Nodiadau i geidwaid siopau anifeiliaid anwes

Mae Rheoliadau Lles Anifeiliaid (Trwyddedu Gweithgareddau sy'n Ymwneud ag Anifeiliaid) (Cymru) 2021 yn gwahardd cadw siop anifeiliaid anwes ac eithrio dan drwydded a roddir gan yr awdurdod lleol.

At ddibenion y Ddeddf, ystyr y term "siop anifeiliaid" yw rhedeg busnes gwerthu anifeiliaid fel anifeiliaid anwes mewn unrhyw fangre.

Trwyddedu siopau anifeiliaid anwes

O dan y Ddeddf, rhaid gwneud cais am drwydded o'r fath i'r awdurdod lleol. Gall yr awdurdod lleol roi trwydded cadw siop anifeiliaid, y gellir ei hadnewyddu'n flynyddol, i unrhyw berson nad yw wedi'i wahardd yn flaenorol o dan y Ddeddf.

Mae'n rhaid i'r awdurdod lleol fodloni'i hun y caiff rhai amodau statudol gofynnol eu cyflawni gan y sefydliad.

Yn ogystal, mae gan yr awdurdod lleol rym i wrthod trwydded am "resymau eraill" yn ôl ei ddisgresiwn.

Codir ffi lle rhoddir trwydded. Bydd trwydded yn dod i ben dan amodau arferol ar ddiwedd y flwyddyn y mae'n gysylltiedig â hi.

Dyletswydd yr awdurdod lleol

Wrth benderfynu a ddylid rhoi trwydded, mae'n rhaid i awdurdod lleol ystyried yr angen i sicrhau:

• bod yr anifeiliaid yn cael  cyflenwad digonol o fwyd a diod addas ac yr ymwelir â hwy'n rheolaidd (yn ôl yr angen)
• y bydd anifeiliaid yn cael eu cadw mewn safle priodol ar bob adeg, sy'n ystyriol o faint, tymheredd, goleuadau, awyru a glendid
• na fydd anifeiliaid, sy'n famaliaid, yn cael eu gwerthu pan maent yn rhy ifanc
• y cymerir yr holl ragofalon rhesymol i atal ymlediad clefydau heintus rhwng anifeiliaid
• bod perchnogion yn darparu rhagofalon diogelwch yn erbyn tân ac argyfyngau eraill

Mae'n rhaid i'r drwydded nodi'r fath amodau a fydd yn sicrhau bod y pethau a enwir uchod yn cael eu sicrhau.

Hawl ymgeisydd i apelio yn erbyn gwrthodiad

Gall y trwyddedai neu'r darpar drwyddedai sy'n tybio iddo gael cam am fod yr awdurdod lleol wedi gwrthod rhoi trwydded, neu oherwydd unrhyw amod y cynigir rhoi trwydded o'r fath yn amodol arno, apelio i'r Llys Ynadon;  a chydag apêl o'r fath, gall y llys roi cyfarwyddyd o ran rhoi trwydded, neu o ran yr amodau y mae rhoi trwydded yn amodol arnynt, fel y gwêl yn briodol.

Troseddau yn erbyn y Ddeddf

Mae'r Ddeddf yn darparu ar gyfer y troseddau canlynol:

• cadw siop anifeiliaid anwes heb drwydded
• mynd yn groes i unrhyw un o amodau'r drwydded neu beidio â chydymffurfio â hwy
• rhwystro neu lesteirio unrhyw berson wrth iddo arfer ei bwerau mynediad neu archwilio
• gwerthu anifeiliaid fel anifeiliaid anwes fel rhan o fusnes mewn unrhyw stryd neu le cyhoeddus neu ar stondin yn y farchnad
• gwerthu anifail fel anifail anwes i berson sydd dan 12 oed

Archwilio siopau anifeiliaid anwes

O dan y Ddeddf, rhoddir pwerau i'r awdurdod leol awdurdodi unrhyw un o'i swyddogion neu ei filfeddyg neu ymarferydd milfeddygol i archwilio unrhyw eiddo yn ei ardal y rhoddwyd trwydded iddo o dan y Ddeddf ac sydd mewn grym o hyd. Mae gan y fath berson, pan fydd yn dangos bod ganddo'r awdurdod, os oes angen hynny, hawl statudol i fynd i mewn i'r eiddo ar bob adeg resymol at y dibenion canlynol:

• archwilio'r eiddo
• archwilio'r anifeiliaid yn yr eiddo
• cadarnhau a gyflawnwyd trosedd neu a yw trosedd yn cael ei chyflawni yn yr eiddo.