch ar y ddolen ganlynol: Small Business Saturday UK | Another year making a Big Difference!
Gweminarau hydref Croeso Cymru 2025
Yr hydref hwn, bydd Croeso Cymru yn cynnal cyfres o weminarau diwydiant sydd wedi'u cynllunio i gefnogi a llywio busnesau twristiaeth ledled Cymru. Gan gwmpasu amrywiaeth o bynciau defnyddiol, bydd y sesiynau ar-lein hyn yn cynnig mewnwelediadau ymarferol ac arweiniad i'ch helpu i gynllunio ar gyfer y misoedd i ddod, cyfres werthfawr sydd wedi'i chynllunio i'ch cadw'n wybodus ac eich ysbrydoli.
- Cymru ar lwyfan y byd: Pŵer Digwyddiadau Mawr - 6 Tachwedd (2:00 yp - 3:00 yp)
- Diweddariad marchnata Blwyddyn Croeso ac ymgyrch Hwyl - 13 Tachweddd (2:00 yp - 3:30 yp)
- Datgloi Pŵer Digwyddiadau: Cyfle drwy gydol y flwyddyn i Gymru - 4 Rhagfyr (2:00 yp - 3:00 yp)
Cadwch y dyddiad ar gyfer Wythnos Hinsawdd Cymru 2025: 3-7 Tach
Mae Wythnos Hinsawdd Cymru yn dychwelyd eleni, o 3 Tachwedd hyd at 7 Tachwedd, gan ddod â phobl Cymru at ei gilydd i siarad, cynllunio a gweithredu ar y penderfyniadau hinsawdd pwysicaf.
Ar beth fyddwn ni'n ei ganolbwyntio eleni? Gyda'r cynllun 5 mlynedd nesaf yn cael ei ddatblygu, mae angen i ni edrych ar y newidiadau y gellir eu gwneud mewn meysydd lle mae gan Gymru'r pŵer i arwain a'r cyfle i ffynnu - o sut rydyn ni'n teithio, i sut rydyn ni'n gwresogi ein cartrefi, tyfu ein bwyd a gofalu am ein tir.
Felly, p'un a ydych chi'n dod o'r sector cyhoeddus; diwydiant neu fyd busnes; yn gweithio yn y gymuned, neu'n aelod o'r cyhoedd sydd eisiau gwneud gwahaniaeth, gallwch gymryd rhan drwy:
- Ymuno â sesiynau byw ar-lein
- Cymryd rhan mewn digwyddiadau lleol, neu gynnal digwyddiad eich hun
- Ymuno â'r sgwrs ar y cyfryngau cymdeithasol gan ddefnyddio #WythnosHinsawddCymru a #WalesClimateWeek
Am fwy o wybodaeth, dilynwch y ddolen hon: Cadwch y dyddiad ar gyfer Wythnos Hinsawdd Cymru.
Mae'r Addewid Twf Gwyrdd yn helpu busnesau Cymru i gymryd camau gweithredol tuag at wella eu cynaliadwyedd, gan ddangos yr effaith gadarnhaol maent yn ei chael ar bobl a lleoedd o'u cwmpas. Cofrestrwch heddiw: Addewid Twf Gwyrdd | Busnes Cymru (llyw.cymru).
Cymru yn lansio ymgynghoriad ar Gynllun Dychwelyd Ernes - 10 Tachwedd
Bydd yr ymgynghoriad 12 wythnos, sy'n para tan 10 Tachwedd, yn llywio dull Cymru o weithredu cynllun sy'n cynnwys cynwysyddion diodydd gwydr ac yn blaenoriaethu ailddefnyddio dros ddulliau ailgylchu traddodiadol.
Gyda Chymru eisoes â'r ail gyfradd ailgylchu uchaf yn y byd, mae'r cynllun dychwelyd ernes hwn yn adeiladu ar y llwyddiant hwnnw drwy gefnogi'r newid i ailddefnyddio, sy'n darparu llawer mwy o fanteision amgylcheddol nag ailgylchu yn unig.
Mae tystiolaeth ryngwladol yn dangos bod ailddefnyddio yn lleihau cost deunyddiau i gynhyrchwyr wrth ddarparu llwybrau clir i ddatgarboneiddio. Mae'r ymgynghoriad yn archwilio sut y gall cynnwys gwydr fynd i'r afael â sbwriel, gwella seilwaith ailgylchu wrth fynd, a chreu cyfleoedd economaidd drwy ailddefnyddio.
