Gwerthu i'r cyngor: canllaw i gyflenwyr

Daeth y gyfraith caffael cyhoeddus newydd (Deddf Caffael 2023) i rym ar 24 Chwefror 2025. Mae'r ddeddfwriaeth yn ei wneud yn ofynnol i gyflenwyr gael eu cofrestru ar y llwyfan digidol canolog (Canfod Tendr) ar gyfer pob contract dros £30,000 (gan gynnwys TAW). Bydd y Cyngor yn gofyn am rif adnabod unigryw cyflenwr o'r llwyfan digidol canolog cyn y gallant ddyfarnu unrhyw gontractau iddynt, felly mae'r Cyngor yn annog cyflenwyr i gofrestru. Dilynwch y ddolen hon am arweiniad ynghylch y broses gofrestru. 
 
Caiff cyfleoedd contract eu hysbysebu o hyd ar GwerthwchiGymru. Cofrestrwch ar GwerthwchiGymru i sicrhau eich bod yn derbyn hysbysiadau am gyfleoedd contract sy'n berthnasol i'ch cwmni. Mae cymorth ac adnoddau ar gael i gyflenwyr ar GwerthwchiGymru.

Mae'r canllaw hwn yn rhoi arweiniad a gwybodaeth i gyflenwyr presennol a phosibl ynghylch prosesau caffael y cyngor. Bydd hyn yn helpu i gynyddu tebygolrwydd cyflenwyr o gyflwyno ceisiadau am gyfleoedd tendro'r cyngor ac o gael gwybod am y cyfleoedd hynny.

Bydd yn helpu cyflenwyr a chontractwyr sydd am gyflenwi nwyddau, darparu gwasanaethau neu ymgymryd â gwaith i Gyngor Abertawe i wneud y canlynol:

• helpu cyflenwyr i ddeall sut mae'r cyngor yn caffael nwyddau a gwasanaethau
• nodi'r mathau o nwyddau a gwasanaethau i'w caffael
• nodi lle rydym yn hysbysebu ac yn gosod hysbysiadau
• amlinellu'r prosesau y mae'n rhaid i'r cyngor eu dilyn wrth brynu nwyddau a gwasanaethau.

Mae'r canllaw newydd yn y broses o gael ei ddiweddaru yn unol â deddfwriaeth caffael newydd.

Gan fod y cyngor yn defnyddio arian cyhoeddus i brynu nwyddau a gwasanaethau, mae gofyniad caeth i sicrhau gwerth gorau. Ar yr un pryd mae'n rhaid i ni sicrhau bod tryloywder a thegwch ymysg cyflenwyr sydd am werthu i ni.

I gyflawni hyn, rhaid i'r holl gontractau a ddyfernir fodloni'r rheolau a nodir yng nghyfansoddiad y cyngor (Rheolau Gweithdrefn Contractau). Rhaid iddynt hefyd fodloni darpariaethau statudol allweddol eraill a chyfarwyddebau caffael cyhoeddus yr Undeb Ewropiaidd (er enghraifft Deddf Caffael 2023).

Mae angen i gontract ar gyfer darparu gwasanaethau i'r cyhoedd yng Nghymru fodloni telerau cynllun iaith Gymraeg y cyngor. Nodir unrhyw ofynion o ran y Gymraeg yn eglur yn hysbysiadau'r contract a'r dogfennau'r tendrau neu'r dyfynbrisiau.