Rhoddi neu fabwysiadu mainc - amodau a thelerau

1.  Nid yw Cyngor Abertawe dan unrhyw rwymedigaeth i dderbyn cais.

2.  Penderfynir ar bob cais ar sail unigol, a'r cyngor fydd yn gwneud y penderfyniad terfynol.

3.  Bydd yr holl geisiadau a gymeradwywyd yn cael eu hychwanegu at y gofrestr a chaiff y meinciau eu gosod yn nhrefn dyddiadau'r ceisiadau.

4.  Nid yw'r ffaith bod y cyngor yn derbyn y cais hwn yn golygu y rhoddir unrhyw hawliau neu freintiau eiddo.

5. Gall gymryd hyd at dri deg wythnos i ddanfon a gosod y fainc ar ôl i'r archeb a dderbyniwyd gael ei chwblhau. Mae'r amserlen hon yn ddibynnol ar nifer o ffactorau, gan gynnwys, ond heb fod yn gyfyngedig i, gyflenwyr, llwyth gwaith, cyflwr y tir a chyfyngiadau tywydd. Bydd Cyngor Abertawe yn hysbysu cwsmeriaid o unrhyw oediadau y tu hwnt i reolaeth y cyngor.

6. Unwaith y bydd wedi'i gosod, daw'r fainc yn eiddo i Gyngor Abertawe a fydd yn cymryd cyfrifoldeb am archwilio diogelwch y fainc yn rheolaidd.

7.  Nid yw Cyngor Abertawe yn caniatáu gwasgaru neu gladdu gweddillion amlosgedig o gwmpas y fainc a roddwyd neu yn yr ardal o gwmpas y fainc.

8.  Ni ddylid clymu unrhyw deyrngedau, addurnau neu gofarwyddion i feinciau, na'u rhoi ar, gerllaw neu wrth ymylmeinciau neu'r ardal o'u cwmpas. Os deuir o hyd i unrhyw deyrngedau, addurnau neu gofarwyddion wedi'u clymu i'r fainc, ar y fainc neu'n agos iddi neu yn yr ardal o'i chwmpas, cânt eu tynnu oddi yno a'u gwaredu heb roi hysbysiad ymlaen llaw.

9.  Bydd y fainc yn aros yn y lleoliad am oes y fainc yn unig. Ar ôl yr amser hwn byddwn yn ceisio cysylltu â'r mabwysiadwr / rhoddwr i drafod yr opsiynau sydd ar gael. Ni fydd y cyngor yn gyfrifol am roi mainc newydd yn lle'r hen un pan fydd yn cyrraedd diwedd ei hoes naturiol oherwydd traul arferol, neu o ganlyniad i ddifrod, boed hwnnw'n ddamweiniol neu'n fwriadol.

10. Bydd cost a disgwyliad oes y fainc yn dibynnu ar nifer o ffactorau, gan gynnwys ond heb fod yn gyfyngedig i'r: math of fainc ac yn bwysicaf, ei lleoliad. Bydd mainc a osodir yn lle hen un yn cael ei thrin yn yr un ffordd â mainc goffa a gafodd ei rhoddi neu ei mabwysiadu.

11. Mae'r rhoddwr / mabwysiadwr yn cydnabod ac yn derbyn y difrod sy'n peri i'r fainc fod yn anaddas i'r diben ac y bydd angen cael gwared ar y fainc honno o fewn y cyfnod rhoddi / mabwysiadu cytundig. Nid yw Cyngor Abertawe yn derbyn cyfrifoldeb am ddifrod maleisus, meinciau sy'n cael eu dwyn neu ddifrod drwy weithredoedd natur. Y rhoddwr / mabwysiadwr yn unig sy'n dwyn y risg.

Lleoliad y fainc a'r math o fainc

12. Mae'r cynllun hwn ar gael ar gyfer gosod meinciau ar dir sy'n eiddo i Gyngor Abertawe yn unig. Os gwneir cais am fainc ar dir dan berchnogaeth adran cyngor arall, byddai angen i ni gael caniatâd ganddynt hwy cyn derbyn y cais. Gall y gost fesul mainc newid os bydd cais i leoli mainc y tu allan i'n cynllun arferol.

13.  Bydd y cyngor yn ceisio sicrhau bod yr ymgeisydd yn cael y math o fainc a'r lleoliad sydd orau ganddo.

14.  Er y bydd y cyngor yn ceisio darparu ar gyfer dewis yr ymgeisydd o ran y math o fainc a'i lleoliad, mae'r cyngor yn cadw'r hawl i wrthod cais os nad yw'r fainc yn cyd-fynd â'r meinciau cyfagos a/neu os yw'r lleoliad a ffefrir yn anaddas.

15.  Ni allwn osod meinciau ychwanegol mewn ardaloedd lle mae gormod o feinciau. Dim ond safleoedd â lle ar gyfer meinciau ychwanegol fydd yn cael eu hystyried. Os na fydd lle, bydd yr ymgeisydd yn cael cynnig safle arall sydd ar gael.