Mae ymgysylltu helaeth â rhanddeiliaid, gan gynnwys cynhadledd genedlaethol a gweithdai sector-benodol, wedi llywio datblygiad yr ymgynghoriad. Bydd y cynllun yn ategu'r polisïau amgylcheddol presennol ac yn cefnogi taith Cymru tuag at sero net.
Daw'r ymgynghoriad i ben ar 10 Tachwedd 2025.
Mae'r manylion llawn ar gael yma: Cyflwyno Cynllun Ddychwelyd Ernes ar gyfer cynwysyddion diodydd yng Nghymru | LLYW.CYMRU
Diwrnod Bwyd Lleol Abertawe (rhan o Gynhadledd yr Economi Werdd) - 13 Tachwedd, Arena Abertawe
Ydych chi'n gynhyrchydd bwyd a diod, yn ffermwr, yn dyfwr, neu'n fusnes lletygarwch yn ardal Abertawe? Yna nodwch y dyddiad yn eich calendr a chofrestrwch i ymuno â ni ar gyfer digwyddiad am ddim a gynlluniwyd i'ch helpu i ffynnu yn yr economi fwyd leol.
Mae Diwrnod Bwyd Lleol eleni, a drefnwyd mewn cydweithrediad â Chyngor Abertawe, Cywain a Bwyd Abertawe, yn rhan o'r Gynhadledd ac Arddangosfa Economi Werdd flynyddol ac mae'n gyfle i chi gysylltu, dysgu, a darganfod ffyrdd newydd o gryfhau eich busnes drwy gynaliadwyedd a dod o hyd i nwyddau lleol.
Uchafbwyntiau'r Digwyddiad:
- O'r Pridd i'r Plât - ymunwch â Jonathan Woolway, Cogydd Gweithredol ym mwyty The Shed yn Abertawe, a fydd yn siarad am ei daith ysbrydoledig. Dysgwch yn uniongyrchol sut i fanteisio i'r eithaf ar gynnyrch lleol, o feithrin perthnasoedd llwyddiannus â ffermwyr a thyfwyr lleol i weithredu dull 'trwyn wrth gynffon' sy'n lleihau gwastraff ac yn cynnig arloesedd bwydlen.
- Rhwydweithio a Blasu - cysylltwch â chyfoedion a phartneriaid posib yn ystod sesiwn rwydweithio anffurfiol. Rhowch gynnig ar fwydydd hynod flasus gan fusnesau lleol a gwnewch gysylltiadau gwerthfawr.
- Cymorth ar gyfer eich Busnes - cewch drosolwg cyflym a gwerthfawr o'r cymorth a'r adnoddau hanfodol sydd ar gael i'ch sector gan Cywain, Cyswllt Ffermio a'r Clwstwr Garddwriaeth.
- Prifysgol Abertawe - Prosiect Llwybrau Bwyd Newydd - cyfle i glywed am brosiect newydd cyffrous gan Brifysgol Abertawe a sut y gallai effeithio ar ddyfodol bwyd yn ein rhanbarth - a chewch gymryd rhan wrth lunio ei gynlluniau a'i weithgareddau.
Ni ddylai'r rheini sy'n ymroddedig i ansawdd, cynaliadwyedd a thwf diwydiant bwyd a diod Abertawe golli'r digwyddiad am ddim hwn.
Cofrestrwch eich presenoldeb drwy lenwi'r ffurflenni cofrestru ar gyfer Cynhadledd yr Economi Werdd (i ganiatáu mynediad i'r Arena) ac ar gyfer Diwrnod Bwyd Lleol Abertawe.
Cam 1: Cofrestru ar gyfer Cynhadledd yr Economi Werdd
Cam 2: Cofrestru ar gyfer Diwrnod Bwyd Lleol Abertawe
Lansio ymgynghoriad i roi mwy o hyblygrwydd i lety gwyliau - agor tan 20 Tachwedd
Mae cynigion newydd wedi cael eu hawgrymu i addasu'r ffordd y mae rheolau treth ar gyfer perchnogion llety gwyliau hunanddarpar yn cael eu cymhwyso.
Ers mis Ebrill 2023, rhaid i eiddo hunanddarpar fod ar gael am 252 diwrnod a'u gosod am 182 diwrnod bob blwyddyn i dalu ardrethi annomestig yn hytrach na'r dreth gyngor. Cafodd y rheolau eu cyflwyno i sicrhau bod perchnogion eiddo yn gwneud cyfraniad teg at eu cymuned leol.
