Addysg ddewisol yn y cartref - hawliau a chyfrifoldebau'r awdurdod lleol (ALL)

Ni ddylai ysgol nag awdurdod lleol eich annog i dynnu eich plentyn oddi ar gofrestr ysgol er mwyn osgoi bod eich plentyn yn cael ei wahardd neu eich bod chi'n cael eich erlyn.

Mae gan yr ALI ddyletswydd i wneud trefniadau er mwyn nodi plant o oedran ysgol gorfodol nad ydynt yn derbyn addysg addas. Fel rhieni sy'n addysgu'ch plant mewn lleoliad heblw yn yr ysgol, byddwn yn gofyn i chi ddarparu gwybodaeth am yr addysg y mae'ch plentyn yn ei derbyn.

Argymhellir bod cyfarfod cychwynnol yn cael ei gynnal gyda theuluoedd ADdC i drafod eu darpariaeth ac unrhyw gyngor neu gefnogaeth y gall fod ei hangen arnynt.

Cysylltir â'r rhiant drwy e-bost/llythyr i drefnu cyfarfod at y diben hwn. Cynhelir cyfarfodydd mewn lleoliad y cytunir arno gan bawb. Ar ôl hynny, bydd Ymgynghorydd ADdC yr ALl yn cysylltu â theuluoedd sy'n addysgu gartref o leiaf unwaith y flwyddyn. Bydd hyn yn rhoi cyfle i gynnig gwybodaeth, cefnogaeth a chyngor, a gwrando ar farn y plentyn a'r teulu ac ymateb iddi.

Yn unol â chanllawiau LlC, mae'r ALl yn gofyn i chi ymateb i'n cyswllt. Os bydd rhieni'n dewis peidio â rhoi gwybodaeth i'r ALl am yr addysg a ddarperir gartref, yna bydd yn rhaid i'r ALl ystyried a yw'n ymddangos bod y rhieni'n cyflawni'u dyletswyddau.

O dan Adran 437(1) Deddf Addysg 1996, mae gan awdurdodau lleol gyfrifoldeb i weithredu os yw'n ymddangos nad yw rhieni'n darparu addysg addas.

Os yw'n ymddangos nad yw plentyn o oedran ysgol gorfodol yn derbyn addysg addas, gall yr ALI gyflwyno hysbysiad ysgrifenedig sy'n ei gwneud yn ofynnol i'r rhiant ddarparu tystiolaeth bod y plentyn yn derbyn addysg addas. Os na dderbynnir ymateb o fewn 15 niwrnod gall yr ALI gyhoeddi gorchymyn mynychu'r ysgol i sicrhau addysg addas.

Os bydd y rhieni ar unrhyw adeg yn darparu gwybodaeth sy'n bodloni'r ALI bod addysg addas yn cael ei darparu, yna ni fyddai unrhyw gamau pellach yn cael eu cymryd.

Efallai y bydd angen rhywfaint o help a chefnogaeth ar rieni ac mae angen i'r ALI roi cyfle i rieni gyflwyno tystiolaeth o'r profiad dysgu y mae plentyn yn ei gael.

Er mwyn cyflawni'r nod o sicrhau bod pob plentyn o oedran ysgol gorfodol sy'n derbyn addysg ddewisol yn y cartref yn derbyn addysg effeithlon ac addas, byddem yn annog cydweithio a chyfathrebu'n weddol reolaidd.

Amcan cyntaf yr ALI yw helpu rhieni i lwyddo yn yr hyn maent wedi penderfynu ei wneud.