Prosiectau teithio llesol cyfredol

Map Rhwydwaith Teithio Llesol Abertawe - dweud eich dweud

Mae ein cynlluniau wedi'u rhannu'n ddau gategori:

1. Cynlluniau sy'n cael eu cyflawni - mae'r cynlluniau hyn wedi derbyn cyllid a byddant yn cael eu cyflawni eleni, yn amodol ar gymeradwyaeth.
2. Cynlluniau sy'n cael eu datblygu - cynlluniau arfaethedig yw'r rhain sydd ar gam cynharach astudiaethau dichonoldeb, dylunio ac ymgysylltu â rhanddeiliaid.

Gan ddibynnu ar ei gymhlethdod neu faint, gall cynllun gael ei ddatblygu am sawl blwyddyn cyn ei fod ar gam lle'r ydym yn barod i wneud cais am gyllid i adeiladu'r llwybr newydd.

Cynlluniau sy'n cael eu darparu eleni

Gwelliannau i lwybr beicio'r RhBC4

Mae llwybr Dyffryn Clun yn rhan o Lwybr 4 y Rhwydwaith Beicio Cenedlaethol. Mae'r llwybr yn rhedeg o Blackpill i Dregŵyr.

Mae'n llwybr teithio llesol allweddol sy'n cysylltu cymunedau gwahanol ac fe'i defnyddir yn aml ar gyfer cymudo a theithiau hamdden. Dywedodd defnyddwyr wrthym fod y llwybr yn anwastad, yn dioddef o lifogydd a'i fod yn aml yn brysur. Yn y gorffennol, gwnaethom ehangu ac ailwynebu llwybr Dyffryn Clun rhwng Blackpill a Chilâ. Eleni, byddwn yn parhau â'r gwaith hwn, gan wella'r rhan nesaf o'r llwybr rhwng Cilâ a Dyfnant, sef pellter o 1.55km.

Bydd y llwybr yn cael ei ehangu a'i ailwynebu, a bydd seddi newydd a systemau draenio gwell i leihau achosion o lifogydd. Bydd y gwaith hwn yn gwella'r profiad o ddefnyddio'r llwybr ac yn galluogi mwy o bobl i deithio'n llesol. Ein huchelgais yw parhau â'r gwelliannau yn Nhregŵyr yn y dyfodol, yn amodol ar gyllid.

Disgwylir i'r gwaith ddechrau ar ddechrau mis Ionawr 2026, a bydd yn cymryd oddeutu deufis i'w gwblhau. Mae'n debygol y bydd angen cau'r llwybr am gyfnod yn ystod y gwaith adeiladu, fodd bynnag, byddwn yn ymdrechu i darfu ar bobl cyn lleied â phosib. Bydd rhagor o fanylion am gau'r llwybr yn cael eu cyhoeddi yn y man.

Gwelliannau i lwybr beicio'r RhBC4 - Cilâ i Ddyfnant (PDF, 1 MB)

Cyswllt Derwen Fawr i Gilâ

Bydd y cynllun hwn yn darparu llwybr teithio llesol oddi ar y ffordd sy'n cysylltu cymunedau Cilâ, Derwen Fawr a'r Olchfa, drwy ailwynebu'r llwybr a adwaenir fel Old Carriage Drive. Bydd yr arwyneb newydd 750 metr o hyd a 3 metr o led yn hwyluso cerdded, olwyno a beicio rhwng y cymunedau.  Bydd y cynllun hefyd yn cyfrannu at ein huchelgais o ddarparu mynediad i lwybr Dyffryn Clun yng Nghilâ ac oddi arno heb orfod defnyddio'r man mynediad lletchwith yn The Railway Inn.

Gan fod rhan o'r llwybr ar lethr, bydd stribyn carlamu 2 fetr o led ar gyfer marchogion. Bydd gât mynediad newydd yn cael ei gosod i reoli mynediad i gerbydau. Bydd bolardiau yn cael eu gosod i reoli cyflymder, a bydd paneli gwybodaeth newydd yn cael eu darparu i dynnu sylw at dreftadaeth hanesyddol yr ardal. Bydd dau gwlfer presennol yn cael eu cryfhau a bydd seddi newydd yn cael eu gosod i ddarparu mannau gorffwys. Bydd gwelliannau ecolegol amrywiol (megis blychau adar) hefyd yn cael eu hychwanegu fel rhan o'r cynllun.

Disgwylir i'r gwaith ddechrau ar ddiwedd mis Ionawr 2026 a bydd yn cymryd oddeutu deufis i'w gwblhau. Bydd angen cau'r llwybr yn ystod y gwaith adeiladu. Byddwn yn ymdrechu i darfu ar bobl cyn lleied â phosib. Bydd rhagor o fanylion am gau'r llwybr yn cael eu cyhoeddi yn y man.

Cyswllt Derwen Fawr i Gilâ (map) (PDF, 2 MB)

Gwelliannau i Fynediad a Chreu Lleoedd

Bydd y cynllun hwn yn parhau â'r gwaith o ddarparu gwelliannau mynediad a chreu lleoedd yn ardal Sandfields. Ei nod yw gwneud y strydoedd yn fwy hygyrch a deniadol ar gyfer cerdded, olwyno a beicio. Mae gwaith arfaethedig yn cynnwys cael gwared ar rwystrau ffisegol, gosod cyrbau isel, gwella croesfannau i gerddwyr ac ychwanegu planwyr i wella mannau cyhoeddus. 

