Arweiniad i gofrestrau etholiadol a chyfeiriaduron masnach yn Llyfrgell Ganolog

• Rhestrau Bwrdeisiaid a Chofrestrau Etholiadol
• Cyfeiriaduron masnach Cymru ac Abertawe

Rhestrau Bwrdeisiaid a Chofrestrau Etholiadol

Mae ein cofrestrau'n cwmpasu ardaloedd Gorllewin Abertawe, Dwyrain Abertawe, Dyffryn Lliw (o 1991 ymlaen) ac ardaloedd Gŵyr. Mae'r gofrestr gynharaf yn y Llyfrgell Astudiaethau Lleol yn dyddio o 1836. Mae'r gyfres o gofrestrau'n anghyflawn tan 1939 ac yn fwy cyflawn ar ôl yr Ail Ryfel Byd, hyd at 2002. Mae'r rhan fwyaf o'n cofrestrau ar gael i bobl eu pori ar y silffoedd agored yn yr ardal astudiaethau lleol.

Rhai nodiadau ar ddefnyddio'r cofrestrau

Roedd cael eich cynnwys mewn Cofrestrau Etholiadol neu Restrau Bwrdeisiaid cynnar yn dibynnu ar berchnogaeth eiddo ac roedd menywod wedi'u heithrio'n llwyr tan 1918 (hyd yn oed wedyn roedd yn rhaid iddynt fod dros 30 oed). Yn ffodus, roedd Cofrestrau Etholiadol diweddarach yn llai cyfyngedig. Rhestrodd cofrestrau'r bedwaredd ganrif ar bymtheg bleidleiswyr yn ôl cyfenwau yn y wardiau, ond newidiodd cofrestrau o'r oes Edwardaidd i restru pobl yn ôl cyfeiriad yn eu wardiau lleol. Felly, i ddefnyddio'r cofrestrau i ddod o hyd i bobl yn yr ugeinfed ganrif bydd angen cyfeiriad arnoch neu syniad o'r ward neu'r ardal yr oeddent yn byw ynddi o leiaf. Mae cyfrolau diweddarach hefyd yn cynnwys mynegeion stryd. Cofiwch hefyd fod ffiniau bwrdeistrefi wedi newid dros y blynyddoedd.

Roedd Rheoliadau Cynrychiolaeth y Bobl (Cymru a Lloegr) 2002 yn golygu na allai'r cofrestrau etholiadol llawn gael eu cadw gan y Llyfrgell Ganolog mwyach. Mae'r cofrestrau cyfredol a diweddar i'w gweld yn Archifau Gorllewin Morgannwg, sydd hefyd yng Nghanolfan Ddinesig Abertawe. Mae ganddynt hefyd gyfres lawnach o gofrestrau etholiadol hanesyddol ar gyfer holl sir Gorllewin Morgannwg gynt. Mae'r cofrestrau hanesyddol yn yr archifau ar fynediad caeëdig felly bydd angen i chi ofyn i staff am fynediad: Ymweld ag Archifau Gorllewin Morgannwg

Mae cofrestrau ardal Abertawe rhwng 1839 a 1966 yn Archifau Gorllewin Morgannwg wedi'u digideiddio a gellir eu chwilio yn ôl enw a lleoliad yn Ancestry.com. Mae gan Findmypast.com gronfa ddata chwiliadwy o gofrestrau etholiadol Cymru a Lloegr 1832-1932 a ddarperir gan y Llyfrgell Brydeinig. Gall aelodau Llyfrgell Abertawe chwilio Ancestry a Findmypast am ddim drwy ein tanysgrifiadau. Ewch i'n Hadnoddau Ar-lein ar ein gwefan am fanylion: Adnoddau llyfrgell ar-lein

Mae ystyr y codau a ddefnyddir yn y cofrestrau fel a ganlyn:

• R = Cymhwyster preswylio
• BP = Cymhwyster mangreoedd busnes
• O = Cymhwyster meddiannaeth
• HO = Cymhwyster trwy swydd y gŵr
• NM = Pleidleisiwr yn y llynges neu'r fyddin
• J = Cymwys i wasanaethu fel rheithiwr
• SJ = Cymwys i wasanaethu fel rheithiwr arbennig
• a = Pleidleisiwr absennol
• BP = Cofrestr mangreoedd busnes
• CI = Cofrestr preswylwyr sifil
• SE = Cofrestr Gwasanaeth
• RR = Cofrestr Trethdalwyr

O 1928, gellir dod o hyd i'r codau canlynol:

• R = Cymhwyster preswylwyr (dyn)
• Rw = Cymhwyster preswylwyr (menyw)
• B = Cymhwyster mangreoedd busnes (dyn)
• Bw = Cymhwyster mangreoedd busnes (menyw)
• O = Cymhwyster meddiannaeth (dyn)
• Ow = Cymhwyster meddiannaeth (menyw)
• D = Cymhwyster trwy swydd y wraig
• Dw = Cymhwyster trwy swydd y gŵr
• NM = Pleidleisiwr yn y llynges neu'r fyddin

Cyfeiriaduron masnach Cymru ac Abertawe

Cyhoeddwyd cyfeiriaduron masnach lleol a masnachol o ddiwedd y 18fed ganrif. Mae'r cynharaf a ddelir yn y Llyfrgell Astudiaethau Lleol yn dyddio o 1816. Maent yn amrywio o ran cynnwys - mae rhai rhestrau'n cynnwys pobl broffesiynol a masnachwyr yn unig, mae eraill yn cynnwys preswylwyr preifat ac mae rhai'n cynnwys mynegai strydoedd. Gellir dod o hyd i ragor o fanylion cyhoeddi am deitlau unigol yn y rhestr hon drwy fynd i'n catalog ar-lein. Mae'r rhan fwyaf o'r eitemau hyn ar gael ar y silffoedd agored i'w pori yn y Llyfrgell Astudiaethau Lleol er bod rhai cyfeiriaduron diweddarach Kelly ar gyfer de Cymru yn cael eu storio yn ein cypyrddau gwydr. Gofynnwch i staff am fynediad.

Benthycwyd llawer o gyfeiriaduron masnach y llyfrgell er mwyn eu digideiddio fel rhan o fenter gydweithredol i brosiect a ariannwyd gan y loteri, Historical Directories of England & Wales, a drefnwyd gan Brifysgol Caerlŷr. Gellir chwilio am y rhain yn hawdd ar-lein yn: Historical directories of England and Wales (University of Leicester) (Yn agor ffenestr newydd)

Gellir eu chwilio hefyd yng nghasgliad Ancestry.com - UK, City and County Directories, 1766 - 1946. Gall aelodau Llyfrgell Abertawe chwilio Ancestry am ddim drwy ein tanysgrifiad: Adnoddau llyfrgell ar-lein

Mae gennym hefyd gasgliad o gyfeiriaduron masnach a cyfeiriaduron ffôn ar gyfer ardal Abertawe am y cyfnod ar ôl 1970. Ewch i gatalog y llyfrgell ar-lein neu gofynnwch i staff am ragor o fanylion.

Allwedd - Ychwanegol: E = Yn cynnwys Mynegai Enwau, S = Yn cynnwys Mynegai Strydoedd

Os oes gennych unrhyw gwestiynau pellach, cysylltwch â ni Llinell Lyfrau.