Mae Llywodraeth Cymru yn ceisio barn ar ddau newid allweddol i'r ffordd y mae'r rheolau'n cael eu cymhwyso, er mwyn rhoi sefydlogrwydd ychwanegol i'r sector:
- Caniatáu i berchnogion llety gwyliau ddefnyddio 182 diwrnod ar gyfartaledd dros sawl blwyddyn. Mae hyn yn golygu y byddai'r rhai sydd wedi colli'r cyfle, o drwch blewyn, i osod eu llety gwyliau am 182 diwrnod yn y flwyddyn ddiweddaraf yn aros ar ardrethi annomestig os oeddent wedi ei gyflawni ar gyfartaledd dros ddwy neu dair blynedd flaenorol.
- Caniatáu hyd at 14 diwrnod o wyliau am ddim a roddir i elusen i gyfrif tuag at y targed o 182 diwrnod.
Mae'r ymgynghoriad yn gofyn hefyd a ddylai cynghorau ystyried rhoi mwy o amser i fusnesau addasu, megis cyfnod gras o 12 mis cyn y gallent orfod talu cyfraddau treth gyngor uwch pan fyddant yn symud o ddosbarthiad annomestig i ddosbarthiad domestig.
Mae'r ymgynghoriad ar agor tan 20 Tachwedd.
Cofrestr cenedlaethol i llety ymwelwyr a'r ardoll ymwelwyr - 25 Tach (2pm)
Daeth y Ddeddf Llety i Ymwelwyr (Cofrestru ac Ardoll) yn gyfreithiol ym mis Medi 2025.
Mae'r gyfraith yn rhoi'r dewis i gynghorau Cymru gyflwyno ardoll ymwelwyr o fis Ebrill 2027.
O hydref 2026 ymlaen, yn unol â'r gyfraith rhaid i unrhyw un sy'n codi tâl ar ymwelwyr dros nos yng Nghymru gofrestru gydag Awdurdod Cyllid Cymru (ACC). Mae cofrestru yn angenrheidiol i bawb sy'n codi tâl am arosiadau dros nos, o westai a bythynnod gwyliau, i wersylloedd a gosodiadau achlysurol yn ystod digwyddiadau mawr.
Mae ACC yn gyfrifol am redeg y gwasanaeth cofrestru a rheoli'r ardoll ymwelwyr ar ran cynghorau.
Mae ACC yn cynnal gweminarau ym mis Tachwedd i'ch helpu i baratoi ar gyfer y newidiadau. Fe gewch:
- Ddiweddariadau ar gofrestru llety ymwelwyr a'r ardoll ymwelwyr
- Canllawiau ymarferol ar yr hyn sydd angen i chi ei wneud
- Atebion i'ch cwestiynau gan arbenigwyr ACC
Cofrestr cenedlaethol i llety ymwelwyr a'r ardoll ymwelwyr
Swyddfa'r Comisiynydd Gwybodaeth yn rhannu awgrymiadau ar gyfer seiberddiogelwch i fusnesau bach
Gyda ymosodiadau seiber ar y newyddion yn rheolaidd, mae Swyddfa'r Comisiynydd Gwybodaeth (ICO) yn atgoffa busnesau i wirio bod ganddyn nhw y mesurau diogelwch priodol yn eu lle i ddiogelu gwybodaeth bersonol.
Yn ôl Ffigyrau llywodraeth y Deyrnas Unedig (DU) fe amcangyfrifir bod busnesau wedi profi 7.7 miliwn o droseddau seiber dros y flwyddyn ddiwethaf. Mae'r rhan fwyaf o fusnesau bach yn cadw gwybodaeth bersonol ac yn rhedeg eu gwaith yn ddigidol. Mae'n gwbl hanfodol felly bod seiberddiogelwch yn flaenoriaeth i'r busenesau bach hynny.
Dyma rai camau ymarferol y gall busnesau a'u staff eu cymryd i wella eu diogelwch a'u gwytnwch data:
- Gwneud copi wrth gefn o'ch data.
- Defnyddio cyfrineiriau cryf a dilysiad (authentication) sy'n defnyddio sawl ffactor.
- Byddwch yn ymwybodol o'r hyn sydd o'ch cwmpas..
- Byddwch yn wyliadwrus o negeseuon e-bost amheus.
- Gosodwch amddiffyniad gwrth-firws a malware a'i gadw'n gyfredol.
- Amddiffynnwch eich dyfais pan na fydd goruchwyliaeth.