Parcio Beiciau

Bydd isadeiledd parcio beiciau newydd yn cael ei gyflwyno ar draws Abertawe mewn lleoliadau allweddol a gerllaw llwybrau teithio llesol. Gallai hyn gynnwys podiau parcio beiciau preswyl i helpu i oresgyn heriau storio beiciau ar gyfer preswylwyr nad oes ganddynt lawr o le dan do, drwy ddarparu cyfleusterau storio awyr agored diogel ar eu cyfer.

Cael Gwared ar Rwystrau

Bydd rhwystrau nad ydynt yn cydymffurfio ar hyd y llwybr teithio llesol yn cael eu dileu neu eu disodli i sicrhau hygyrchedd i bawb. Mae enghreifftiau o rwystrau nad ydynt yn cydymffurfio yn cynnwys gatiau neu folardiau sy'n rhwystro pramiau neu gadeiriau olwyn rhag mynd heibio.

Cynlluniau sy'n cael eu datblygu ar gyfer y blynyddoedd i ddod

Comin Clun

Bydd y llwybr defnydd a rennir newydd hwn yn rhedeg ar hyd ochr ddeheuol y B4436 dros Gomin Clun, rhwng y Mayals a Llandeilo Ferwallt. Mae e' tua 2.5km o hyd a bydd yn 3m o led. Bydd yn darparu llwybr oddi ar y ffordd a fydd yn cysylltu Ysgol Gyfun Llandeilo Ferwallt â llwybr Mayals a adeiladwyd yn ddiweddar, gan alluogi pobl sy'n byw yn ardaloedd Llandeilo Ferwallt a Murton i gael mynediad at y rhwydwaith teithio llesol ehangach i'r Mwmbwls, Abertawe a thu hwnt drwy Lwybr Beicio Cenedlaethol 4.

• Prif ran y comin (Comin Clun - map defnydd a rennir arfaethedig) (PDF, 266 KB)
• Dadansoddiad o ran Northway, rhwng y comin a Murton Green (Comin Clun - map defnydd a rennir arfaethedig) (PDF, 857 KB)
• Murton Green Road (Comin Clun - map defnydd a rennir arfaethedig) (PDF, 242 KB)

Cyswllt Pontarddulais

Mae'r cynllun hwn yn cynnwys nifer o ymyriadau sy'n cael eu cyflwyno dros sawl blwyddyn, a bydd yn cysylltu tref Pontarddulais â'r rhwydwaith teithio llesol presennol, ac yn hwyluso teithiau i Sir Gaerfyrddin, sy'n ffinio â Phontarddulais, ac oddi yno. 

Bydd llwybrau'n cysylltu ardaloedd preswyl allweddol Pontarddulais ag ysgolion, gorsaf drenau Pontarddulais, cyfleusterau hamdden, unedau manwerthu ac i'r de drwy'r coridor teithio llesol newydd sy'n ymuno â gweddill rhwydwaith Abertawe. 

Casllwchwr i Dregŵyr

Cynigir llwybr a rennir 3m o led newydd i gerddwyr a beicwyr i gysylltu Tregŵyr â Llwchwr, tua 2km o hyd, i wella cysylltedd rhwng y ddwy gymuned sy'n profi toriad a achosir gan yr A484. Bydd y llwybr yn darparu mynediad i Ganolfan Hamdden Elba, Canolfan Feddygol Tregŵyr, Tesco Express, dwy eglwys a maes gwersylla Clwb Carafannau a Chartrefi Modur.

Bydd y cynllun hwn yn cael ei gyflwyno ar draws dau gam. Bydd Cam Un yn cynnwys rhan ddeheuol y llwybr o Dregŵyr. Bydd yn cychwyn o Ffordd Beck (wrth fynedfa Cyfadeilad Chwaraeon Elba) a bydd yn pasio'r caeau chwarae ac yn ymuno â Pont Y Cob Road, lle bydd yn parhau i Bont yr Ynys. Bydd Cam Dau yn cynnwys disodli Pont yr Ynys bresennol sydd ag un lôn a pharhau ar hyd Culfor Road a chysylltu â Llwchwr.

Pen-clawdd i Dregŵyr

Mae'r cynllun hwn yn ceisio cwblhau cyswllt coll mewn darpariaeth teithio llesol rhwng cymunedau Pen-clawdd a Thregŵyr ar hyd y B4295, lle mae'n rhaid i gerddwyr ddefnyddio troedffordd gul ar hyn o bryd, tra bod yn rhaid i feicwyr ailymuno â ffordd gerbydau. Bydd y cynllun hwn yn gwella opsiynau teithio llesol i breswylwyr Pen-clawdd, gan ddarparu cysylltedd â Thregŵyr a chynnig mynediad ehangach i'r rhwydwaith teithio llesol drwy Lwybr 4 y Rhwydwaith Beicio Cenedlaethol. Unwaith y bydd wedi'i gwblhau, bydd y cynllun hefyd yn galluogi mwy o fynediad i ardal Gŵyr.

Y Crwys i Ddyfnant a Chilâ Uchaf

Mae'r cynllun hwn yn ceisio darparu llwybr teithio llesol diogel rhwng cymunedau'r Crwys, Dyfnant a Chilâ Uchaf. Mae llwybrau presennol drwy Dunvant Road a Tirmynydd Road yn brin o droedffyrdd a darpariaeth beicio oddi ar y ffordd ddynodedig, sy'n gorfodi cerddwyr i rannu'r ffordd gerbydau â cherbydau modur. Nod y cynllun yw darparu isadeiledd teithio llesol oddi ar y ffordd i alluogi teithiau diogel ar droed neu ar gefn beic rhwng y cymunedau.