16.  Y cyngor fydd yn gwneud penderfyniadau ynghylch lle / diffyg lle.

17.  Ni fydd lleoliadau anghysbell â mynediad gwael yn cael eu hystyried.

18.  Gosodir meinciau o fis Hydref tan fis Mawrth, pan fydd cyflwr y tir a'r tywydd yn addas.

Placiau

19.  Mae tri phrif fath o blac i ddewis ohonynt.

a)  Dur gwrthstaen
b)  Pres (D.S. bydd placiau pres yn colli sglein gydag amser)
c)  Plastig - dewis amgen ar gyfer pob tywydd, gyda llythrennau du ar gefndir lliw efydd.

Arysgrif yn yr astell uchaf (meinciau Brompton a Grafton yn unig).

20.  Trafodir y maint a'ch dewis o eiriau yn eich ymgynghoriad.

21.  Caniateir un plac yn unig fesul mainc.

22.  Mae'r rheolwr yn cadw'r hawl i amrywio neu wrthod arysgrif anaddas.

Cynnal a chadw ac ôl-ofal

23.  Caiff safonau cynnal a chadw'r cyngor eu derbyn fel rhai sy'n cadw'r fainc yn addas i'r diben. Bydd archwiliadau rheoliadd, cael gwared ar graffiti ac atgyweirio mân ddiffygion yn rhan o hyn. Ni fydd cynnal a chadw'n cynnwys paentio neu farneisio rheolaidd. Mae'r ystod o feinciau wedi cael eu dewis oherwydd eu gwydnwch.

24.  Ni chaiff y rhoddwr neu ei deulu wneud unrhyw waith cynnal a chadw neu ail-weithio (gan gynnwys unrhyw baentio neu farneisio). Dylid cyflwyno pob cais am gynnal a chadw neu ailweithio i'r cyngor. Os bydd angen unrhyw waith cynnal a chadw neu adnewyddu, yna bydd angen talu am hyn. Ffoniwch neu anfonwch neges at ein staff cyfeillgar a fydd yn gallu eich cynghori.

25.  Os caiff y plac coffa ei ddifrodi neu ei ddwyn o fewn deuddeng mis ar ôl ei osod, sy'n annhebygol, bydd y cyngor yn gosod un newydd ac yn talu amdano. Ond, os caiff mainc ei difrodi ac ni ellir mo'i hatgyweirio, bydd y cyngor yn cael gwared arni ac yn eich hysbysu o hyn. Codir y tâl safonol sy'n berthnasol ar yr adeg honno am fainc arall i'w gosod yn ei lle.

Costau / taliad

26.  Rhoddir prisiau pan fyddwch yn gwneud cais.

27.  Unwaith y bydd cais yn cael ei gymeradwyo ac y cytunir ar yr holl fanylion.

a)  bydd dolen talu ar-lein yn cael ei e-bostio atoch. Os na allwch ddefnyddio'r system taliadau ar-lein, gallwch drefnu gyda'r is adran Parciau i dalu dros y ffôn.
b)  mae'n rhaid i ffurflenni ar-lein gael eu cwblhau, amodau a thelerau gael eu derbyn a thaliadau ar-lein / talidadau dros y ffôn gael eu prosesu cyn i'r archeb am fainc goffa gael ei phrosesu a chyn i'r fainc gael ei gosod.

Y cyfnod rhoddi

28.  Cyfrifoldeb y rhoddwr / mabwysiadwr yw hysbysu Cyngor Abertawe o unrhyw newid i fanylion cyswllt yn ystod cyfnod y rhodd / mabwysiadu. Cysylltwch â'r isadran parciau i ddweddaru unrhyw fanylion cyswllt.

Er y bydd Cyngor Abertawe yn ceisio darparu ar gyfer ceisadau am roddi / fabwysiadu mainc, nid yw dan orfod i dderbyn cais ac mae'n gobeithio y bydd ymgeiswyr yn deall bod nifer y meinciau a'r math o feinciau yn brif ystyriaeth os yw'r cyngor yn mynd i gadw mannau agored cyhoeddus yn edrych yn ddeniadol ac yn glir.

Mae'r cyngor yn cadw'r hawl i ddiwygio'r amodau a thelerau hyn pan fo angen.

Diogelu data

Cyngor Abertawe yw'r rheolwr data ar gyfer yr wybodaeth bersonol rydych chi'n ei darparu ar y ffurflen hon. Bydd eich gwybodaeth yn cael ei defnyddio er mwyn darparu'r gwasanaeth rydych wedi cyflwyno cais amdano ac ni fydd yn cael ei defnyddio at unrhyw ddiben arall. Nif fyddwn yn rhannu'ch data ag unrhyw drydydd parti heb eich caniatâd penodol oni bai fod gofyn i ni neu y caniateir i ni wneud hynny yn ôl y gyfraith.

Mae cyfraith diogelu data'n disgrifio'r sail gyfreithiol ar gyfer prosesu eich data fel un sy'n angenrheidiol ar gyfer cyflawni contract. I gael rhagor o wybodaeth am sut mae Cyngor Abertawe'n defnyddio'ch data personol, gan gynnwys eich hawliau fel gwrthrych y data, darllenwch ein hysbysaid preifatrwydd corfforaethol ar ein gwefan.