- Gwnewch yn siŵr bod eich cysylltiad Wi-Fi yn ddiogel.
- Sicrhewch mai dim ond y rhai sydd angen gwneud hynny sy'n cael mynediad.
- Cymerwch ofal wrth rannu eich sgrin ag eraill a byddwch yn ofalus wrth anfon negeseuon e-bost at sawl person.
- Peidiwch â chadw data am fwy o amser nag sydd ei angen arnoch.
- Gwaredwch hen offer Technoleg Gwybodaeth a chadwch a'ch ffeiliau yn ddiogel.
Os ydy sefydliad yn profi tor ddiogelwch data o ganlyniad i ymosodiad seiber, dylent adrodd amdano wrth yr ICO o fewn 72 awr ar ôl dod yn ymwybodol ohono.
I dderbyn mwy o gyngor ar ddiogelu gwybodaeth bersonol, ewch i'w canllawiau diogelwch ar gyfer sefydliadau.
I dderbyn mwy o gymorth ar seiberddiogelwch, ewch i wefan y Ganolfan Seiberddiogelwch Genedlaethol a'r rhaglen Cyber Essentials, cynllun ardystio a gefnogir gan Lywodraeth y DU sy'n helpu i gadw data eich sefydliad a'ch cwsmeriaid yn ddiogel rhag ymosodiadau seiber.
Mae cymorth hefyd ar gael ar gyfer pobl, busnesau a gwasanaethau cyhoeddus er mwyn lleihau'r risg o ymosodiadau seiber ar gael ar Cyngor ac arweiniad ar seiberddiogelwch | LLYW.CYMRU.
Rhaglen Sgiliau Hyblyg
Uwchsgilio eich gweithwyr gyda Phrosiectau Partneriaeth y Rhaglen Sgiliau Hyblyg.
Mae'r Rhaglen Sgiliau Hyblyg yn fenter a ariennir gan Lywodraeth Cymru sy'n cefnogi busnesau ledled Cymru i fuddsoddi ynddyn nhw eu hunain a meithrin gweithlu cryfach a mwy medrus.
Gall cyflogwyr wneud cais am gyllid i dalu am 50% o'r costau hyfforddi achrededig, a gall bob cais ofyn am hyd at £50,000 o gyfraniad. Nid oes isafswm i faint o gyllid y gellir ei roi.
P'un a ydych chi'n bwriadu llenwi bylchau sgiliau, cadw staff, neu ddenu talent newydd, gall y Rhaglen Sgiliau Hyblyg eich helpu i fuddsoddi yn nyfodol eich tîm.
Hyrwyddwch eich busnes twristiaeth neu letygarwch am ddim ar wefan croesobaeabertawe.com
Ydych chi'n fusnes twristiaeth neu letygarwch yn Ninas a Sir Abertawe?
Os felly, gallech fod yn gymwys i gael eich cynnwys ar wefan swyddogol y cyrchfan, croesobaeabertawe.com, am ddim.
Mae'r wefan, a gynhelir gan Dîm Twristiaeth Cyngor Abertawe, yn cael ei defnyddio ar gyfer ymgyrchoedd drwy gydol y flwyddyn er mwyn denu ymwelwyr newydd ac ymwelwyr dychwel i'r ardal.
Gall gweithredwyr llety lleol, atyniadau, darparwyr gweithgareddau a busnesau bwyd a diod sydd am ddod yn bartneriaid Croeso Bae Abertawe a manteisio ar amrywiaeth o fuddion restru eu busnes am ddim.
Gallwch gael rhagor o wybodaeth drwy e-bostio Tim.Twristiaeth@abertawe.gov.uk neu cofrestrwch eich busnes yma.
Digwyddiadau gwych sy'n dod i Fae Abertawe yn 2025:
25-26 Hydref: Gŵyl Wyddoniaeth Abertawe
25 Hydref: Ysbrydion yn y Ddinas
27-31 Hydref: Trên Bwganod Nos Galan Gaeaf
5 Tach: Arddangosfa Tân Gwyllt Cyngor Abertawe
20-23 Tach: Ffair Nadolig Fictoraidd Abertawe
21 Tach - 4 Iona: Gwledd y Gaeaf ar y Glannau
23 Tach: Gorymdaith y Nadolig Abertawe
Oedd y diweddariad hwn ar y fasnach dwristiaeth yn ddefnyddiol? Rhannwch ef neu cysylltwch â Geraldine.Williams@abertawe.gov.uk
Rhannu'r dudalen hon
Argraffu
