Cronfa Hyblyg ar gyfer Cyflogaeth a Sgiliau

Os ydych yn byw yng Nghymru ac wedi colli'ch swydd gyda Tata Steel UK, cwmni yn ei gadwyn gyflenwi, neu gontractwr cysylltiedig arall yn ddiweddar, gallwch gael mynediad at arian grant i'ch helpu i sicrhau cyflogaeth ar gyfer y dyfodol.

Mae'r Gronfa Hyblyg ar gyfer Cyflogaeth a Sgiliau wedi'i sefydlu gan Fwrdd Pontio Tata i gefnogi pobl yng Nghymru y mae rhaglen drawsnewid gyfredol Tata Steel UK wedi effeithio arnynt yn uniongyrchol neu'n anuniongyrchol.

Ar gyfer beth y gellir defnyddio'r arian grant?

Os ydych yn gymwys, gall y grantiau ar gyfer unigolion eich helpu i dalu costau fel:

costau hyfforddiant
ffïoedd arholiadau
tystysgrifau a thrwyddedau sy'n ymwneud â gwaith
offer a chyfarpar
yswiriant atebolrwydd cyhoeddus ar gyfer pobl hunangyflogedig

Nid yw'r uchod yn rhestr gyflawn o enghreifftiau. Bydd costau cefnogi eraill yn cael eu hystyried ar gyfer cyllid ar sail unigol.

Sut gallaf gael yr arian?

Os ydych yn byw yn Abertawe

E-bostiwch swanseaworking@swansea.gov.uk neu ffoniwch 01792 578632 i drefnu cyfarfod ag un o fentoriaid cyflogadwyedd Abertawe i wirio a ydych yn gymwys.

Neu gallwch alw heibio Hwb Abertawe'n Gweithio yng Nghanolfan Siopa'r Cwadrant neu unrhyw un o'r hybiau cymunedol lleol: Hybiau Cyflogaeth Abertawe'n Gweithio

Os ydych yn byw yn rhywle arall yng Nghymru

Cysylltwch â'ch gwasanaeth cyflogadwyedd lleol. Neu os ydych yn gweithio yng Nghastell-nedd Port Talbot ond rydych yn byw yn rhywle arall, gallwch hefyd fynd i un o'r lleoliadau galw heibio uchod i siarad ag un o'n hymgynghorwyr wyneb yn wyneb.

Rydym yn deall y gall colli swydd fod yn anodd iawn, ond mae croeso i chi gysylltu â ni. Rydym yma i'ch helpu i benderfynu beth yr hoffech ei wneud ac i'ch cefnogi i gymryd y cam nesaf o'ch dewis.